00:00:00 IGIHE NETWORK KN KINYARWANDA EN ENGLISH FR FRANCAIS

I Kibeho hizihijwe isabukuru y’imyaka 40 y’amabonekerwa ya Bikira Mariya

Yanditswe na Prudence Kwizera
Kuya 30 Ugushyingo 2021 saa 08:04
Yasuwe :

Imbaga y’abaturutse mu bihugu bitandukanye byo ku Isi biganjemo Abakirisitu Gatolika, bahuriye i Kibeho mu Karere ka Nyaruguru mu kwizihiza isabukuru y’imyaka 40 ishize Bikira Mariya abonekeye abana b’abakobwa.

Iyo sabukuru yizihirijwe i Kibeho ku butaka butagatifu guhera ku Cyumweru ikomeza kuri uyu wa Mbere tariki 29 Ugushyingo 2021 haba n’igitambo cya Misa yasomwe na Arikiyepisikopi wa Kigali, Antoine Cardinal Kambanda.

Tariki ya 28 Ugushyingo 1981, ni bwo Bikira Mariya yabonekeye umukobwa wa mbere witwa Mumureke Alphonsine wigaga mu rwunge rw’amashuri rwa Mère du Verbe i Kibeho.

Nyuma y’umwaka umwe, Bikira Mariya yongeye kubonekera uwitwa Mukamazimpaka Anathalie, nyuma yongera kubonekera Mukangango Marie Claire na bo bigaga kuri iryo shuri.

Kuri uyu wa Mbere Mukamazimpaka Anathalie yatanze ubuhamya avuga uko yabonye Bikira Mariya ubwo yamubonekeraga tariki ya 12 Mutarama 1982.

Yagize ati “Bikira Mariya yaje ari mwiza cyane ku buryo ntawe wamugeranya na we; ni ukuvuga ngo aba ari hejuru mu kirere kandi ari muremure afite umubiri mwiza ubengerana. Ntabwo ubona asa natwe abirabura cyangwa abazungu cyangwa irindi bara riri ku Isi. Mbese aturusha ubwiza bwose ni mwiza bihebuje.”

Bamwe mu banyamahanga bakunze kuza i Kibeho ku butaka butagatifu, bavuze ko bishimira umutekano uhari.

Josel Pedate waturutse mu Bwongereza ati “Mu Rwanda ibintu byose ni amahoro; hari amahoro n’umutuzo ugereranyije n’ibindi bihugu kuko nagiye mu bindi bihugu nka Kenya, Uganda, Botswana, Malawi na Ethiopie.”

Eliane Kasongo waturutse muri Afurika y’Epfo, na we yemeza ko umutekano yabonye mu Rwanda utandukanye n’ibindi bihugu yasuye.

Ati “Umutekano mu Rwanda umeze neza kuko njye naje nturuka muri Afurika y’Epfo ariko umutekano ntabwo umeze neza nko mu Rwanda. Hano mu Rwanda turumva dutekanye kuko twakoze urugendo n’amaguru hafi isaha yose, nta kibazo twagize twari dutekanye kandi turumva twakiriwe neza.”

Ikindi cyemezwa n’abasura i Kibeho ku butaka butagatifu, ni ubutumwa ndetse n’ibitanganza bahamya ko bahabonera ku buryo bagiye kubiheraho bashishikariza bagenzi babo kuzasura u Rwanda ariko by’umwihariko i Kibeho.

Mu bitekerezo batanga basanga Isi ikeneye kumva no gushyira mu bikorwa ubutumwa Bikira Mariya yatangiye i Kibeho ku buryo bwayibera umuti wo kwikura muri ibi bihe yugarijwe n’icyorezo cya Covid-19.

Josel Pedate ati “U Rwanda n’ahandi kure nk’i Burayi ndetse n’ibindi bihugu birakwiye ko twakira ubu butumwa bw’umubyeyi wacu Bikira Mariya bwo kwicuza no kwihana ibyaha byacu. Dukeneye kwihana cyane muri ibi bihe icyorezo cya Covid-19 kiriho kiyongera kandi ari nako kigenda cyihinduranya bigatuma abantu babaho bababaye.”

“Ibi ni nabyo umubyeyi Bikira Mariya agarukaho mu butumwa bwe aho yavuze ko ibibazo biriho byiyongera rero ko buri wese akwiye guca bugufi akihana kuko ngo ni cyo gisubizo cyonyine cyadukura muri ibi bibazo.”

Arikiyepisikopi wa Kigali, Antoine Cardinal Kambanda, yavuze ko abantu bakwiye kuba barakuye isomo rikomeye mu butumwa bw’umubyeyi Bikira Mariya, cyane cyane Abanyarwanda bakigira ku mateka baciyemo bagaharanira kwimika ubumwe barwanya ibibatandukanya.

Ati “Nyuma y’amateka n’ibihe bikomeye twabayemo bikadusigira ububabare n’ibikomere byinshi, Bikira Mariya aratubwira ati ‘umwana wanjye ntatana n’imibabaro’ ni ukuvuga ngo ububabare bwacu tububyaza umukiro.”

“Baravuga ngo umugisha wera ku giti cy’umuruho, ni ukuvuga ngo imibabaro ni umusaraba, kwakira umusaraba wawe, kwiyunga n’amateka yawe n’ibikomere byawe. Ukwiyakira no kwakira ubuzima bwawe, icyo gihe urabohoka ukaba washobora kwakira inema y’Imana ndetse no kwakira abandi.”

Ibirori by’isabukuru y’imyaka 40 Bikira Mariya abonekeye i Kibeho byizihijwe hubahirizwa amabwiriza yo kwirinda icyorezo cya Covid-19.

Ubusanzwe i Kibeho umwaka wajyaga gushira hasuwe n’abakora ingendo nyobokamana baturutse hirya no hino ku Isi bari hagati y’ibihumbi 600 na 800, gusa uyu mubare waragabanutse kubera icyorezo cya Covid-19.

Kuri iyi nshuro abitabiriye ni abaturutse mu bihugu birimo Leta Zunze Ubumwe za Amerika, u Bwongereza, Portugal, Pologne, Afurika y’Epfo, Tanzanie, Uganda, u Burundi, u Rwanda n’ibindi.

Mu bitekerezo batanga basanga Isi ikeneye kumva no gushyira mu bikorwa ubutumwa Bikira Mariya yatangiye aha i Kibeho
Misa yasomwe na Arikiyepisikopi wa Kigali, Antoine Cardinal Kambanda
Iyo sabukuru yizihirijwe i Kibeho ku butaka butagatifu guhera ku Cyumweru ikomeza kuri uyu wa Mbere tariki 29 Ugushyingo 2021
Kuri iyi nshuro abitabiriye ni abaturutse mu bihugu birimo Leta Zunze Ubumwe za Amerika, u Bwongereza, Portugal, Pologne, Tanzania n'ahandi
Bamwe mu banyamahanga bakunze gusura i Kibeho ku butaka butagatifu, bavuze ko bishimira umutekano uhari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .