00:00:00 IGIHE NETWORK KN KINYARWANDA EN ENGLISH FR FRANCAIS

COVID-19: Abahamya ba Yehova bitandukanyije n’abanga kwikingiza bitwaje imyemerere

Yanditswe na Dufitumukiza Salathiel
Kuya 20 January 2022 saa 02:49
Yasuwe :

Umuryango w’Abahamya ba Yehova witandukanyije n’abanga kwikingiza COVID-19 bitwaje imyemerere y’amadini yabo, ushishikariza buri wese kubikora kubera agaciro k’ubuzima.

Mu itangazo wasohoye ku wa 19 Mutarama 2022, wasobanuye ko ubona gukingirwa ari umwanzuro w’umuntu ku giti cye kandi ko Abahamya ba Yehova benshi bemera gukingirwa.

Rirakomeza riti “Ubu 99% by’abantu 20.994 bakora mu biro byacu biri hirya no hino ku Isi bamaze kwikingiza COVID-19 byuzuye.”

“Muri ibi bihe by’icyorezo, Abahamya ba Yehova bagiye basohora inyandiko nyinshi n’amashusho bashishikariza abantu kwikingiza kandi abayobozi b’ibihugu bimwe na bimwe barabidushimiye.”

Ikibazo cyo kwanga inkingo cyakunze kumvikana mu bice bitandukanye by’igihugu, abenshi bakavuga ko imyemerere yabo itabemerera kwikingiza.

Hari n’abagiye bashaka kwambuka imbibi binyuranyije n’amategeko ngo bataziterwa ariko n’iyo bageze bagasanga ari zo ngamba zihari kuko urugamba ari urw’Isi yose, bakwanga gukurikiza ingamba zashyizweho bagasubizwa iyo bavuye.

Abahamya ba Yehova bavuze ko bubaha ubuzima bwabo kandi bagashishikazwa n’icyatuma abandi bamererwa neza.

Ubu muri serivisi zimwe na zimwe abatarakingirwa barahezwa bitewe n’ubwinshi bw’abahurira aho zitangirwa, hirindwa ko hatiza umurindi ikwirakwira ry’icyorezo.

Nk’insengero n’amatorero byasabwe ko abitabira amateraniro bagomba kuba barakingiwe (ku bujuje ibisabwa) kandi hagaterana bake kugira ngo guhana intera bishoboke.

Abahamya ba Yehova bo ubu baraterana bifashishije ikoranabuhanga ririmo iry’amashusho n’iry’amajwi hifashishijwe telefoni.

Imibare ya Minisiteri y’Ubuzima yerekana ko Abaturarwanda barenga miliyoni 8 bamaze guhabwa doze ya mbere, miliyoni 6,5 bamaze gukingirwa byuzuye, naho abakabakaba ibihumbi 700 batewe urwo gushimangira.

Inzego z’ubuzima zisobanura ko kwikingiza ari imwe mu ngamba zikomeye zifasha guhangana n’icyorezo kuko ubudahangarwa biha umubiri buwufasha kwihagararaho uwanduye ntarembe ndetse ntanayikwirakwize cyane. Icyakora n’andi mabwiriza ni ngombwa kubahirizwa kugira ngo haterwe intambwe ikomeye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .