00:00:00 IGIHE NETWORK KN KINYARWANDA EN ENGLISH FR FRANCAIS

Cardinal Kambanda yasabye Abakirisitu gusengera Papa Benedigito XVI urembye

Yanditswe na Igizeneza Jean Désiré, Akayezu Jean de Dieu
Kuya 29 Ukuboza 2022 saa 12:03
Yasuwe :

Arkiyepiskopi wa Kigali akaba n’Umuyobozi wa Diyosezi ya Kibungo muri Kiliziya Gatolika, Antoine Cardinal Kambanda, yasabye abanyarwanda kwifatanya mu isengesho ryo gusabira Papa Benedigito XVI urembye.

Byatangajwe ku wa Gatatu tariki 28 Ukuboza 2022, ko Benedigito XVI w’imyaka 95 arembye. Papa Francis niwe watangaje iyi nkuru ariko yirinda kugira amakuru arambuye atanga ku burwayi bw’uyu mukambwe.

Ati “Ndashaka kubasaba mwese ngo musengere Papa Benedigito ugifatiye runini Kiliziya mu buryo bw’umwihariko. Mureke tumwibuke, ararwaye cyane. Dusabe Imana ngo imukomeze azabashe kubona urukundo rwa Kiliziya kugera ku iherezo.”

Cardinal Kambanda nawe yunze mu rya Papa Francis asabira Benedigito XVI amasengesho.

Avuga ko Kiliziya Umuryango w’Imana mu Rwanda, wifatanyije na Nyirubutungane Papa Fransisiko hamwe na Kiliziya yose ku Isi mu gutakambira Nyagasani Imana.

Mu butumwa yanyujije ku mbuga nkoranyambaga ze yagize ati “Tubinyujije ku Mubyeyi Bikira Mariya Nyina wa Jambo ngo aramire ubuzima bwa Papa Benedigito XVI uri mu kiruhuko cy’izabukuru.”

Abacardinal batandukanye bifatanyije na Papa Francis mu gusabira uwo yasimbuye. Cardinal Robert Sarah wo muri Guinée yanditse ko "muri ibi bihe bitoroshye mureke twihurize hamwe mu gusabira inshuti yacu Papa Benedigito XVI".

Nyuma yo gusabira Papa Benedigito XVI, Papa Francis yakoze urugendo ruto ruva aho yari ari gusomera misa mu cyuma cyitiriwe Mutagatifu Pawulo VI, ajya mu nzu ya Mater Ecclesiae aho Papa Benedigito XVI abarizwa kuva yava ku bushumba bwa Kiliziya Gatolika.

Papa Benedigito XVI kuri ubu ufite imyaka 95, mu 2013 yabaye umushumba wa Kiliziya Gatolika weguye mu myaka 600 yari ishize, aho icyo gihe yatangaje ko impamvu z’uburwayi ari zo zatumye ava kuri uriya mwanya.

Nubwo muri iyi myaka agowe n’uburwayi yageragezaga gutanga ubutumwa mu bihe bitandukanye bujyanye no gukomeza abayobozi ba Kiliziya.

Mu myaka ibiri ishize Cardinal wo muri Malta yavuze ko Papa Benedigito XVI yababwiye ko Uhoraho yatwaye ijwi rye ndetse ko yabyakiriye.

Papa Francis na we yabwiye ABC News ko n’ubwo Papa Benedigito XVI avuga gahoro cyane ariko akurikirana ikiganiro aba agirana n’abo bari kumwe.

Ubwo Papa Francis yatumiraga ba Cardinal bo mu Isi kujya guhura na Papa Benedigito XVI muri Kanama, yagaragaraga nk’uwacitse intege ariko bose abaha ikiganza mu kugaragaza ko yabishimiye.

Papa Benedigito XVI ubwo yavaga ku bushumba bwa Kiliziya Gatolika mu 2013 yari afite imyaka 85, ibyatunguye abo muri iyi kiliziya cyane ko byaherukaga gukorwa na Papa Grégory XII mu 1415.

Ni umupapa wa munani ukomoka mu Budage. Yamenyekanye cyane mu bikorwa byiganjemo kugendera ku bya kera (conservateur) akarangwa n’ibitekerezo byo gushyigikira umuco wa kera aho yakunze kudahuza n’abatezaga imbere Iyobokamana rivuguruye.

Ku rundi ruhande ariko ubuyobozi bwe bwaranzwe n’abapadiri bakunze kugaragaraho ibikorwa byo gusambanya abana aho nko mu 2009 hagaragaye ubwiyongere bw’abapadiri bo muri Irlande bashakaga gusambanya abana ariko bagakingirwa ikibaba.

Nyuma hagati ya 2011 na 2012 hagaragaye abapadiri bagera kuri 400 bambuwe inshingano na Papa Benedigito XVI.

Icyakora mu ntangiriro z’uyu mwaka Papa Benedigito XVI yasabiye imbabazi amakosa yakozwe mu gukemura ibibazo by’isambanywa ry’abana, amakosa yakozwe kuva mu mwaka wa 1977 kugeza mu 1982.

Mu 2013 nibwo Papa Benedigito XVI yeguye ku mwanya w’Umushumba wa Kiliziya Gatolika ku Isi kubera impamvu z’uburwayi.

Kwegura kwa Papa byaherukaga kubaho mu myaka 600 yari ishize. Kuva icyo gihe aba i Vatican.

Ubutumwa bwa Cardinal Kambanda wasabye abakristu gusengera Papa Benedict XVI urembye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .