00:00:00 IGIHE NETWORK KN KINYARWANDA EN ENGLISH FR FRANCAIS

Cardinal Kambanda yagaragaje icyatuma Isi igira amahoro n’ibyishimo

Yanditswe na IGIHE
Kuya 26 Ukuboza 2022 saa 01:34
Yasuwe :

Arikiyepisikopi wa Kigali, Antoine Cardinal Kambanda yagaragaje ko kugira ngo Isi igire amahoro n’ibyishimo, abayituye bakwiriye kubanza kwiyumva nk’abavandimwe nk’uko Imana ibibasaba kandi bakumva ko iyo sano bafitanye ikwiriye kuza hejuru y’ibindi byose.

Ibi Cardinal Kambanda yabigarutseho ku Cyumweru tariki ya 25 Ukuboza mu 2022 ubwo yasomaga Misa ya Noheli yabereye muri Katederali ya Kibungo.

Yavuze ko inkuru y’urukundo rw’Imana n’impuhwe zayo bikwiriye gusakazwa na buri mukirisitu wagize amahirwe yo kumenya ubu butumwa bwiza.

Ati “Dutumwe twese gutangaza iyo nkuru nziza y’uko Imana yatugiriye impuhwe, yatugaragarije urukundo rwayo kandi ikatwifuriza ko tuba abana bayo n’abavandimwe hagati yacu.”

Yakomeje avuga ko kugira ngo Isi ibone amahoro ari uko abantu bashyira imbere ubuvandimwe bafitanye kurenza ibindi byose.

Ati “Kugira ngo ibyo byishimo bishoboke ni uko twumva ko ubwo buvandimwe burenga ibidutandukanya byose, burenga imipaka kugira ngo Isi yose amahoro y’Imana n’ibyishimo byayo bisakare ariyo ngoma y’Imana twamamaza Yezu Kirisitu yaje kutwinjizamo.”

Yagaragaje ko Noheli ikwiriye kuba umwanya wo kunga ubumwe hagati y’abatuye Isi abantu bakishimira gusangira ibyo bafite na bagenzi babo cyane cyane abakene.

Cardinal Kambanda yibukije ko Yezu wavutse ari urumuri rwaje kumurikira abari mu mwijima utwikira ibibi byinshi nk’ubugome, inabi, amakimbirane n’intambara, amarozi, ubusinzi n’ubusambanyi, urwango n’ubuhemu byose bijyana n’umwijima n’amarira menshi.

Cardinal Kambanda atanze ubu butumwa mu gihe mu bice bitandukanye by’Isi hakigaragara ibibazo by’umutekano muke biterwa ahanini n’intambara n’amakimbirane.

Cardinal Kambanda yagaragaje ko abantu bahaye agaciro isano y’ubuvandimwe bafitanye isi yagira amahoro n’ibyishimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .