00:00:00 IGIHE NETWORK KN KINYARWANDA EN ENGLISH FR FRANCAIS

Akanyamuneza kari kose! Tujyane kwizihiza Noheli mu nsengero z’i Kigali (Amafoto)

Yanditswe na Akayezu Jean de Dieu
Kuya 25 Ukuboza 2022 saa 06:27
Yasuwe :

Buri mwaka tariki ya 25 Ukuboza abayoboke b’amadini n’amatorero yizera Yezu/Yesu hirya no hino ku Isi yizihiza umunsi mukuru w’ivuka ry’Umwana w’Imana.

Ni umunsi wahawe umugisha n’amahanga ndetse no ku ngengabihe zitandukanye ugirwa ikiruhuko ku bakozi ngo hato hatazagira ubuzwa uburenganzira bwe bwo kuwizihiza.

Kimwe n’ahandi ku Isi, ibirori byo kwizihiza Noheli muri uyu mwaka wa 2022, bibaye abakirisitu bose batari mu bihe bya Covid-19, bitandukanye n’uko byagenze mu myaka ibiri ishize.

IGIHE yageze hirya no hino mu nsengero aho abakirisitu bari bafite akanyamuneza ku mutima ndetse n’abayobora amadini n’amatorero bagaragaje ibisobanuro byo kwizihiza ibirori by’ivuka rya Yezu/Yesu.

Padiri Mukuru wa Paruwasi yitiriwe Umuryango Mutagatifu [St Famille] Rukimbira Ezéchiel yagize ati “Ni umunsi mukuru ukomeye cyane mu mateka y’Abakirisitu kubera ko Imana yohereje umwana wayo aza aha ku Isi afata umubiri nk’uwacu kugira ngo aducungure, akaba aribyo uyu munsi twizihiza.”

Padiri Rukimbira avuga ko ari iby’agaciro kuba abantu bongeye kwizihiza ibi birori mu gihe kitarangwamo icyorezo cya Covid-19 bitandukanye n’uko byabaga bimeze mu myaka ibiri ishize aho umubare w’abajya mu rusengero wabaga ari muke, ndetse hariho n’izindi ngamba zirimo izituma abantu bategerana.

Ati “Urumva ko ari ishimwe rikomeye ku Bakirisitu ndetse n’amasakaramentu akongera gutangwa nk’uko byari byarahoze mbere ya Covid-19.”

Umushumba Mukuru w’Itorero rya Evangelical Restoration Church , Apôtre Joshua Masasu Ndagijimana yagize ati “Uyu ni umunsi w’agaciro cyane ndetse navuga ko ari uw’ingenzi. Usobanuye ko Imana mu Bumana bwayo mu ijuru yasanze yaza kuducungura yambaye uruhu rwacu.”

Yakomeje agira ati “Uko guca bugufi, uko kumanuka, nta rukundo rungana gutyo. Bisobanuye ko nanjye nashobora guhuzwa n’Imana ngasa nayo kuko hari uwavuye mu Bumana agasa nanjye. Bisobanuye ko Kristo yambaye ubumuntu kugira ngo nanjye anshoboze kunyambika Ubumana.”

Apôtre Joshua Masasu yavuze ko uyu munsi ukwiye kwibutsa abantu urukundo rw’Imana aho kugira ngo bumve ko ari umwanya wo kwishima no kwinezeza gusa.

Ati “Iyo wagiriwe neza ukaba waragize umuntu wagukunze kuri urwo rwego […] nawe kwishyura ni uko utakomeza kubaho uko usanzwe ubayeho, ni uko Kristo wamutunga muri wowe, ukamugendana noneho akavukira muri wowe kugira ngo mugendane.”

Yakomeje agira ati “Abantu barenze amaso ibyo kurya, kunywa no kwambara […] babwire Imana bati ineza wangiriye ntabwo nayigarukira gusa kwinezeza nanjye nabaho ku bwawe. Bareke kubaho ku bwabo, babeho kubw’uwabapfiriye akanabazukira.”

Umushumba mu Itorero rya Pantekote mu Rwanda, Pasiteri Uwizeye Albert yavuze ko umunsi mukuru nk’uyu ari umwanya wo kongera kwibutsa Abanyarwanda ko bakwiriye kwakira Kristo nk’Umwami n’Umucunguzi w’Ubugingo bwabo.

Ati “Uyu munsi ubutumwa ngira ngo ntange ku Banyarwanda bose n’abatuye ku Isi badukurikiye ni uko bakwemera gukiza imitima yabo bakakira Kristo kugira ngo amahoro babuze, ibyishimo babuze biture mu mitima yabo.’’

Akari ku mutima w’Abakirisitu bizihije Noehli

Abakirisitu baganiriye na IGIHE bagaragaje ko ari umunsi w’ibyishimo kuri bo ndetse ari umwanya wo kwisuzuma kugira ngo baharanire kugera ikirenge mu cy’Umwana w’Imana waranzwe no gukora ibyiza.

Umuhanzi akaba n’Umukirisitu mu Itorero rya Evangelical Restoration Church, Jean Christian Irimbere yavuze ko umunsi mukuru wa Noheli usobanuye byinshi ku bizera.

Ati “Urebye aho Imana yari iri mu bwiza bwayo imerewe neza, itekereza ku muntu nkanjye, nkawe, yatweretse ko idukunda cyane. Yarenze byose iraza ku bwacu.”

Yakomeje agira ati “Ishimwe mfite ni ukuba narakunzwe, nabwira buri muntu ko twizihiza ivuka ry’Umwami wacu twibuka urukundo Imana yadukunze rutagereranywa.”

Umukirisitu mu Itorero rya ADEPR Nyarugenge, Nsabiyumva Emmanuel yagize ati “Uyu munsi ni ibyishimo bikomeye ku bizera Kristo nk’Umwami n’Umukiza kuko kuvuka kwe kwabaye intangiriro yo gucungurwa kwacu. Uyu munsi turaha agaciro kuvuka kwa Yesu nk’Umwami n’Umukiza.

Nsabiyumva usanzwe ari n’umuyobozi wa Korali Hoziyana yavuze ko n’ubwo ari umunsi w’ibyishimo, abakirisitu badakwiye kwinezeza ngo bibagirwe uwabahaye ibyo byishimo.

Ati “N’abanezerwa muri ubwo buryo ntabwo tubagaya ariko turabasaba ko barya, banywa banezerwa nibagere ku kindi gika cy’uwabahaye ibyo byishimo, uwo munezero, iyo myambarire […] uwo babikesha nawe abe ariwe baha agaciro.”

Iryingabe Emma usengera muri ADEPR Nyarugenge yagize ati “Niba Noheli itwibutsa ivuka rya Yesu, bituma twibuka gucungurwa kwacu kuko iyo ataza kuvuka ngo agere ubwo apfa azize ibyaha by’abantu ntabwo tuba twaramenye agakiza.”

Noheli ikomoka ku ijambo ry’Igifaransa “Noël”, na ryo ryavuye mu Kilatini “Natalis” bivuze “umunsi w’amavuko/isabukuru y’amavuko”. Mu Cyongereza Noheli yitwa “Christmas”.

Mu nyigisho Arkiyepiskopi wa Kigali, Antoine Cardinal Kambanda, yatanze ku mugoroba wo ku wa Gatandatu mu gitaramo cya Noheli cyabereye muri Katederali ya St Michel i Kigali, yasabye abakirisitu kuba amaboko y’Imana ku bantu bose, kugira ngo ibyishimo bya Noheli bigere hose.

Abakirisitu ba Zion Tempe Celebration Center bitabiriye amateraniro yo kuri Noheli
Abasheshe akanguhe nabo baje kwishimira Ivuka rya Yezu, uyu mukecuru ni uwo muri Paruwasi St Famille
Akana Yezu kari mu kirugu
Gikundiro Esther wo muri Evangelical Restoration Church yavuze ko Abakirisitu bafite ibyishimo by'urukundo bakunzwe n'Imana yabahaye umwana wayo w'ikinege
Iryingabe Emma usengera muri ADEPR Nyarugenge yasabye Abakirisitu bagenzi be kwizihiza ibirori ariko baha agaciro uwabahaye ibyishimo
Muri ERC Masoro bakase umutsima bizihiza ivuka rya Yesu
Muri Kiliziya ubwo bari guhazwa
Padiri Mukuru wa Paruwasi yitiriwe Umuryango Mutagatifu [St Famille] Rukimbira Ezéchiel yavuze ko ari ibihe by'umunezero kwizihiza Noheli mu bihe Covid-19 yarangiye
Pasiteri Lydia Masasu yasangiye n'abana Noheli
Muri St Famille, abana bazanye n'ababyeyi babo mu Misa ya Noheli
Umuhanzi akaba n’Umukirisitu mu Itorero rya Evangelical Restoration Church, Jean Christian Irimbere
Pasiteri Lydia Masasu yifatanyije n'abana bo muri ERC Masoro mu gusangira kuri Noheli
Umukirisitu mu Itorero rya ADEPR Nyarugenge, Nsabiyumva Emmanuel yavuze ko kwizihiza Noheli ari iby'agaciro ku bemera Kristu
Umushumba mu Itorero rya Pantekote mu Rwanda, Pasiteri Uwizeye Albert yasabye Abakirisitu kuzirikana impamvu yo kwizihiza Ivuka rya Yesu
Umushumba Mukuru w’Itorero Evangelical Restoration Church , Apôtre Joshua Masasu Ndagijimana yavuze ko kwizihiza Noheli ari iby'agaciro gakomeye ku Bakirisitu
Umushumba Mukuru w'Itorero Zion Temple Celebration Center ku Isi, Apôtre Dr Paul Gitwaza ku ruhimbi
Umushumba Mukuru w'Itorero Zion Temple Celebration Center ku Isi, Apôtre Dr Paul Gitwaza yagarutse ku mpamvu zo kwizihiza Noheli

Amafoto: Munyakuri Prince


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .