00:00:00 IGIHE NETWORK KN KINYARWANDA EN ENGLISH FR FRANCAIS

Uwasomye Korowani neza ntushobora kumubona mu dutsiko tw’iterabwoba-Mufti w’u Rwanda

Yanditswe na IGIHE
Kuya 15 May 2022 saa 05:30
Yasuwe :

Mufti w’u Rwanda, Sheikh Hitimana Salim yatangaje ko abakunze kwiyitirira idini ya Islam mu bikorwa by’iterabwoba n’ibindi bikorwa by’ubuhezanguni, ari abadasobanukiwa ibikubiye mu gitabo gitagatifu Korowani.

Yabitangaje kuri iki Cyumweru tariki 15 Gicurasi ubwo hasozwaga amarushanwa mpuzamahanga y’urubyiruko yo gusoma Korowani, yari amaze iminsi ine abera mu Rwanda.

Ni amarushanwa yitabiriwe n’urubyiruko rusaga 50 ruturutse mu bihugu 31 byo ku Mugabane wa Afurika.

Mufti Hitimana Salim yavuze ko gufata mu mutwe Korowani ari ingenzi cyane ku bayisilamu, kuko ibikubiyemo ariyo zingiro ry’imyemerere yabo n’imyitwarire myiza mu buzima bwabo bwa buri munsi.

Ati “Iki gitabo ni igitabo gitagatifu. Ni igitabo kituyobora nk’abayisilamu iyo ugisomye hari imigisha n’inema ugisangamo.”

Hirya no hino ku Isi hakunze kugaragara udutsiko n’imitwe ikora iterabwoba cyangwa ibindi bikorwa by’ubuhezanguni, ababikoze bakiyitirira kuba abayoboke b’idini ya Islam, bigahindanya isura y’idini.

Mufti Hitimana yavuze ko nta muyisilamu wasomye neza Korowani, ushobora kugaragara mu bikorwa by’iterabwoba.

Ati “Umuntu wasomye Korowani mu mutwe we no mu gituza cye, ntushobora kumubona muri turiya dutsiko. Abo mushobora kuba mubonamo cyangwa munumva, ni abaza bakihisha muri ubu butumwa bwiza no muri aya mahoro meza y’idini, bakayakoramo ibikorwa by’ubwangizi ariko abayisilamu bafashe igitabo gitagatifu mu mutwe, baba abantu beza bafitiye akamaro abandi.”

Uwineza Latifah, ni umwe mu bana b’Abanyarwanda bahatanye muri ayo marushanwa, aho yahembwe miliyoni 1 Frw.

Uyu mukobwa w’imyaka 19 wo mu karere ka Rwamagana, yavuze ko amaze imyaka itanu yiga Korowani, kandi yishimiye umusaruro w’ubumenyi yakuyemo.

Ati “Ubumenyi mfite nzabwifashisha nigisha abandi kugira ngo bagere aho ngeze. Kuyiga byagiye bimfasha kwitabira amarushanwa nk’aya kuko si ubwa mbere.”

Abanyarwanda batanu bari mu begukanye ibihembo muri aya marushanwa ngarukamwaka, ahuriza hamwe urubyiruko rutandukanye rwo mu Idini ya Islam.

Umwe mu bakemurampaka muri aya marushanwa
Abayisilamu bo mu bice bitandukanye bari baje gukurikirana isozwa ry'aya marushanwa
Abarushije abandi bahembwe mu byiciro bitandukanye
Isozwa ry'aya marushanwa ryari ryitabiriwe n'abarimo Mufti Hitimana Salim (uwa kabiri iburyo)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .