00:00:00 IGIHE NETWORK KN KINYARWANDA EN ENGLISH FR FRANCAIS

Volleyball: Green Park yegukanye igikombe mu mikino y’abakanyujijeho

Yanditswe na Iradukunda Olivier
Kuya 1 August 2022 saa 09:41
Yasuwe :

Imikino y’abakanyujijeho muri Volleyball mu Rwanda yateguwe mu rwego rwo kwishimira ibyo u Rwanda rwagezeho mu myaka 28 ishize u Rwanda rwibohoye yageze ku musozo wayo, aho amakipe amwe yabashije kwegukana intsinzi.

Iyi mikino yateguwe binyuze mu irushanwa ryiswe “Rwanda Re-birth Celebrations’’ bikozwe na Sosiyete ya East Gold.

Ku itariki ya 31 Nyakanga 2022 ni bwo ryari rigeze mu mikino ya nyuma yaryo muri Volleyball, yabereye mu Busanza. Amakipe atandatu ni yo yitabiriye.

Arimo Umucyo club, Relax volleyball club, Green Park, Gisenyi Active Volleyball Club, Kidumu Volleyball Club na Aigle Noir yari agabanyijemo amatsinda abiri aho amakipe ane ari yo yakinnye muri 1/2.

Muri icyo cyiciro Relax volleyball Club yakuyemo Umucyo Club kuri seti eshatu kuri imwe naho Green Park ikuramo Gisenyi Active Volleyball Club kuri seti eshatu ku busa.

Ku mukino wo guhatanira umwanya wa gatatu, Umucyo Club yihereranye Gisenyi Active Volleyball Club iyitsinda seti eshatu ku busa.

Mu mukino wabaye hari akavura gake katabangamiye abakinnyi wari ishiraniro ndetse n’ishyaka ryinshi rivanze no kutumvikana ku byemezo by’abasifuzi.

Amakipe yombi yanganyije seti ebyiri kuri ebyiri, hitabazwa iyanyuma yo gukemura impaka. Iki gice cyarangiye irushanwa ryegukanywe na Green Park kuri seti eshatu kuri ebyiri za Relax volleyball club.

Umuyobozi wa Green Park, Ngarambe Jean Paul avuga ko kuba batwaye igikombe gifite igisobanuro, bigaragaza ko imbaraga zakoreshejwe kugira ngo igihugu cyongere kibeho bagomba kwereka ba nyirazo ko zitapfuye ubusa.

Yongeyeho ko ari umwanya mwiza wo gukomeza kukibeshaho mu byiciro bitandukanye harimo no guteza imbere siporo.

Nshimiyimana Emmanuel uri mu bakunzi ba ruhago mu Rwanda akaba n’umwe mu bayobozi ba East Gold, yavuze ko kugira amarushanwa nk’aya bifasha Abanyarwanda kwishimira ko bongeye kubaho biciye muri Siporo.

Yagize ati “Turi kureba ko hari ikintu gishoboka dushobora kongeramo. Kuko uko tubibonye hari icyo tubagomba kandi cyinshi. Njye na bagenze banjye turarebera hamwe ibyo twazongeramo muri Rwanda Rebirth Celebration izajya iba buri mwaka.”

Muri aya marushanwa ya Rwanda Rebirth Celebration harimo ibyiciro bitandukanye. Muri byo harimo Football, Volleyball, Cycling na Basketball byose bizasozwa n’igitaramo cy’umuhanzi The Ben. Muri icyo gitaramo akaba ari naho abitwaye neza bazabonera ibihembo byabo.

Gisenyi Active Volleyball Club yebaye iya kane
Green Park niyo kipe izahemberwa mu gitaramo kizitabirwa na The Ben
Green Park yasezereye Gisenyi Active muri kimwe cya kabiri
Kuri President wa Green Park, intsinzi babonye ni ikimenyetso cyo kongera kubaho kw'igihugu
Iyi ni imikino ibamo guhuza urugwiro hagati y'abahanganye
Matic uri mu bayobozi ba EastGold yavuze ko hari umwenda bafitiye abakunzi babo
Kutemera ibyemezo by'abasifuzi biri mu byaranze umukino wa nyuma
Nubwo bwari bwije ntibyabujije abakinnyi ba Green Park kugera ku ntsinzi yabo
Relax Volleyball Club yegukanye umwanya wa kabiri
Umucyo Club yegukanye umwanya wa gatatu itsinze Gisenyi Active Volleyball Club
Umukinnyi wa Green Park 'Nyamasheke' yayifashije kugera ku gikombe

Amafoto:Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .