Volleyball: Amakipe 13 agiye guhatanira Igikombe cy’Intwari 2020

Yanditswe na Eric Tony Ukurikiyimfura
Kuya 24 Mutarama 2020 saa 07:44
Yasuwe :
0 0

Ishyirahamwe Nyarwanda ry’Umukino wa Volleyball (FRVB), ryatangaje ko Igikombe cy’Intwari cy’uyu mwaka kizitabirwa n’amakipe atandatu y’abagabo akina mu cyiciro cya Mbere (Serie A) n’arindwi y’abagore.

Iri rushanwa ryateguwe na FRVB ku bufatanye n’Urwego rw’Igihugu rushinzwe Intwari, Imidali n’Impeta by’Ishimwe (CHENO), rizaba mu minsi itatu.

Amakipe azaryitabira mu bagabo, yagabanyijwe mu matsinda abiri, aho irya mbere ririmo REG, UTB na Kirehe VC, naho irya kabiri ririmo Gisagara, APR VC na RP-IPRC Ngoma.

Mu bagore, itsinda rya mbere ririmo UTB, KVC na Ruhango mu gihe irya kabiri rigizwe na RRA, APR WVC, IPRC Kigali na IPRC Huye.

Umunyamabanga Mukuru wa FRVB, Mfashimana Adalbert, yavuze ko uyu mwaka habayemo impinduka ntoya, aho hazakinwa umwanya wa nyuma gusa.

Yagize ati “Uyu mwaka impinduka zihari ni uko tutazakina umwanya gatatu kubera igihe, hazakinwa umukino wa nyuma gusa, tuzakurikiza amanota. Tuzakinira kuri Petit Stade n’ibibuga byo hanze. Imikino izishyurwa ni izabera muri Petit Stade.”

“Ni irushanwa rigamije gushishikariza urubyiruko binyuze muri Siporo ko rugomba guharanira kuba intwari z’igihugu nk’uko ababyeyi bacu, abakurambere bacu batahwemye kubiduhamo urugero.”

Rwaka Nicolas ushinzwe Ubushakashatsi muri CHENO, yavuze ko iri rushanwa hari urwego rimaze kugeraho cyane ku rwego rw’ubwitabire bw’Abanyarwanda.

Ati “Ni ku nshuro ya gatatu rigiye gukinwa, riri kugenda ritera intera ndende mu kuritegura. Icyo twishimira ni uko tubona impinduka mu buryo abantu baryitabira kandi bararyishimiye cyane. Imikino yose twagezemo kandi bimeze neza.”

Umunsi wa mbere urakinwa kuri uyu wa Gatandatu tariki ya 25 Mutarama 2020, uwa kabiri ukinwe bucyeye bwaho mu gihe irushanwa rizasozwa tariki ya 1 Gashyantare 2020.

Ikipe ya mbere muri buri cyiciro izahabwa ibihumbi 300 Frw, iya kabiri ibihumbi 200 Frw mu gihe iya gatatu izahabwa ibihumbi 100 Frw.

Amakipe yose azakinisha abakinnyi asanzwe akoresha muri shampiyona gusa ndetse abanyamahanga bemewe ku mukino ni babiri.

Gahunda y’umunsi wa mbere uzakinwa ku wa Gatandatu tariki ya 25 Mutarama 2020 muri Petit Stade

  • IPRC Huye vs IPRC Kigali (Abagore; 12:00)
  • UTB VC vs KVC (Abagore; 12:00)
  • RRA VC vs APR WVC (Abagore, 14:00)
  • Kirehe VC vs REG VC (Abagabo, 16:00)
  • Gisagara VC vs IPRC Ngoma (Abagabo, 18:00)
  • UTB VC vs REG VC (Abagabo, 20:00)
UTB na REG VC zizisobanura ku munsi wa mbere ukinwa kuri uyu wa Gatandatu
Rwaka Nicolas ushinzwe ubushakashatsi mu Rwego rw'Igihugu rushinzwe Intwari z'Igihugu, Imidari n'Impeta by'Ishimwe (CHENO)
Umunyamabanga Mukuru wa FRVB, Mfashimana Adalbert asobanura uburyo irushanwa rizakinwa
Irushanwa ry'Ubutwari 2020 muri Volleyball rizakinwa iminsi itatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza