UTB VC yegukanye igikombe cy’Intwari 2020 mu bagabo n’abagore

Yanditswe na Eric Tony Ukurikiyimfura
Kuya 2 Gashyantare 2020 saa 07:42
Yasuwe :
0 0

Amakipe ya Kaminuza ya UTB haba mu bagabo no mu bagore, ni yo yegukanye ibikombe mu irushanwa ry’Intwari 2020, ryabaga ku nshuro ya gatatu mu mukino wa Volleyball, aho ryasojwe kuri uyu wa Gatandatu tariki ya 1 Gashyantare muri Petit Stade i Remera.

Wari umunsi wa gatatu ari na wo wa nyuma wabayeho imikino ya ½ n’iya nyuma isoza iri rushanwa riyitiriwe Intwari z’igihugu zizirikanwa tariki ya 1 Gashyantare, aho insanganyamatsiko y’uyu mwaka igira iti “Ubutwari mu Banyarwanda, agaciro kacu.”

Mu cyiciro cy’abagore, UTB yageze ku mukino wa nyuma imaze gutsinda RRA VC amaseti 3-0 mu gihe ikipe ya APR WVC yatsinze KVC amaseti 3-0.

UTB yisubije iri rushanwa yaherukaga kwegukana mu mwaka ushize, ni nyuma y’uko yatsinze APR WVC amaseti 3-0 (26-24, 25-16, 28-26) ku mukino wa nyuma.

Nyuma y’uyu mukino hakurikiyeho umukino wa nyuma mu bagabo, wahuje UTB VC na REG VC.

Ikipe ya UTB yageze ku mukino wa nyuma imaze gutsinda Gisagara VC muri ½ mu gihe REG VC yasezereye APR VC.

Mu mukino wari ishiraniro ku mpande zombi, UTB VC na yo yisubije iri rushanwa nyuma yo kwihererana REG VC ikayitsinda amaseti 3-1 (25-20, 25-19, 14-25, 25-22).

Mu bihembo byatanzwe mu bagore, UTB VC yabaye iya mbere, APR WVC yabaye iya kabiri na KVC yabaye iya gatatu hagendewe ku manota, zahawe ibihumbi 300 Frw, ibihumbi 200 Frw n’ibihumbi 100 Frw uko zikurikirana.

Mu bagabo nabo bahawe amafaranga nk’aya, hahembwe UTB VC, REG VC na APR VC yabaye iya gatatu.

UTB VC mu bagabo yari yiteguye guhagarara ku gikombe iheruka kwegukana
Abakinnyi bitabajwe ku ruhande rwa REG VC
UTB na REG VC ni amakipe yo muri Kigali asigaye ahanganye muri Volleyball
Abakinnyi ba UTB VC bishimira gukora inota
Umunyamabanga uhoraho muri Minisiteri ya Siporo, Shema Maboko Didier (ibumoso) ni umwe mu bitabiriye isozwa ry'iyi mikino muri Volleyball
Umuyobozi w'Urwego rushinzwe Intwari z'igihugu, imidali n'impeta by'ishimwe ( CHENO), Dr Pierre Damien Habumuremyi (ibumoso) na we yarebye iyi mikino
Umutoza wa REG VC, Mugisha Benon atanga amabwiriza ku bakinnyi be
Umutoza wa UTB VC, Nyirimana Fidele
UTB yisubije irushanwa ry'Intwari mu bagore
Ikipe ya UTB y'abagabo na yo yongeye kwegukana iri rushanwa ry'Intwari

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza