UTB, REG na Gisagara VC zatangiye neza muri Shampiyona (Amafoto)

Yanditswe na Eric Tony Ukurikiyimfura
Kuya 10 Ugushyingo 2019 saa 01:14
Yasuwe :
0 0

Amakipe akomeye arimo na REG VC ifite igikombe giheruka, yatangiye neza umwaka mushya wa Shampiyona y’icyiciro cya mbere muri Volleyball (Serie A), yatangiye kuri uyu wa Gatandatu, hakinwa imikino itatu.

Mu mukino wabareye i Ngoma mu Burasirazuba, UTB VC yakuye intsinzi igoranye imbere ya IPRC Ngoma yari yayakiriye, iyitsinda amaseti 3-2.

UTB yatsinze iseti ya mbere ku manota 25-19 ndetse n’iya kabiri kuri 25-17. IPRC Ngoma yatsinze amaseti abiri yakurikiyeho ku manota 25-21 na 25-22 mu gihe hitabajwe iseti ya gatanu (seoul) yatsinzwe na UTB VC ku manota 15-9.

Umutoza mukuru wa UTB VC, Nyirimana Fidèle, yavuze ko yishimiye uko uyu mukino wagenze ndetse yemeza ko uburyo butandukanye yagerageje bwatumye ikipe ye yishyurwa amaseti yari yatsinze.

Ati” Ni umukino mwiza kuri njyewe nk’umutoza kuko nagerageje ibintu byose nari mfite mu mutwe, buriya hari ibyo mbonye bishoboka n’ibidashoboka. Ikipe nayigiragaho uko ngomba kuyitwara, hari ibyo nagerageje biranga batwishyura amaseti abiri twari twatsinze.”

Ku ruhande rwa IPRC Ngoma, umutoza wayo Serugo Christophe, yavuze ko mu byatumye ikipe ye itakaza uyu mukino harimo kuba yakinnye idafite abakinnyi babiri basanzwe babanzamo.

Ati” Ni umukino wari ukomeye, ariko ibintu byose birashoboka. Icyatumye dutakaza umukino ni uko twari tudafite abakinnyi bavunitse, gutakaza abakinnyi babiri babanzamo muri Volleyball bikugiraho ingaruka cyane. Ubutaha amakosa yagaragaye tuzayakosora.”

Mu yindi mikino yabaye, Kirehe VC yatsinzwe na Gisagara VC amaseti 3-0 (17-25, 32-24 na 20-25).

REG VC yatwaye Shampiyona y’umwaka ushize w’imikino, yari yakiriye APR VC mu mukino wabereye muri Petit Stade i Remera, iyitsinda amaseti 3-0 (26-24, 25-20 na 25-21).

Murangwa Nelson yakinnye umukino wa mbere muri UTB VC
Niyogisubizo Samuel 'Tyson' asubiza umupira mu kibuga
Muhire Christian wa IPRC Ngoma ategereje ko umupira ugera mu kibuga cy'ikipe ye
IPRC Ngoma yaturutse inyuma, yishyura amaseti abiri yari yabanje gutsindwa na UTB VC
Manu na Sibomana bakinira UTB VC, basuhuzanya
Umukino wari witabiriwe n'abatari bake
Ikipe ya IPRC Ngoma VC
UTB VC yatangiye neza Shampiyona
Umutoza wa IPRC Ngoma, Serugo Christophe
Umutoza wa UTB Nyirimana Fidele yitegereza uko abakinnyi be bitwara
Karera Emile Dada wa UTB VC mu kirere atera umupira
IPRC Ngoma yari isihyigikiwe n'abatari bake
Abatoza ba UTB VC

Amafoto: Nuwamanya Amon B.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .