U Rwanda rwizeye gutsinda Misiri bahataniye itike y’imikino Paralempike izabera i Tokyo

Yanditswe na Eric Tony Ukurikiyimfura
Kuya 17 Nzeri 2019 saa 01:23
Yasuwe :
0 0

Ikipe y’u Rwanda y’abagore irisobanura n’iya Misiri ku mukino wa nyuma wa Shampiyona Nyafurika y’Abafite Ubumuga ya Sitting Volleyball iri kubera i Kigali muri Petit Stade i Remera, ni nyuma y’uko amakipe yombi akurikiranye mu myanya ibiri ya mbere mu cyiciro cy’abagore.

Muri iyi Shampiyona nyafurika hitabiriye amakipe atatu mu bagore ari yo u Rwanda, Kenya na Misiri mu gihe Zimbabwe yikuyemo ku munota wa nyuma.

Ibi byatumye uburyo irushanwa ryari gukinwamo buhinduka maze hemezwa ko amakipe atatu yitabiriye azahura hagati yayo (round robin) mu mikino ibanza n’iyo kwishyura noneho abiri ya mbere akazakina umukino wa nyuma.

U Rwanda rwaraye rutsinze Misiri amaseti 3-1 (25-15, 25-13, 21-25 na 25-22) mu mukino warwo wa kane wabaye wabaye kuri uyu wa Mbere, ruyobora n’amanota 12, Misiri igumana amanota atandatu yakuye mu mikino ibiri yatsinzemo Kenya mu gihe iki gihugu cyo kiraza guhabwa umudali w’Umuringa nubwo nta mukino cyatsinzwe.

Uyu mukino wa nyuma urabera muri Petit Stade i Remera guhera saa 17:00 ndetse ni ku nshuro ya kabiri ibihugu byombi byongeye kuwuhuriraho nyuma y’uko u Rwanda rutwaye umudali wa Zahabu n’Igikombe mu 2017, rutsinze Misiri amaseti 3-0.

Abajijwe niba nta mpungenge afite ko Misiri ishobora gutungura u Rwanda kuri iyi nshuro, umutoza w’u Rwanda, Mossad Rashad Elaiuty ukomoka mu Misiri ndetse wayitozaga mu 2017, yavuze ko uyu mwaka yaje ikomeye ariko bazi uko ikina.

Ati” Ikipe bari bafite mu 2017 yarahindutse, abakinnyi bane gusa nibo bagarutsemo. Ni ikipe yazamuye urwego cyane ku mipira ya mbere. Hari amakosa bagifite, twagiye tuyabona kandi ni yo tuzagenderaho twongera kubatsinda.”

Kapiteni w’u Rwanda, Mukobwankawe Liliane yavuze ko imikino ine bakinnye yabafashije gukosora amakosa menshi bakoraga, aho bizeye ko umukino wo kuri uyu wa Kabiri na wo baza kuwutsinda.

Ati” Umukino wo kuri uyu wa Kabiri uzaba ukomeye kuko ni uwa nyuma kandi dutsinzwe gato badutwara igikombe. Abakinnyi babo tumaze kubamenya, tugiye kubigaho kugira ngo batongera kutugora.”

Iri rushanwa rizahita rikurikirwa n’iry’abagabo rizatangira kuri uyu wa Gatatu tariki ya 18 Nzeri, risozwe tariki ya 22 Nzeri 2019.

Amakipe y’abagabo azitabira iri rushanwa ni u Rwanda, Algérie, Misiri, Kenya, Maroc na Afurika y’Epfo.

Ikipe ya mbere mu bagabo n’iya mbere mu bagore ni zo zizabona itike yo gukina imikino Paralempike izabera i Tokyo mu Buyapani “2020 Summer Paralympics” tariki 25 Kanama kugeza 6 Nzeri 2020.

U Rwanda rwatsinze Misiri mu mikino ibiri imaze guhuza amakipe yombi muri iri rushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza