U Rwanda rwatsinze Misiri muri Shampiyona Nyafurika y’abafite ubumuga rwizera gukina umukino wa nyuma

Yanditswe na Eric Tony Ukurikiyimfura
Kuya 16 Nzeri 2019 saa 08:09
Yasuwe :
0 0

Ikipe y’u Rwanda y’abagore yizeye gukina umukino wa nyuma muri Shampiyona Nyafurika y’Abafite Ubumuga ya Sitting Volleyball iri kubera i Kigali muri Petit Stade i Remera, ni nyuma y’uko itsinze umukino wa kabiri yahuyemo n’iya Misiri amaseti 3-1 (26-24, 15-25, 25-22 na 25-20) kuri iki Cyumweru.

U Rwanda rwari rwabanje gutsinda Kenya amaseti 3-0 (25-8, 25-17, 25-21) mu mukino wa mbere wabaye mu gitondo.

Nyuma yo gutangiza iri rushanwa ku mugaragaro nimugoroba, u Rwanda rwahuye na Misiri mu mukino wari ukomeye dore ko amakipe yombi ari yo yahuriye ku mukino wa nyuma mu 2017, u Rwanda rugatsinda amaseti 3-0.

Misiri yagoye bikomeye ikipe y’u Rwanda ariko itsindwa iseti ya mbere ku manota 26-24 mu gihe iya kabiri yatsinzwe n’aba barabukazi ku manota 25-15.

Ikipe y’u Rwanda itozwa n’Umunya-Misiri Mossad Rashad Elaiuty wungirijwe na Gakwaya Eric, yatsinze iseti ya gatatu ku manota 25-22 ndetse n’iya nyuma kuri 25-20 maze yizera kuzakina umukino wa nyuma uteganyijwe kuri uyu wa Kabiri.

Undi mukino wabaye kuri iki Cyumweru, warangiye Misiri itsinze Kenya amaseti 3-0 (25-22, 25-23 na 25-17).

Imikino irakomeza kuri uyu wa Mbere, aho aya makipe yose yongera guhura hagati yayo mu gisa n’imikino yo kwishyura.

U Rwanda rurakina na Kenya saa 09:00, Misiri ikine na Kenya saa 14:00 mu gihe umukino uheruka iy’uyu munsi ari uhuza u Rwanda na Misiri saa 19:00.

Amakipe abiri ya mbere azaba afite amanota menshi, azahurira ku mukino wa nyuma kuri uyu wa Kabiri.

Kapiteni w’u Rwanda, Mukobwankawe Liliane yavuze ko bagowe no kuba Misiri yarahindutse ndetse ikazamura n’urwego rwayo.

Ati” Batugoye cyane kuko bazamuye urwego cyane. Icyatugoye ni ugufata umupira wa mbere kuko ntabwo twari tuzi uko bakina, barahindutse ugereranyije n’ikipe twaherukaga gukina nayo.”

Umutoza w’u Rwanda, Mossad Rashad Elaiuty yavuze ko gutsinda imikino ibiri kuri iki Cyumweru byatumuye batangira gutekereza umukino wa nyuma uzabahuza na Misiri kuri uyu wa Kabiri.

Perezida wa NPC Rwanda, Murema Jean Baptiste yashimiye abanyarwanda bakomeje kuba inyuma y’ikipe y’igihugu, abasaba gukomeza kuyishigikira.

Iri rushanwa rizasozwa ku wa Kabiri tariki ya 17 Nzeri hakinwa umukino wa nyuma mu gihe hazahita haba iry’abagabo rizatangira tariki ya 18 Nzeri, risozwe tariki ya 22 Nzeri 2019.

Amakipe y’abagabo azitabira iri rushanwa ni u Rwanda, Algérie, Misiri, Kenya, Maroc na Afurika y’Epfo.

Ikipe ya mbere mu bagabo n’iya mbere mu bagore ni zo zizabona itike yo gukina imikino Paralempike izabera i Tokyo mu Buyapani “2020 Summer Paralympics” tariki 25 Kanama kugeza 6 Nzeri 2020.

Abafana b'amakipe atandukanye bafatanyije kuba inyuma y'ikipe y'u Rwanda y'abagore ya Sitting Volleyball
Abanyarwanda batari bake barebye umukino w'u Rwanda na Misiri
U Rwanda rwagowe n'imipira ya mbere yaterwaga n'abanya-Misiri
Abanyarwandakazi bishimira inota bari bamaze gutsinda Misiri
Perezuda wa NPC Rwanda yashimiye abanyarwanda baje kuba inyuma y'ikipe y'igihugu, abasaba kuzaza ari benshi kuri uyu wa Kabiri
Ikipe y'u Rwanda itozwa n'Umunya-Misiri Mossad Rashad Elaiuty
Byitezwe ko umukino wa nyuma uzahuza Misiri n'u Rwanda kuri uyu wa Kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza