Sitting Volleyball: U Rwanda rwatangiye rutsinda Kenya muri Shampiyona Nyafurika y’abagabo

Yanditswe na Eric Tony Ukurikiyimfura
Kuya 20 Nzeri 2019 saa 11:39
Yasuwe :
0 0

Ikipe y’Igihugu y’Abagabo y’Umukino wa Sitting Volleyball yatangiye neza muri Shampiyona Nyafurika y’abafite ubumuga iri kubera i Kigali muri Petit Stade i Remera, itsinda iya Kenya amaseti 3-2 mu mukino wabaye kuri uyu wa Kane.

Ejo hashize ni bwo hatangiye irushanwa ry’abagabo nyuma y’uko iry’abagore risojwe ku wa Kabiri, u Rwanda rwegukana igikombe.

Iri rushanwa ryitabiriwe n’ibihugu bitandatu aho u Rwanda ruri mu itsinda A hamwe na Kenya na Maroc mu gihe itsinda B rigizwe na Algérie, Misiri na Afurika y’Epfo.

Nyuma y’umuhango wo gufungura ku mugaragaro iri rushanwa, ni bwo habaye umukino wahuje Ikipe y’u Rwanda y’Abagabo n’iya Kenya.

Kenya yatsinze iseti ya mbere u Rwanda rufite amanota 17, u Rwanda rutsinda iya kabiri kuri 18 ya Kenya ndetse n’iya gatatu mu buryo bugoranye ku manota 28-26.

Kenya yongeye kugora ikipe y’u Rwanda mu iseti ya kane ndetse iyitsinda ku manota 25-19, biba ngombwa ko hitabazwa iseti ya kamarampaka (seoul), yatsinzwe n’u Rwanda ku manota 15-9.

Ikipe y’u Rwanda irasubira mu kibuga kuri uyu wa Gatanu saa 18:00, yisobanura n’iya Maroc.

Umukino wabimburiye indi yose yo mu cyiciro cy’abagabo kuri uyu wa Kane, Misiri yatsinze Afurika y’Epfo amaseti 3-0 (25-9, 25-10 na 25-12).

Algérie iracakirana na Afurika y’Epfo kuri uyu wa Gatanu guhera saa 10:00 mu gihe guhera saa 16:00 haba umukino uhuza Misiri na Algérie.

Nk’uko byagenze mu bagore, ikipe ya mbere izahabwa igikombe n’itike yo kuzahagararira Afurika mu mikino Paralympique izabera i Tokyo mu Buyapani mu mpeshyi yo mu 2020. Izaba kuva tariki 25 Kanama kugeza ku wa 6 Nzeri 2020.

Ikipe y'u Rwanda y'abagabo ya Sitting Volleyball
Kenya yagoye u Rwanda mu mukino wabaye kuri uyu wa Kane nimugoroba
U Rwanda rwatahanye intsinzi nyuma yo kwitabaza iseti ya kamarampaka
Umutoza w'u Rwanda, Umunya-Misiri Mossad Rashad Elaiuty

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza