Ruterana yatorewe kuyobora Zone V y’ibihugu 12

Yanditswe na Eric Tony Ukurikiyimfura
Kuya 26 Ukwakira 2020 saa 10:30
Yasuwe :
0 0

Visi Perezida wa kabiri w’Ishyirahamwe rya Volleyball mu Rwanda (FRVB), Ruterana Fernand Sauveur, yatorewe kuyobora Impuzamashyirahamwe y’Umukino wa Volleyball mu karere ka gatanu (Zone V) igizwe n’ibihugu 12.

Ruterana yatorewe uyu mwanya mu matora y’Impuzamashyirahamwe ya Volleyball muri Afurika (CAVB) yabaye hifashishijwe ikoranabuhanga mu ijoro ryakeye.

Impuzamashyirahamwe y’Umukino wa Volleyball mu karere ka gatanu (Zone V) yari imaze imyaka itatu iyobowe n’undi Munyarwanda, Nkurunziza Gustave, watorewe kuyiyobora mu gihe cy’imyaka ibiri n’igice, muri Nyakanga 2017, asimbuye Umurundi Rwakiranyi Louis.

Ruterana Fernand Sauveur yatowe ku majwi ane ku 10 (angana na 40%), atsinda Nkurunziza Gustave wari watanzwe na Tanzania, we wagize 30% ndetse na Omer Alhag Mohamed Alhag wo muri Sudani, na we wagize 30%.

Nkurunziza yiyamamaje nk’Umunya-Tanzania nyuma y’uko yifuje kongera kwiyamamariza uyu mwanya mu gihe Ruterana Fernand Sauveur usanzwe ari Visi Perezida wa kabiri wa FRVB, ari we wemejwe nk’umukandida uzahagararira u Rwanda muri aya matora.

Rimwe mu matekego ya CAVB agenga amatora y’abayobozi b’iyi Mpuzamashyirahamwe, rivuga ko abari bagize Komite Nyobozi ya CAVB, bemerewe kongera kwiyamamaza bidasabye ko byemezwa n’amashyirahamwe y’ibihugu bakomokamo (bivuze ko FRVB yashoboraga kureka Nkurunziza Gustave akiyamamaza nk’Umunyarwanda).

Rikomeza rivuga ko mu gihe Ishyirahamwe riturukamo uwari Umuyobozi muri CAVB, ritanze undi mukandida, uwo ari we wemererwa kwiyamamaza ( aha bivuze ko Ruterana ari we watanzwe na FRVB, Nkurunziza atemerewe kwiyamamaza agahitamo gusaba gutangwa na Tanzania).

Akarere ka gatanu muri Volleyball kagizwe n’ibihugu 12 ari byo; u Rwanda, Misiri, Kenya, Uganda, Sudani, Sudani y’Epfo, Ethiopie, Djibouti, Erythrée, u Burundi, Tanzania na Somalia.

Umunya-Maroc Bouchra Hajij ni we watorewe kuyobora Impuzamashyirahamwe ya Volleyball ku mugabane wa Afurika (CAVB) mu myaka ine iri imbere, asimbuye Dr Amr Elwani wari kuri uyu mwanya kuva mu 2011.

Ruterana Fernand Sauveur yatorewe kuyobora CAVB/ Zone V ku majwi 40%
Ruterana asanzwe ari Visi Perezida wa kabiri w’Ishyirahamwe rya Volleyball mu Rwanda (FRVB)
Nkurunziza Gustave wari usanzwe uyobora CAVB/ Zone V, yari yiyamamaje ahagarariye Tanzania
Umunya-Maroc Bouchra Hajij yatorewe kuyobora CAVB

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .