REG VC yihaye intego yo gusoreza mu makipe ane ya mbere muri Shampiyona Nyafurika (Amafoto)

Yanditswe na Eric Tony Ukurikiyimfura
Kuya 14 Mata 2021 saa 09:38
Yasuwe :
0 0

Ikipe ya Volleyball ya Sosiyete y’Igihugu ishinzwe Ingufu (REG VC), yiyemeje kuzatahana umwanya wa kane muri Shampiyona Nyafurika “CAVB Men’s African Volleyball Clubs Championship 2021” izabera i Sousse muri Tunisia kuva tariki ya 16 kugeza ku wa 28 Mata 2021.

REG VC igiye kwitabira iri rushanwa rihuza amakipe yatwaye ibikombe iwayo ku nshuro ya mbere, irahaguruka mu Rwanda n’indege ya Turkish Airlines saa kumi zo mu rukerera rwo ku wa Kane tariki ya 15 Mata 2021.

Mu kiganiro n’abanyamakuru cyabaye kuri uyu wa Gatatu, Umuyobozi wayo, Zawadi Geoffrey, yavuze ko bajyanye intego yo gusoreza mu makipe ane ya mbere ndetse bakoze ibishoboka byose kugira ngo ikipe izitware neza nyuma yo kwitegura ukwezi kose.

Ati “Intego twihaye nk’ikipe isohotse bwa mbere ariko ikomeye, ni uko twaba mu makipe ane ya mbere muri Afurika kandi bikunze urugendo rwaba rwagenze neza, ni cyo twiyemeje, ni cyo tugiye guhatanira. N’igikombe birashoboka, tutakibonye tukaza muri ayo makipe ane ya mbere twaba tunyuzwe.”

Yakomeje agira ati “Abanyarwanda bizere ko tugiye kubahagararira neza, tugiye turi ikipe y’abasore bakiri bato bashoboye. Nakwizeza Abanyarwanda ko tugiye guhatana, tutagiye kwitabira, izina ry’u Rwanda tuzarizamura mu bushobozi tujyanye.”

Mu rwego rwo kwitegura neza, ikipe ya REG VC yakinnye imikino itatu ya gicuti n’ikipe ya APR VC na yo izitabira iyi mikino Nyafurika. REG VC yitwaye neza, iyitsinda yose ku maseti 3-0, 3-1 na 3-1.

Umutoza Mugisha Benon yavuze ko imyiteguro bagize irimo n’iyo mikino ya gicuti, yabafashije gutuma abakinnyi bagaruka ku rwego rwo gukina.

Ati “Byadufashije kugira ngo abakinnyi bose bagaruke mu mwuka wo gukina kuko twari tumaze igihe kirekire [tudakina] kandi byagaragaye mu mikino ya gicuti.”

Abajijwe ku bakinnyi barimo Akumuntu Kavalo Patrick, Ntagengwa Olivier, Niyogisubizo Samuel “Tyson” (ba UTB VC) na Ndayisaba Sylvestre (Gisagara VC), bose batiwe mu yandi makipe, Mugisha Benon yavuze ko ari abakinnyi bitezeho kubafasha.

Ati “Bari hejuru cyane ni cyo cyatumye tubazana mu ikipe yacu kugira ngo badufashe kandi icyo baracyakidufashamo, hamwe n’abandi bose bizadufasha.”

Kapiteni wa REG VC, Dusabimana Vincent, ufite ubunararibonye bwo gukina iyi mikino, yavuze ko we na bagenzi be biyemeje kuzitwara neza.

Itsinda ry’abakinnyi 23 ryerekeza i Sousse ririmo nka Dusabimana Vincent, Twagirayesu Peacemaker, Tuyizere Jean Baptiste, Twagirayezu Emmy, Sibomana Jean Paul, Ndayisaba Sylvestre, Rwigema Simeon, Niyonkuru Gloire, Ngabo Romeo, Kwizera Eric, Ongom Bob Ivan, Akumuntu Kavalo Patrick, Ntagengwa Olivier na Niyogisubizo Samuel “Tyson”.

Itsinda ry’abatoza rigizwe na Mugisha Benon nk’umutoza mukuru, Mbonyuwontuma Jean Luc na Iradukunda Pacifique.

Abandi bajyana n’ikipe harimo umuganga, Rusika Emmanuel, Zawadi Geoffrey (Perezida wa REG VC), Mbonera Michel (Visi Perezida), Ndabikunze Robert (Team Manger), Shema Innocent (Ushinzwe amakuru) na Nsanzamahoro Faustin (Umusifuzi).

Habaye ikiganiro n'abanyamakuru amasaha nmake mbere y'uko REG VC yerekeza i Sousse muri Tunisia
Zawadi Geoffrey uyobora REG VC, yavuze ko bajyanye intego yo gusoreza mu makipe ane ya mbere muri Shampiyona Nyafurika
Umutoza Mugisha Benon afitiye icyizere ikipe ajyanye muri Tunisia
Kapiteni wa REG VC, Dusabimana Vincent 'Gasongo' yavuze ko nk'abakinnyi biyemeje kwitwara neza
Visi Perezida wa REG VC, Mbonera Michel
REG VC yatsinze imikino itatu ya gicuti yahuyemo na APR VC
Umuyobozi Mukuru wa REG, Eng. Ron Weiss, yasuye iyi kipe yitegura kujya muri Tunisia

Amafoto: Shema Innocent /REG


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .