Nkurunziza Gustave yashinje abayobozi ba FRVB guhimba amategeko ya baringa ku bw’inyungu za bamwe

Yanditswe na Eric Tony Ukurikiyimfura
Kuya 10 Ukuboza 2019 saa 03:19
Yasuwe :
0 0

Perezida w’Impuzamashyirahamwe y’Umukino wa Volleyball mu karere ka gatanu, Nkurunziza Gustave, yashinje Ishyirahamwe Nyarwanda ry’uyu mukino guhimba amategeko ya baringa kugira ngo rimubuze kongera kwiyamamariza uyu mwanya.

Muri Nyakanga 2017 nibwo Nkurunziza Gustave yatorewe kuyobora CAB/ Zone V mu gihe cy’imyaka ibiri n’igice, aho yasimbuye Umurundi Rwakiranyi Louis.

Uyu mugabo ari mu bifuzaga kongera kwiyamamariza uyu mwanya mu gihe Ruterana Fernand Sauveur usanzwe ari Visi Perezida wa kabiri wa FRVB, ari we wemejwe nk’umukandida uzahagararira u Rwanda muri aya matora.

Nkurunziza Gustave avuga ko FRVB yifashishije amategeko ya baringa kugira ngo imwangire kongera kwiyamamaza.

Ati’’ Gushaka guhindura umukandika ni izindi mpamvu, si uko uwari usanzweho hari icyo bamunengaga. Niyo mpamvu banifashisha amategeko atariho, ntekereza ko twakagombye kuba tuvuga ngo iryo tegeko rishobora kuba ryarahimbwe na FRVB kugira ngo ishobore gusobanurira abayumva impamvu yatanze Ruterana Fernand.’’

Umunyamabanga Mukuru wa FRVB, Mfashimana Adalbert, avuga ko impamvu bahisemo gutanga Ruterana Fernand ari uko Nkurunziza Gustave, atujuje ibisabwa kugira ngo yongere kwiyamamaza.

Ati ’’Icya mbere ni uko bombi banganyaga, bose ni abanyamuryango ba FRVB, ni Abanyarwanda kandi bakunda Volleyball. Icya kabiri, kuba Gustave yari Perezida wa CAVB/ Zone V, ntabwo byamuhaga uburenganzira busesuye bwo guhita akomezayo.’’

"Icya gatatu, ni uko hari ibyo abiyamamaza bagomba kuba bujuje, birimo kuba uwo Ishyirahamwe ritangamo umukandida agomba kuba nibura ari muri rumwe mu rwego rwa Federasiyo mu mwaka ubanziriza amatora. Twabyizeho dusanga Gustave, ntaho agaragara mu nzego za FRVB n’amakipe, twohereza Ruterana.’’

Mu kwezi gushize, Nkurunziza Gustave yavuze ko ari we wasabye ko yatangwa nk’umukandida mbere, bityo nta wundi wagombaga kwemezwa atari we.

Rimwe mu matekego ya CAVB agenga amatora y’abayobozi b’iyi Mpuzamashyirahamwe, rivuga ko abari bagize Komite Nyobozi ya CAVB, bemerewe kongera kwiyamamaza bidasabye ko byemezwa n’amashyirahamwe y’ibihugu bakomokamo (bivuze ko FRVB yashoboraga kureka Nkurunziza Gustave akiyamamaza).

Rikomeza rivuga ko mu gihe Ishyirahamwe riturukamo uwari Umuyobozi muri CAVB, ritanze undi mukandida, uwo ari we wemererwa kwiyamamaza ( aha bivuze ko Ruterana ari we watanzwe na FRVB, Nkurunziza atemerewe kwiyamamaza).

Akarere ka gatanu muri Volleyball kagizwe n’ibihugu 12 ari byo; u Rwanda, Misiri, Kenya, Uganda, Sudani, Sudani y’Epfo, Ethiopie, Djibouti, Erythrée, u Burundi, Tanzania na Somalia.

Uretse gutanga Ruterana Fernand nk’umukandida uziyamamariza kuyobora CAVB Zone V, FRVB yatanze kandi Perezida wayo, Karekezi Léandre nk’uziyamamariza kujya muri Komisiyo zigize iyi Mpuzamashyirahamwe ya Volleyball ku mugabane wa Afurika.

Perezida wa Zone V, Nkurunziza Gustave, asanga FRVB yarakoresheje amategeko yahimbye kugira ngo imubuze kongera kwiyamamaza
Ruterana Fernand usanzwe ari Visi Perezida wa kabiri wa FRVB, ni we watanzwe nk'umukandida muri CAVB
Perezida wa FRVB, Karekezi Léandre aziyamamariza kujya muri Komisiyo za CAVB

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .