Kuva kwa Petit Stade Amahoro byatumye umukino wa REG na APR VC utarangira

Yanditswe na Eric Tony Ukurikiyimfura
Kuya 29 Ukwakira 2020 saa 11:00
Yasuwe :
0 0

Umukino w’umunsi wa kabiri wa playoffs isoza Shampiyona y’Icyiciro cya Mbere ya Volleyball mu bagabo, wahuje APR VC na REG VC kuri uyu wa Kane, ntiwarangiye kubera imvura nyinshi yaguye ikibuga cya Petit Stade Amahoro i Remera kikuzura amazi.

Shampiyona ya Volleyball yari yarahagaritswe guhera muri Werurwe kubera COVID-19, yasubukuwe ku wa Gatatu, hakinwa Playoffs hagati ya tariki ya 28 n’iya 31 Ukwakira 2020.

Ku munsi wa kabiri w’iyi mikino yahuje amakipe ane ya mbere muri buri cyiciro, umwe mu mikino yari yitezwe ni uwahuje APR VC yari yatangiye itsinda UTB VC na REG VC, yo yari yatsinzwe na Gisagara VC ku munsi wa mbere.

Uyu mukino watangiye saa Cyenda z’amanywa, wahagaze APR VC iyoboye n’amaseti 2-1 (25-22, 25-20, 14 -25) kubera imvura nyinshi yaguye igisenge cya Petit Stade kikava, ikibuga kikuzura amazi.

Petit Stade imaze hafi umwaka wose iva iyo imvura iguye ndetse mu mishinga yateganyijwe na Minisiteri y’Ibikorwa remezo n’iya Siporo harimo kuvugurura iyi nzu y’imikino y’amaboko yakira abantu bagera ku 3000 nubwo kuri ubu imikino iba mu muhezo.

Byari biteganyijwe ko uyu mushinga uzashyirwa mu bikorwa muri uyu mwaka wa 2020, ariko ukomwa mu nkokora n’icyorezo cya Coronavirus.

Petit Stade ni kimwe mu bikorwa remezo byifashishijwe muri ibi bihe bya COVID-19 mu gupima abantu batandukanye.

Ribinyujije kuri Twitter, Ishyirahamwe ry’Umukino wa Volleyball mu Rwanda (FRVB) ryatangaje ko uyu mukino wahuzaga APR VC na REG VC, uzakinwa ku wa Gatanu mu gitondo guhera saa Mbili mu gihe UTB VC izakina na Gisagara VC nyuma yaho.

Ryagize riti “Mwiriwe neza, kubera impamvu zitaduturutseho bigatuma imikino yari iteganyijwe uyu munsi idasozwa, turabamenyesha ko isubitswe ikazasubukurwa ejo mu gitondo guhera saa Mbili za mu gitondo (8:00) REG VC na APR VC. Saa 10:00 am UTB VC ikazahura na Gisagara VC.”

Itegeko rivuga ko “Umukino wahagaze amasaha arenga ane utangira bushya.”

Kuba uyu mukino uzatangira uko wakabaye bivuze ko imikino yose yagombaga gukinwa mu bagabo kuri uyu wa Kane, izaba ku wa Gatanu mu gitondo.

Uko imikino ya Playoffs muri Vollyeball iri kugenda:

Ingengabihe y’amakipe y’abagore:

  • Tariki ya 28 Ukwakira: RRA 0-3 UTB, APR 3-2 KVC
  • Tariki ya 29 Ukwakira: RRA 2-3 APR na UTB 3-0 KVC
  • Tariki ya 30 Ukwakira: RRA vs KVC na APR vs UTB

Mu bagabo:

  • Tariki ya 28 Ukwakira: APR 3-1 UTB, REG 0-3 Gisagara
  • Tariki ya 29 Ukwakira: APR vs REG, UTB vs Gisagara (yimuriwe ku wa 30 Ukwakira)
  • Tariki ya 30 Ukwakira: APR vs Gisagara na REG vs UTB
Umukino wa APR VC na REG VC wahagaritswe n'imvura utarangiye
APR VC yongeye gusubukura Shampiyona iri mu bihe byiza
REG VC yari yatsinzwe na Gisagara VC ku munsi wa mbere wakinwe ku wa Gatatu
REG VC na APR VC zizasubiramo umukino wazo bundi bushya ku wa Gatanu mu gitondo
Byageze saa moya (19:00) igisenge cya Petit Stade kikiva
UTB WVC itsinda KVC mu mukino wabaye mu gitondo kuri uyu wa Kane
APR WVC yatsinze RRA VC igeza intsinzi ebyiri muri iyi mikino ya Playoffs

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .