Ikipe y’u Rwanda y’Abagore yatangiye itsinda iya Kenya muri Shampiyona Nyafurika y’abafite ubumuga (Amafoto)

Yanditswe na Eric Tony Ukurikiyimfura
Kuya 15 Nzeri 2019 saa 11:27
Yasuwe :
0 0

Mu mukino wa mbere wa Shampiyona Nyafurika y’Abafite Ubumuga ya Sitting Volleyball iri kubera i Kigali muri Petit Stade i Remera, Ikipe y’u Rwanda y’Abagore yatangiye neza, itsinda iya Kenya amaseti 3-0 (25-8, 25-17, 25-21) mu mukino wabaye mu gitondo cyo kuri iki Cyumweru.

U Rwanda rufite igikombe giheruka rwegukanye ubwo rwatsindaga Misiri mu 2017, rurahabwa amahirwe yo kongera kwisubiza iri rushanwa, aho uyu mwaka ruhanganye na Kenya na Misiri.

Ikipe y’u Rwanda itozwa n’Umunya-Misiri Mossad Rashad Elaiuty wungirijwe na Gakwaya Eric, yari ikomeye ku mipira ya mbere ndetse yatsinze iseti ya mbere bitayigoye ku manota 25-8.

Kenya yatangiye isa n’iyikosoye mu iseti ya kabiri, iyobora u Rwanda kugeza ku manota 8-7 mbere y’uko abatoza b’ikipe y’igihugu baka akaruhuko ko kuganiriza abakinnyi ndetse bitanga umusaruro maze u Rwanda rutsinda 25-17.

Ikipe ya Kenya yongeye kungukira ku makosa menshi yakozwe n’abakinnyi b’u Rwanda mu iseti ya nyuma, ishyiramo ikinyuranyo cy’amanota atatu mbere y’uko abatoza baka akaruhuko (16-13).

Abakinnyi b’u Rwanda bagarutse mu kibuga bikosoye nanone, bakuramo ikinyuranyo ndetse batsinda iyi seti ya nyuma ku manota 25-21.

Imikino irakomeza nyuma ya saa Sita, aho saa 14:00 haba uhuza Misiri na Kenya mu gihe saa 19:00 u Rwanda rukina na Misiri nyuma y’umuhango wo gufungura iyi Shampiyona Nyafurika ku mugaragaro, utangira saa 18:00.

Ejo ku wa Mbere, aya makipe azongera akine hagati yayo mu gisa n’imikino yo kwishyura.

Amakipe abiri ya mbere azaba afite amanota menshi, azahurira ku mukino wa nyuma.

Iri rushanwa rizasozwa ku wa Kabiri tariki ya 17 Nzeri hakinwa umukino wa nyuma mu gihe hazahita haba iry’abagabo rizatangira tariki ya 18 Nzeri, risozwe tariki ya 22 Nzeri 2019.

Amakipe y’abagabo azitabira iri rushanwa ni u Rwanda, Algérie, Misiri, Kenya, Maroc na Afurika y’Epfo.

Ikipe ya mbere mu bagabo n’iya mbere mu bagore ni zo zizabona itike yo gukina imikino Paralympique izabera i Tokyo mu 2020.

Umutoza w'u Rwanda, Umunya-Misiri Mossad Rashad Elaiuty aganiriza abakinnyi
Ikipe y'u Rwanda y'Abagore yahuye n'iya Kenya mu mukino wa mbere muri Shampiyona Nyafurika ya Sitting Volleyball
Murebwayire Claudine asubiza umupira mu kibuga
Musabyemariya Alice ni umwe mu bakinnyi batera imipira ikomeye ku ruhande rw'u Rwanda
Kenya yagoye u Rwanda mu iseti ya nyuma ariko birangira itsinzwe
Ikipe y'u Rwanda irakina umukino wa kabiri nimugoroba, ihura n'iya Misiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza