Imikino y’Umunsi wa Gatandatu iteganyijwe ni uwo Police VC izahuramo na East Africa University Rwanda guhera saa Kumi, uwa REG VC na Kepler VC guhera saa Kumi n’Ebyiri ndetse n’uwa APR VC na RP Ngoma guhera saa Mbiri z’umugoroba.

Police VC ntiratsindwa mu mikino itandatu imaze gukina, ndetse ni yo iyoboye urutonde rwa Shampiyona n’amanota 18 mu gihe East Africa University Rwanda iri ku mwanya wa kane n’amanota 10.

REG VC na Kepler na wo uzaba ari umukino wo guhangwa amaso kuko Ikipe ya Sosiyete y’Igihugu ishinzwe Ingufu iri ku mwanya wa kabiri n’amanota 14, ndetse izaba ishaka intsinzi ya gatanu mu gihe Kepler VC ifite amanota icyenda ku mwanya wa gatandatu.

Ku mukino uzasoza iy’umunsi, gutsinda kwa APR VC byayifasha gukomeza guhanganira umwanya wa kabiri na REG VC cyangwa ikayicaho mu gihe yaba yatakaje. Ku rundi ruhande, IPRC Ngoma izaba ishaka intsinzi ya kabiri yayifasha kuzamura amanota atuma iva mu myanya ibiri ya nyuma.

Itike yo kwinjira kuri iyi mikino yose yashyizwe ku 3000 Frw, aho amatike agurirwa ku rubuga rwa ticqet.rw.

Imikino ibanza ya Shampiyona y’Abagore yarangiye RRA WVC iyoboye n’amanota 19, ikurikiwe na Police WVC ifite amanota 18 mu gihe APR WVC ari iya gatatu n’amanota 16.

Umukino wa REG VC na Kepler VC uri mu itegerejwe na benshi ku wa Gatanu

Abakunzi ba Volleyball bazongera guhurira muri Petit Stade ku wa Gatanu hasozwa imikino ibanza ya Shampiyona

Petit Stade izakira imikino itatu itegerejwe ku wa Gatanu aho kwinjira byagizwe 3000 Frw kuri iyo mikino yose icyarimwe

Police VC izaba ishaka gushimangira kudatsindwa mu gihe REG na APR VC zihanganiye umwanya wa kabiri

RRA WVC yasoje imikino ibanza iyoboye mu bagore