Gisagara VC yahagaritse umutoza wayo

Yanditswe na Eric Tony Ukurikiyimfura
Kuya 12 Ukuboza 2020 saa 07:32
Yasuwe :
0 0

Ubuyobozi bwa Gisagara VC bwafashe icyemezo cyo guhagarika umutoza wayo, Kwizera Pierre Marshal igihe kitazwi kubera umusaruro muke.

Kwizera ni umutoza wa Gisagara VC kuva muri Nyakanga 2019, aho yari yahawe amasezerano y’imyaka ibiri.

Umunyamabanga Mukuru w’iyi kipe, Gatera Edmond, yabwiye IGIHE ko uyu mutoza yahagaritswe igihe kitazwi.

Yagize ati “Ni byo, yahagaritswe igihe kitazwi kubera umusaruro muke. Ashobora kugaruka cyangwa ntagaruke, ariko ibaruwa yahawe ni imuhagarika kandi aracyafitanye amasezerano n’ikipe.”

Kwizera Pierre yasimbuwe na Ndahiro Joseph wari umutoza wungirije, kuri ubu ni we wasigaranye inshingano.

Gisagara VC yatwaye Shampiyona mu 2018, yasoje Shampiyona ya 2019/20 iri ku mwanya wa kane mu irushanwa ryakinwe iminsi itatu rikayihuza n’amakipe ya APR FC VC, UTB VC na REG VC.

Kwizera w’imyaka 33, yagizwe umutoza wa Gisagara VC nyuma y’igenda rya Ntawangundi Dominique.

Mu myaka isaga 12 yamaze ari umukinnyi, yakiniye amakipe arimo Gahini, Kibungo VC, Umubano Blue Tigers, Kigali Volleyball Club, APR, Lycée de Nyanza, Rayon Sports na UNIK. Yakiniye OMK El Milia yo muri Algeria mu 2013, Gisagara VC na REG VC yasorejemo mu 2017.

Umutoza wa Gisagara VC, Kwizera Pierre Marshal, yahagaritswe igihe kitazwi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .