00:00:00 IGIHE NETWORK KN KINYARWANDA EN ENGLISH FR FRANCAIS

Gisagara VC na UVC zageze muri ½ nyuma yo kuyobora amatsinda ya ‘Gisagara Tournament’

Yanditswe na Eric Tony Ukurikiyimfura
Kuya 5 Ukuboza 2021 saa 05:53
Yasuwe :

Imikino y’amatsinda y’irushanwa rya Volleyball ritegurwa n’Akarere ka Gisagara yabaye ku wa Gatandatu, yasize amakipe ane akina ½ kuri iki Cyumweru mu bagabo n’abagore amenyekanye.

Iri rushanwa ry’iminsi ibiri ryatangiye ku wa 4 Ukuboza 2021, ryitabiriwe n’amakipe arindwi mu bagabo ndetse n’andi ane y’abagore.

Mu Itsinda A ry’abagabo, United Family (UVC) yatsinze KVC amaseti 3-0 (25-19, 25-20, 25-16), Kirehe VC na yo itsinda KVC 3-0 (25-22, 25-23, 25-19) mbere y’uko UVC itsinda Kirehe VC amaseti 3-1 (19-25, 25-9, 25-16, 25-13).

Mu Itsinda B ryarimo amakipe akomeye, umukino wabimburiye iyindi ni uwo REG VC yatsinzemo IPRC Ngoma amaseti 3-2 (18-25, 25-7, 21-25, 25-17, 15-11) mbere y’uko na Gisagara VC itsinda APR VC amaseti 3-2 (19-25, 25-19, 21-25, 26-24, 15-12).

APR VC yatsinzwe na REG amaseti 3-1 (25-18, 15-25, 17-25, 19-25), Gisagara itsinda IPRC Ngoma 3-0 (25-17, 25-15, 25-17) mu gihe kandi APR yatsinze IPRC Ngoma amaseti 3-0 (25-20, 25-21, 25-16).

Gisagara VC yari imbere y’abafana bayo bari bitabiriye ku bwinshi, yashimangiye kuzamuka ari iya mbere mu Itsinda B nyuma yo gutsinda REG VC amaseti 3-2 (17-25, 25-12, 21-25, 25-20, 15-11).

Muri ½ gikinwa kuri iki Cyumweru, tariki ya 5 Ukuboza 2021, UVC yabaye iya mbere mu Itsinda A irahura na REG VC yabaye iya kabiri mu Itsinda B ry’abagabo mu mukino ubera i Gisagara ku kibuga cyo hanze y’inzu y’imikino yaho.

Undi mukino muri iki cyiciro urahuza Gisagara VC yabaye iya mbere mu Itsinda B na Kirehe VC yabaye iya kabiri mu Itsinda B. Imikino yombi iratangira saa Tanu.

Mu bagore, amakipe ane yitabiriye irushanwa yahuye hagati yayo aho Rwanda Revenue Authority (RRA) yatsinze KVC amaseti 3-0 (25-11, 25-10, 25-19), UVC itsinda IPRC Huye 3-0 (25-12, 25-8, 25-19), KVC itsinda Ruhango 3-1 (25-21, 25-23, 23-25, 25-20) mu gihe RRA yatsinze Ruhango VC amaseti 3-0 (25-20, 25-17, 25-20).

Mu mikino ya ½ ikinwa guhera saa Tatu za mu gitondo, muri ‘Gymnase’ ya Gisagara harakinira UVC na KVC naho hanze yayo hakinire IPRC Huye na RRA VC.

Gisagara VC mu bagabo na RRA VC mu bagore ni zo zihabwa amahirwe yo kwegukana iri rushanwa nyuma y’uko zatwaye iryo gushimira abasora neza ryabaye mu mpera z’ukwezi gushize.

Gisagara VC yatsinze imikino yayo yose yo mu Itsinda B
REG VC yazamutse yiyushye akuya nyuma yo gutsinda APR
APR VC yananiwe kurenga itsinda yarimo hamwe na Gisagara VC ndetse na REG VC
UVC yabaye iya mbere mu Itsinda A nyuma yo gutsinda imikino yombi yahuyemo na Kirehe VC ndetse na KVC
Abanya-Gisagara bongeye kwerekana ko bakunda ikipe yabo n'umukino wa Volleyball
Abafana bari benshi muri gymnase y'Akarere ka Gisagara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .