Bigoranye, Gisagara VC yihimuye kuri REG VC ya mbere

Yanditswe na Eric Tony Ukurikiyimfura
Kuya 19 Mutarama 2020 saa 12:12
Yasuwe :
0 0

Mu mukino w’umunsi wa gatanu ari nawo usoza imikino ibanza ya Shampiyona y’icyiciro cya mbere ya Volleyball, witabiriwe n’abatari bake muri Petit Stade i Remera kuri uyu wa Gatandatu, Gisagara VC yihimuye kuri REG VC, iyitsinda amaseti 3-2.

Amakipe yombi yaherukaga guhura muri Shampiyona, muri Playoffs z’umwaka ushize w’imikino ndetse no mu mikino ibanza ya Shampiyona y’uyu mwaka, aho REG VC yatsinze iyi kipe yo mu Majyepfo.

Umukino wayahuje kuri uyu wa Gatandatu, wari wahuruje imbaga y’abatari bake bari buzuye Petit Stade i Remera.

Gisagara VC yatsinze iseti ya mbere bigoranye ku manota 25-23 mu gihe REG VC yayihindukanye, iyitsinda iya kabiri muri ubu buryo, ku manota 26-24.

Ikipe y’Ikigo cy’Igihugu gishinzwe ingufu yari itaratsindwa mu mikino ine iheruka, yatsinze kandi iseti ya gatatu ku manota 26-24, ariko igorwa n’iya kane yashoboraga kurangiza umukino, itsindwa na Gisagara VC ku manota 25-22.

Kunganya amaseti 2-2, byatumye hitabazwa iseti ya gatanu ya kamarampaka, yatsinzwe na Gisagara VC bitayigoye, ku manota 15-5.

Mu yindi mikino yabaye kuri uyu wa Gatandatu, IPRC Ngoma yari yakiriye Kirehe VC, iyitsinda amaseti 3-1 (22-25, 25-23, 25-15 na 25-17) mu gihe UTB VC yatsinze APR VC amaseti 3-1 (25-20, 19-25, 25-18, 25-23).

Nubwo yatsinzwe, REG VC ni iyoboye urutonde rwa Shampiyona n’amanota 12, ikurikiwe na APR VC ifite amanota icyenda.

UTB VC nayo ifite amanota icyenda, ariko imaze gukina imikino ine kuko ifitanye umukino w’ikirarane na Gisagara VC ifite amanota umunani ku mwanya wa kane.

IPRC Ngoma VC ifite amanota ane ku mwanya wa gatanu mu gihe Kirehe VC ari iya nyuma nta nota irabona mu mikino itanu imaze gukinwa.

Kugeza ubu REG VC niyo iyoboye Shampiyona y'icyiciro cya mbere ya Volleyball
Gisagara VC yihimuye kuri REG VC yaherukaga kuyitsinda mu nshuro zabahuje ubushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .