Iyi Shampiyona ikinirwa ku mucanga, yateguwe n’Ishyirahamwe Nyarwanda ry’Umukino wa Volleyball ku bufatanye na Komite Olempike y’u Rwanda aho Agace kayo ka Mbere muri dutatu tuzakinwa, kakiniwe kuri King Fisher Resort- Muhazi.

Amakipe 22 arimo 14 y’abagabo n’umunani y’abagore ni yo yitabiriye aka Gace ka Mbere kakinwe tariki 1-3 Ugushyingo.

Muri aya makipe harimo kandi ay’igihugu yari yahawe umwanya wo kongera gukinana mu rwego rwo gukomeza gutegura abakinnyi basanzwe bahagararira igihugu muri uyu mukino, ndetse no kuzamura amanota yabo kuko iri rushanwa ritanga amanota ndetse rikaba ryemewe n’Impuzamashyirahamwe y’Umukino wa Volleyball ku Isi (FIVB).

Ku mukino wa nyuma mu bagabo, Ntagengwa Olivier ndetse na Gatsinzi Venuste basanzwe bakinana no mu Ikipe y’Igihugu, batsinze amaseti 2-0 Kanamugire Prince ndetse na Paul Akan ukomoka muri Ghana ariko akaba asanzwe ari n’umukinnyi wa APR VC.

Umwanya wa gatatu mu bagabo wegukanywe na Levi wakinanaga na Nzirimo Mandera.

Mu cyiciro cy’abagore, Ikipe ya Munezero Valentine na Mukandayisenga Benitha yatsinze amaseti 2-0 iya Nirere Ariane na Yankurije Françoise basanzwe bakinira ikipe ya Police VC.

Umwanya wa gatatu wegukanywe na Ukupabi ukomoka muri Nigeria wafatanyaga na Mpeti Lolo Irene ukomoka muri Repubulika Iharanira Demokarasi ya Congo, ariko aba bombi bakaba bakinira ikipe ya RRA.

Biteganyijwe ko utundi duce tubiri tw’iyi Shampiyona tuzakinirwa ku Kiyaga cya Kivu; i Karongi n’i Rubavu muri Mutarama (tariki 3-5) na Kamena (tariki ya 16-18).

Ubwo habaga iyi mikino y’Agace ka Mbere kuri King Fisher Resort, abayitabiriye baganirijwe ku ndangagaciro Olempike zikwiye kuranga umukinnyi. Iki kiganiro cyatanzwe na Kayiranga Albert uyobora National Olympic Academy.

Habaye kandi ikiganiro ku bijyanye n’ikoreshwa ry’ibyongerambaraga bitemewe muri siporo “Doping”, abitabiriye bose basobanurirwa ibibi byabyo ndetse n’uburyo babyirinda.

Iki kiganiro cyatanzwe na Perezida wa Komisiyo y’Ubuvuzi no kurwanya ikoreshwa ry’ibyongerambaraga bitemewe muri siporo ya Komite Olempike y’u Rwanda, Dr. Nuhu Assuman.

, Ikipe ya Munezero Valentine na Mukandayisenga Benitha yatsinze amaseti 2-0 iya Nirere Ariane na Yankurije Françoise mu bagore

Mukandayisenga Benita na Munezero Valentine begukanye intsinzi mu bagore

Amakipe yakinnye umukino wa nyuma mu bagabo yifotozanya n'abasifuzi mbere yo gutangira

Imikino yabereye ku mucanga wa King Fisher, ku Kiyaga cya Muhazi

Ibibuga bya Beach Volleyball byo kuri King Fisher biri ku nkengero z'Ikiyaga cya Muhazi

Abitabiriye Shampiyona ya Beach Volleyball baryohewe n'amahumbezi yo kuri King Fisher

King Fisher yakiriye Agace ka Mbere ka Shampiyona ya Beach Volleyball mu mpera z'icyumweru

Gatsinzi Venuste na Ntagengwa Olivier bishimira intsinzi

Perezida w'Agateganyo wa Komite Olempike y'u Rwanda, Umulinga Alice, yashimiye abakinnyi bitabiriye iri rushanwa

Amakipe atatu ya mbere mu bagore

Mu bakinnyi iyi mikino harimo abasanzwe bagize amakipe y'igihugu ya Beach Volleyball

Kayiranga Albert uyobora National Olympic Academy, yaganirije abitabiriye iyi Shampiyona ya Beach Volleyball ku ndangagaciro Olempike zigomba kuranga abakinnyi

Dr. Nuhu Assuman aganiriza abakinnyi ku buryo bagomba kwirinda ikoreshwa ry'ibyongerambaraga bitemewe muri siporo