Ni igikorwa cyabaye ku wa Mbere, tarki ya 7 Mata 2025, cyitabiriwe n’abayobozi batandukanye barimo ba Ambadaseri bakorera muri Nigeria, inshuti z’u Rwanda, abahagarariye amadini n’intumwa y’Umuryango w’Abibumbye.

Ambasaderi w’u Rwanda muri Nigeria, Amb. Christophe Bazivamo, yagarutse ku mateka yaranze Jenoside yakorewe Abatutsi mu 1994, inkomoko yayo n’ingaruka yagize ku muryango Nyarwanda, anagaragaza amasomo yasize n’uburyo u Rwanda rukomeje kwiyubaka.

Yasabye imiryango mpuzamahanga kurwanya Jenoside n’ingengabitekerezo yayo, ababiba urwango n’ubugizi bwa nabi mu karere, anasaba uruhare rw’amahanga mu kugaragaza ukuri n’ubutabera kuri ibi bikorwa.

Abakinnyi, abatoza n’abayobozi ba APR WVC bitabiriye iki gikorwa, bari i Abuja kuva tariki ya 1 Mata 2025 aho bitabiriye irushanwa Nyafurika rihuza amakipe yabaye aya mbere iwayo mu bagore.

APR WVC ifite umukino ku wa 8 Mata 2025, Saa Kumi n’Imwe z’umugoroba, aho ihura na VC La Loi yo muri Repubulika Iharanira Demokarasi ya Congo mu mukino wa 1/8 cy’irangiza.

Mbere y’uyu mukino harafatwa umunota wo kwibuka Abatutsi barenga miliyoni imwe bishwe mu 1994.

Ubwo abakinnyi ba APR WVC bageraga ahahuriye Abanyarwanda baba muri Nigeria mu gikorwa cyo kwibuka ku nshuro ya 31 Jenoside yakorewe Abatutsi

Amb. Bazivamo Christophe yakira abakinnyi ba APR WVC

Abanyarwanda n'inshuti z'u Rwanda ziba muri Nigeria, bahuriye mu gikorwa cyo kwibuka Abatutsi bishwe muri Jenoside mu 1994

Amb. Bazivamo Christophe yasabye amahanga kurwanya Jenoside n'ingengabitekerezo yayo, no guharanira ukuri n'ubutabera