APR VC yatsinze umukino umwe, REG VC ikomeza gutungurwa muri Shampiyona Nyafurika

Yanditswe na Eric Tony Ukurikiyimfura
Kuya 19 Mata 2021 saa 06:07
Yasuwe :
0 0

Nyuma yo gutangira nabi muri Shampiyona Nyafurika y’amakipe yatwaye ibikombe iwayo, iri kubera muri Tunisia, APR VC yatsinze umukino umwe yahuyemo na Rukinzo yo mu Burundi kuri uyu wa Mbere, ku maseti 3-0 (25-14, 25-15 na 25-18).

Iri rushanwa ritabaye mu mwaka ushize kubera icyorezo cya COVID-19, riri kubera i Sousse, aho ryatangiye ku Cyumweru tariki ya 18 Mata ndetse rizasozwa tariki ya 27 Mata 2021.

APR VC yatwaye igikombe cya Shampiyona mu 2020, yisanze mu itsinda rya mbere hamwe na KPA yo muri Kenya, Rukinzo VC yo mu Burundi na Esperence yo muri Tunisia.

Iyi kipe y’ingabo ntiyahiriwe n’umukino wa mbere yakinnye ku Cyumweru, aho yatsinzwe na KPA amaseti 3-2 (24-26, 25-23, 21-25, 25-23 na 15-12).

Kuri uyu wa Mbere, APR VC yakinnye umukino wa kabiri yahuyemo na Rukinzo VC yo mu Burundi ndetse iwitwaramo neza, aho yawutsinze ku ku maseti 3-0 (25-14, 25-15 na 25-18).

Ku ruhande rwa REG VC yatwaye Shampiyona ya 2019, yo iri mu itsinda B hamwe na Port Douala yo muri Cameroun, Swehly yo muri Libya na SOA yo muri Côte d’Ivoire.

Mu mukino wayo wa mbere wabaye ku Cyumweru, REG yatsinzwe na Swehly amaseti 3-1 (25-20, 23-25, 25-16 na 25-21).

Kuri uyu wa Mbere mu gitondo, yakinnye umukino wa kabiri na Port Douala yo muri Cameroun, na wo iwutsindwa ku maseti 3-2 (17-25, 25-22, 26-20, 21-25, 11-15).

REG VC iri gukina aya marushanwa ku nshuro ya mbere, izasubira mu kibuga ku wa Kabiri saa munani z’amanywa ikina SOA yo muri Côte d’Ivoire.

APR VC yabaye iya gatandatu ubwo yaherukaga muri iri rushanwa mu 2015, yo izakina na Esperance yo muri Tunisia guhera saa kumi z’umugoroba.

APR VC yatsinze Rukinzo VC amaseti 3-0 mu mukino wabaye kuri uyu wa Mbere
APR imaze gutsinda umukino umwe muri ibi imaze gukina muri Tunisia
REG VC yatsinzwe na Swehly VC ku Cyumweru
REG VC imaze gutsindwa imikino ibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .