APR na UTB zageze ku mukino wa nyuma wa Shampiyona ya Volleyball

Yanditswe na Eric Tony Ukurikiyimfura
Kuya 31 Ukwakira 2020 saa 09:04
Yasuwe :
0 0

Shampiyona y’Icyiciro cya Mbere ya Volleyball mu Rwanda irasozwa kuri uyu wa Gatandatu, aho mu bagabo umukino wa nyuma uhuza APR VC na UTB VC mu gihe mu bagore, uhuza UTB WVC na APR WVC.

Ku wa Gatanu nibwo habaye imikino y’umunsi wa kabiri n’uwa gatatu ya play-offs mu bagabo nyuma y’uko iyari iteganyijwe ku wa Kane yasubitswe kubera imvura nyinshi yaguye bigatuma igisenge cya Petit Stade Amahoro kiva.

APR VC yitwaye neza mu mikino ibiri yakinnye ku wa Gatanu, aho yatsinze REG VC amaseti 3-0 (25-22, 26-24, 25-21) ndetse na Gisagara VC ku maseti 3-2 (22-25, 25-20, 19-25, 25-25 na 15-12), isoza imikino ya playoffs idatsinzwe.

UTB VC yabonye itike yo gukina umukino wa nyuma itsinze Gisagara VC amaseti 3-1 (27-29, 25-19, 26-24, 25-16) ndetse na REG VC ku maseti 3-0 (25-17, 25-21, 26-24) ku wa Gatanu.

REG VC ifite igikombe cya Shampiyona giheruka, irahatanira umwanya wa gatatu na Gisagara VC yatwaye Shampiyona yari yabanje.

Mu bagore, umukino wa nyuma uteganyijwe hagati ya UTB WVC yatsinze imikino yose uko ari itatu ndetse na APR WVC yatsinze imikino ibiri. Umwanya wa gatatu urakinirwa na RRA VC ndetse na KVC.

Imikino ya Volleyball ihera saa tatu (09:00) kugeza saa mbiri z’umugoroba (20:00), yerekanwa kuri shene ya Televiziyo ka KC2 ndetse no kuri shene ya Youtube ya FRVB- Media.

APR VC y'abagabo yageze ku mukino wa nyuma idatsinzwe
UTB VC yageze ku mukino wa nyuma itsinze REG VC ifite igikombe cya Shampiyona iheruka
UTB WVC itaratsinzwe mu mikino itatu yakinnye, irongera kwisobanura na APR WVC ku mukino wa nyuma mu bagore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .