Amakipe y’ibigugu muri Volleyball y’u Rwanda azahurira mu irushanwa rizabera i Kirehe

Yanditswe na Hakizimana Jean Paul
Kuya 6 Ukuboza 2019 saa 09:34
Yasuwe :
0 0

Ubuyobozi bw’ikipe ya Kirehe Volleyball Club bufatanyije n’Akarere ka Kirehe ndetse n’abafatanyabikorwa batandukanye bagiye gutangiza irushanwa rya “ Gisaka Tournament” rizajya riba buri mwaka rigahuriramo amakipe yose yo mu cyiciro cya mbere, ay’ibigo by’amashuri ndetse n’andi y’abakina nk’abatarabigize umwuga.

Iri rushanwa riteganyijwe kuba tariki 14 na 15 Ukuboza ariko ngo rikazajya riba buri mwaka mu rwego rwo gukundisha uyu mukino w’intoki abaturage batuye muri aka Karere ndetse no kubakundisha siporo muri rusange.

Ibi byatangajwe kuri uyu wa Kane tariki 5 Ukuboza 2019 mu kiganiro n’abanyamakuru cyabereye mu Karere ka Kirehe. Aka Karere kiyumva nk’igicumbi cy’uyu mukino w’intoki bitewe n’abakinnyi b’ibihangange bakavukamo, ubuyobozi bukaba bwifuza ko hakomeza no kuzamukira abandi ngo kuko hari abakiri bato bafite iyo mpano.

Umunyamabanga Mukuru w’ikipe ya Kirehe Volleball Club, Mutumwinka Monique, yavuze ko aya marushanwa yateguwe mu rwego rwo gukundisha abanya-Kirehe uyu mukino w’intoki no kwibutsa abantu ko Kirehe ari igicumbi cyawo.

Yavuze ko abarushanwa bazakinira ku bibuga bitandatu, hakarushanwa amakipe guhera ku makuru yo mu cyiciro cya mbere, abahungu n’abakobwa, hakaza ikindi cyiciro kizaba kirimo ibigo by’amashuri n’abo mu nkambi ya Mahama ndetse n’icyiciro cya gatatu kizaba kirimo abatarabigize umwuga.

Visi Perezida wa Kirehe Volleyball, Muhawenimana Lambert, we yavuze ko bafitiye icyizere iri rushanwa bitewe n’impano zitandukanye zirangwa muri aka Karere ariko ngo zitabonaga amarushanwa menshi ngo zigaragaze.

Ati “ Akarere kacu gafite impano yo gukina Volleyball ntabwo nabura kuvuga ko ari nk’isoko y’uyu mukino kuko amakipe hafi ya yose ari muri uyu mukino amenshi afite abakinnyi bakomoka mu Karere ka Kirehe.”

Yongeyeho ati “ Dutegura iri rushanwa twagira ngo abanyakirehe cyangwa se n’igihugu muri rusange dukundishe abana umukino wa Volleyball n’abandi Banyarwanda muri rusange ndetse n’iterambere ry’Akarere, buriya iyo Akarere kasuwe n’abantu benshi bigira umumaro ku bantu benshi barimo n’abikorera.”

Umuyobozi w’Akarere ka Kirehe wungirije ushinzwe Iterambere ry’Ubukungu, Nsengiyumva Jean Damascène, yavuze ko iri rushanwa baryitezeho ibintu byinshi birimo guteza imbere abikorera bo muri aka Karere ndetse no kugaragaza impano z’uyu mukino zigaragara muri aka Karere.

Ati “ Icya mbere turitegerejemo mbere na mbere ni ukugira ngo twongere tugaragaze impano ziri i Kirehe muri Volleyball kuko zirahari ndetse abaturage bongere bibuke ko Kirehe ariho havuye uyu mukino tubona hirya no hino mu gihugu.”

Uyu muyobozi yavuze ko kandi bizaba n’umwanya mwiza wo gutembera ku bantu bataragera i Kirehe bakamenya n’ubwiza bw’aka Karere.

Yanavuze ko benshi mu bakinnyi bavukiye muri aka Karere bazaboneraho gushishikariza abato gukina uyu mukino nabo bakazatera imbere nka bo.

Mu makipe yamaze kwemeza ko azitabira iri rushanwa harimo UTB, REG, Gisagara, APR n’andi menshi abarizwa mu cyiciro cya mbere, mu makipe y’abakobwa yamaze kwemera kwitabira iri rushanwa harimo RRA, APR n’ayandi.

Uhereye ibumoso ni umunyamabanga Mukuru wa Kirehe Volleyball Mutumwinka Monique, Visi Meya Nsengiyumva Jean Damascene ndetse na Visi Perezida wa Kirehe Volleyball Muhawenimana Lambert
Iri rushanwa rizajya riba buri mwaka mu rwego rwo gushishikariza abaturage ba Kirehe kwitabira umukino wa Volleyball

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .