Akumuntu Kavalo Patrick yabimburiye abandi kongera amasezerano muri Gisagara VC

Yanditswe na Eric Tony Ukurikiyimfura
Kuya 23 Kanama 2020 saa 09:52
Yasuwe :
0 0

Nyuma yo gusoza imyaka ibiri yari yarasinye, Akumuntu Kavalo Patrick yongereye amasezerano y’indi ibiri muri Gisagara VC, ifite intego zo kuzagera kure mu irushanwa rizahuza amakipe yabaye aya mbere iwayo muri Afurika, mu mwaka utaha.

Akumuntu Kavalo Patrick usanzwe ari visi kapiteni, akinira Gisagara VC kuva muri Kanama 2018 nyuma yo kuyigarukamo avuye muri UTB VC.

Ku wa Gatandatu, uyu mukinnyi yongereye amasezerano y’imyaka ibiri ndetse ibiganiro birakomeje hagati y’ubuyobozi bwa Gisagara VC n’abandi bakinnyi bane basoje amasezerano yabo, nk’uko IGIHE yabitangarijwe n’Umunyamabanga Mukuru w’iyi kipe, Gatera Edmond.

Ati “Ni umwe mu bari basoje amasezerano, hari n’abandi turi kuganira barimo kapiteni wacu Ndamukunda Flavien, ibiganiro bigeze kure. Hari Amadou Doudou Gibril, Rugira Ballack na Karangwa Olivier, bose bari basoje amasezerano.”

Gatera yavuze ko Gisagara VC ishaka kuba ikipe ikomeye kugira ngo izagere ku ntego zayo zirimo kugera kure mu irushanwa Nyafurika rihuza amakipe yabaye aya mbere iwayo (Champions League).

Ati “Turi kubanza kongerera amasezerano abakinnyi twari dufite, hari n’abashya tugomba kongera mu ikipe. Dufite intego yo kugera mu mikino ya nyuma muri Champions League, iyo utekereje kugera aho, uba wumva ko igikombe cya Shampiyona kugitwara byoroshye.”

“Turashaka ko tuzajya tujyana abakinnyi bacu, bitagombereye ko dutira mu yandi makipe kuko abakinnyi babaye bamenyeranye byafasha ikipe kwitwara neza.”

Ubwo Shampiyona y’uyu mwaka wa 2019/20 yahagararaga kubera icyorezo cya Coronavirus muri Werurwe, Gisagara VC yari ku mwanya wa mbere n’amanota 21 ikurikiwe na REG VC ifite amanota 22.

Itegeko rivuga ko mu gihe hatondekwa uko amakipe agomba gukurikirana mu irushanwa iryo ari ryo ryose, habanza imikino n’amaseti amakipe yatsinze.

Ikipe itsinze amaseti atatu ku busa ihabwa amanota atatu, itsinze amaseti atatu kuri abiri igahabwa amanota abiri, iyatsinzwe igahabwa inota rimwe. Ikipe itsinze amaseti atatu kuri imwe ihabwa amanota atatu, itsinzwe igahabwa ubusa.

Akumuntu Kavalo Patrick (ibumoso) yongereye amasezerano y'imyaka ibiri muri Gisagara VC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .