Wilson Kipchang wigeze guca agahigo muri Marathon ku rwego rw’Isi yahagaritswe imyaka ine

Yanditswe na Eric Tony Ukurikiyimfura
Kuya 4 Nyakanga 2020 saa 09:15
Yasuwe :
0 0

Umunya-Kenya, Wilson Kipsang, wigeze guca agahigo mu gusiganwa Marathon ku rwego rw’Isi, yahagaritswe imyaka ine kubera kutubahiriza amabwiriza yo kwirinda ikoreshwa ry’imiti yongerera ingufu abakinnyi.

Ishyirahamwe Mpuzanga ry’Imikino Ngororamubiri ryavuze ko hagati ya Mata 2018 na Gicurasi 2019, uyu mugabo w’imyaka 38 watwaye Marathon ya Londres inshuro ebyiri, yasibye ‘ubutumire bugamije kureba uko umubiri we uhagaze’ inshuro enye.

Kunanirwa kwitabira ubu butumire inshuro eshatu mu gihe cy’amezi 12 bituma hatangwa ibihano byo guhagarika umukinnyi ako kanya.

Wilson Kipsang yavuze ko yasibye isuzuma ryo muri Gicurasi 2019 kubera impanuka yakoze ndetse yerekana ifoto yayo, ariko nyuma bigaragazwa ko ibyo byabaye muri Kanama 2019.

Urukiko rushinzwe imyitwarire mu Ishyirahamwe Mpuzamahanga ry’Imikino Ngororangingo, rwavuze ko rwahagaritse uyu Munya-Kenya kuva tariki ya 10 Mutarama kubera ko “yananiwe gukoresha isuzuma ry’umubiri we ndetse akanatanga ibimenyetso bitari ukuri.”

Kipsang wegukanye umudali w’Umuringa mu mikino Olempike yabereye i Londres mu 2012, yari yahagaritswe by’agateganyo kuva muri Mutarama uyu mwaka.

Yatwaye kandi andi marushanwa arimo marathon ya Berlin, New York na Tokyo ndetse ni umukinnyi wa gatandatu wakoresheje ibihe bito mu gusiganwa ibilometero 42 mu mateka y’imikino ngororangingo, aho yakoresheje amasaha abiri, iminota itatu n’amasegonda 13.

Umusaruro yabonye mu marushanwa yitabiriye hagati ya tariki ya 12 Mata 2019 n’iya 10 Mutarama 2020, wateshejwe agaciro ariko afite uburenganzira bwo kujurira mu Rukiko rwa Siporo ku Isi (CAS/TAS).

Mu myaka ya vuba, Asbel Kiprop witwaye neza muri gusiganwa metero 1500 mu mikino Olempike mu 2008, Rita Jeptoo watwaye marathon ya Boston na Chicago na Jemima Sumgong watwaye marathon y’imikino Olempike ya 2016, bose baherutse gufatirwa ibihano.

Wilson Kipchang wigeze guca agahigo muri Marathon ku rwego rw'Isi yahagaritswe imyaka ine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .