Umunyamerika Allyson yakuyeho kamwe mu duhigo twa Usain Bolt muri Shampiyona y’Isi

Yanditswe na Ishimwe Israel
Kuya 1 Ukwakira 2019 saa 01:40
Yasuwe :
0 0

Umunyamerika Allyson Felix yegukanye umudali wa zahabu akuraho agahigo kari gafitwe n’Umunya-Jamaica Usain Bolt wari ufite imidali myinshi mu mateka ya Shampiyona y’Isi.

Allyson w’imyaka 33, umudali yegukanye ku Cyumweru ni uwa 12 wa zahabu yabonye, watumye ajya imbere ya Usain Bolt umukurikiye arusha umwe.

Uyu mubyeyi yabwiye NBCSN ko “Ni iby’agaciro kuba umukobwa wanjye yari hano yitegereza.’’ Yongeyeho ati “Ni umwaka wambereye mwiza cyane.’’

Allyson umaze kwandika izina mu gusiganwa mu mikino Olempiki afitemo imidali icyenda ya zahabu yabonye mu mikino ine. Yari mu ikipe ya Leta Zunze Ubumwe za Amerika mu mukino abantu basiganwa bafatanyije (4x400m Mixed Relay) izatangira gukinwa mu mikino Olempiki mu mwaka utaha.

Ikipe ya Amerika yari igizwe na Wil London III, Felix, Courtney Okolo na Michael Cherry bose bakoresheje iminota 3:09.34 muri Shampiyona y’Isi ibera i Doha muri Qatar.

Umunyamerika Wil London III ni we watangiye wiruka aha agati Felix wakoresheje amasegonda 50.4 mbere yo guhereza mugenzi we Courtney Okolo. Michael Cherry ni we wasoje ahesheje intsinzi Amerika.

Iyi kipe yarushije Jamaica amasegonda 2.44 mu gihe Bahrain yasoje ku mwanya wa gatatu, igahabwa umudali wa Bronze.

Allyson ni we ufite agahigo k’imidali muri Shampiyona y’Isi mu bagabo n’abagore aho yujuje igera kuri 17 muri rusange.

Mu mwaka utaha, Allyson Michelle Felix azitabira imikino Olempiki izabera i Tokyo mu Buyapani ku nshuro ye ya gatanu ndetse akureho agahigo k’Umunyamerika Michael Johnson wasiganwaga muri metero 400.

Mu Shampiyona y’Isi, Allyson amaze kwegukana imidali itatu muri 200m, umwe muri 400m, itatu muri 4x100m, ine muri Mixed 4x400 n’umwe muri 4x100m. Rurangiranwa Usain Bolt we yegukanye imidali itatu muri 100m, ine muri 200m n’ine muri 4x100m.

Allyson ni umwaka wa mbere akinnye ari umubyeyi nyuma yo kwibaruka mu mwaka ushize nubwo urugendo rwe rutari rworoshye. Umwana we yise Camryn yamwibarutse mu Ugushyingo 2018.

Umunyamerika Allyson Felix uheruka kwibaruka yakuyeho kamwe mu duhigo twa Usain Bolt muri Shampiyona y’Isi
Allyson Felix (uwa kabiri iburyo) na bagenzi be bakinana mu Ikipe yari ihagarariye Leta Zunze Ubumwe za Amerika muri Shampiyona y'Isi ibera i Doha muri Qatar

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza