Umunyakenyakazi Peres Jepchirchir yashyizeho agahigo k’Isi mu gusiganwa igice cya Marathon

Yanditswe na Eric Tony Ukurikiyimfura
Kuya 5 Nzeri 2020 saa 09:22
Yasuwe :
0 0

Umunyakenyakazi Peres Jepchirchir yaciye agahigo ko ku rwego rw’Isi nyuma yo gusiganwa igice cya Marathon (ibilometero 21.1) mu gihe cy’isaha imwe, iminota itanu n’amasegonda 34, mu isiganwa ryabereye i Prague muri Repubulika ya Tchèque kuri uyu wa Gatandatu.

Jepchirchir w’imyaka 26 yazengurutse inshuro 16.5 ikibuga cya Letna Park, akuraho agahigo kari karashyizweho na Netsanet Gudeta muri Shampiyona y’Isi ya 2018, aho yasiganwe igice cya Marathon mu isaha imwe, iminota itandatu n’amasegonda 11.

Peres Jepchirchir yatangiye kwakinikira bagenzi be nyuma y’iminota 20, aho ibilometero 10 bya mbere yabyirutse mu minota 30 n’amasegonda 32 nubwo nyuma umuvuduko we wagabanyutse.

Nyuma y’isiganwa, uyu mugore w’imyaka 26 yagize ati “Ndashimira Imana, biranshimishije cyane kandi nyuzwe n’umusaruro mbonye nubwo nashoboraga gukoresha iminota 64 n’amaseginda 50. Gusa ndashimira Imana ibyo yampaye.”

“Ntibyari byoroshye gusiganwa njyenyine. Iyo ngira abo tugendana beza, nari gukoresha iminota nka 64.”

Aka ni agahigo ka kabiri ko ku rwego rw’Isi gakozwe na Jepchirchir kuri iyi ntera. Muri 2017 yakoresheje isaha imwe, iminota itanu n’amasegonda atandatu mu isiganwa rivanze ryabereye muri Ras Al Khaiman muri Leta Zunze Ubumwe z’Abarabu.

Muri uyu Mujyi wa Prague, abagabo barahatanira gukuraho agahigo ko gusiganwa igice cya Marathon mu gihe cy’iminota 58 n’amasegonda 30, kakuweho inshuro ebyiri gusa mu mateka.

Uwagerageje kugira ibihe byiza bisatira ako gahigo ni Umunya-Kenya Kibiwott Kandie wakoresheje iminota 58 n’amasegonda 37.

Jepchirchir yitwaye neza nyuma y’umunsi umwe Mo Farah na Sifan Hassan bashyizeho imihigo mishya mu gusiganwa intera ndende mu gihe kingana n’isaha imwe.

Peres Jepchirchir yashyizeho agahigo k’Isi mu gusiganwa igice cya Marathon
Yishimiye umusaruro yabonye nubwo yashoboraga kugabanya ibihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .