Umuntu urwaye inkorora ntiyemerewe; amabwiriza yerekeye ikoreshwa rya za Gym

Yanditswe na Eric Tony Ukurikiyimfura
Kuya 2 Ukuboza 2020 saa 09:36
Yasuwe :
0 0

Minisiteri ya Siporo yashyize hanze amabwiriza azakurikizwa mu isubukurwa ry’imyitozo ngoramubiri ikorerwa mu nzu z’imyidagaduro zizwi nka Gym, aho umuntu urwaye inkorora atemerewe gukorera siporo muri izi nyubako.

Inama y’Abaminisitiri yateraniye muri Village Urugwiro iyobowe na Perezida Kagame ku wa 27 Ugushyingo 2020, yemeje ko “imyitozo ngororamubiri ikorerwa mu nyubako z’imyidagaduro no kogera muri pisine bizasubukurwa hubahirizwa ingamba zo kwirinda Coronavirus.”

Mu mabwiriza agomba gukurikizwa yashyizwe hanze na Minisiteri ya Siporo ku wa 1 Ukuboza harimo ko “Umuntu ugaragaza ibimenyetso birimo umuriro, inkorora, umutwe, ibicurane, ntiyemerewe kwinjira ahatangitwa hakanakorerwa imyitozo.”

Harimo ko kandi “abakora imyitozo yo mu matsinda muri Gym batemerewe kurenza 50% by’abemerewe mu itsinda.”

Minisiteri ya Siporo yatangaje ko “ubwogero bukoreshwa n’abagana Gym butemewe mu rwego kwirinda ikwirakwira rya COVID-19” mu gihe “hagati y’icyiciro cy’imyitozo n’ikindi hagomba kubamo byibura igihe cy’isaha imwe yo gukora isuku y’ibikoresho no kugira ngo icyumba gikorerwamo imyitozo gihumeke hagati y’icyiciro n’ikindi.”

Igihe cya buri cyiciro cy’abakora imyitozo ngororamubiri yaba muri Gym no muri Aerobics ntikigomba kurenza amasaha abiri.

Inzu z’imyidagaduro zizafungura ni izizaba zasabye uruhushya rwo gukora muri Minisiteri ya Siporo kandi zikagenera kopi y’ubusabe Umuyobozi Mukuru w’Ikigo cy’Igihugu cy’Iterambere (RDB) kugira ngo hakorwe igenzura mbere yo kwemererwa.

Kimwe n’ibindi bikorwa remezo by’imikino inyuranye, Gym zafunzwe guhera tariki ya 15 Werurwe 2020, umunsi umwe nyuma y’uko Minisiteri y’Ubuzima itangaje ko mu Rwanda habonetse umurwayi wa mbere wa Coronavirus.

Tariki ya 8 Kamena 2020 nibwo Minisiteri ya Siporo yatangiye gukomorera siporo zitandukanye, ihereye ku zikorwa abantu bategeranye mu gihe muri Kanama hari gym zimwe zemerewe gukora nyuma yo kugaragaza ko zishobora kubahiriza amabwiriza yo kwirinda COVID-19.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .