00:00:00 IGIHE NETWORK KN KINYARWANDA EN ENGLISH FR FRANCAIS

Niyonsaba Francine yaciye agahigo ku rwego rw’Isi mu gusiganwa metero 2000

Yanditswe na Eric Tony Ukurikiyimfura
Kuya 15 Nzeri 2021 saa 01:36
Yasuwe :
0 0

Umurundikazi Niyonsaba Francine yashyizeho umuhigo mushya ku rwego rw’Isi mu gusiganwa ku maguru metero 2000, aho yegukanye Irushanwa rya Continental Tour Gold ryabereye i Zagreb muri Croatia ku wa Kabiri.

Niyonsaba yegukanye iri rushanwa nyuma yo gukoresha iminota itanu, amasegonda 21 n’ibice 56, agabanya amasegonda abiri ku bihe byaherukaga gushyirwaho na Genzebe Dibaba mu 2017.

Uyu Murundikazi watwaye umudali wa Feza muri Shampiyona y’Isi no mu Mikino Olempike mu gusiganwa metero 800, ari mu bakinnyi benshi babujijwe gusiganwa metero 400 na metero 1500 kubera imisemburo myinshi bafite ya kigabo izwi nka ‘testosterone’.

Niyonsaba w’imyaka 28 avuga ko azakomeza kurushanwa kugira ngo atere imbaraga abandi bameze nka we ndetse ubwo yari amaze gukomwa mu nkokora n’itegeko ry’Ishyirahamwe Mpuzamahanga ry’Imikino Ngororamubiri mu 2019, yahisemo kujya mu cyiciro cy’abasiganwa intera ndende.

Umuhigo wo ku rwego rw’Isi yashyizeho, wabonetse nyuma y’icyumweru abaye uwa mbere muri metero 5000 mu isiganwa rya Diamond League ryabereye i Zurich.

Mu Mikino Olempike ya Tokyo, yabaye uwa gatanu mu cyiciro cya nyuma cyo gusiganwa metero 10.000 mu gihe yasezerewe mu gusiganwa metero 5000 kubera ko yanyuze mu murongo utari uwe.

Nyuma yaho mu mpeshyi, Niyonsaba yabaye umugore wa gatanu w’ibihe byose wakoresheje ibihe bito mu gusiganwa metero 3000.

Umuhigo wo gusiganwa metero 2000 mu bagabo, ufitwe n’Umunya-Maroc Hicham El Guerrouj kuva mu 1999, aho yakoresheje iminota ine, amasegonda 44 n’ibice 79.

Niyonsaba Francine yaciye agahigo ku rwego rw’Isi mu gusiganwa metero 2000
Yegukanye Irushanwa rya Continental Tour Gold aho yakoresheje iminota itanu, amasegonda 21 n’ibice 56, muri metero 2000

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .