Muhitira yabaye uwa kabiri muri ‘20Km de Paris 2018’

Yanditswe na Ngabo Roben
Kuya 15 Ukwakira 2018 saa 08:05
Yasuwe :
0 0

Umunyarwanda usiganwa ku maguru Félicien Muhitira bita ‘Magare’ yitwaye neza mu isiganwa mpuzamahanga rizengurika umurwa mukuru w’u Bufaransa, Paris, aho yegukanye umwanya wa kabiri mu isiganwa ryegukanywe n’umunya-Eritrea Samuel Tsegay.

Kuri iki Cyumweru tariki 14 Ukwakira 2018 nibwo hakinwe ‘20Km de Paris’ ku nshuro ya 39 kuko iri siganwa ngarukamwaka ryatangiye gukinwa mu 1979.

Ku nshuro ya mbere mu myaka icyenda ishize, umunyarwanda yashoboye kuza muri batatu ba mbere bahembwa kuva 2009, ubwo Disi Dieudonné yaryegukanaga akoresheje iminota 59:33.

Félicien Muhitira bita ‘Magare’ yitwaye neza mu bilometero bya mbere by’iri siganwa kuko yagiye mu gikundi cyatangiye gusiga abandi cyari kirimo Stephen Ogari wegukanye iri siganwa mu 2015 n’Umufaransa Morhad Amdouni waryegukanye mu 2016.

Aba ariko bageze ku kilometero cya 14 basatiriwe n’ikindi gikundi cyari kirimo abakinnyi bahabwaga amahirwe yo kwegukana isiganwa nka Samuel Tsegay ukomoka muri Eritrea, n’umunya-Ethiopia Gojjam Belayinem.

Bahise bayobora isiganwa bakurikiwe na Muhitira basiga abandi bari biganjemo Abafaransa bakiniraga mu mihanda yo mu rugo, bagera imbere ya Tour Eiffel aho basorezaga bakiri kumwe.

Isiganwa ryegukanywe na Samuel Tsegay wakoresheje iminota 58:23 akurikirwa n’umunyarwanda Muhitira bita Magare wakoresheje 58:35.

Magare yitwaye neza muri iri siganwa nyuma y’icyumweru kimwe gusa yegukanye ‘Sedan-Charleville Half Marathon’, isiganwa naryo ribera mu Bufaransa.

Uko bakurikiranye ku rutonde rusange

1 Samuel Tsegay (Eritrea) 58:23
2 Felician Muhitira (Rwanda) 58:35
3 Hassan Chahdi (Ubufaransa) 59:51
4 Alfred Cherop (Kenya) 1:00:25
5 John Njoki (Kenya) 1:00:59

Baba batangiye gukina barenga ibihumbi umunani
Félicien Muhitira bita ‘Magare’ akomeje kwitwara neza mu masiganwa akinirwa mu Bufaransa
Magare abaye undi munyarwanda uje mu bahembwa muri 20 KM de Paris nyuma ya Disi Dieudonne wayegukanye mu 2009
Tsegay na Muhitira nibo bageze imbere ya Tour Eiffel bayoboye abandi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza