Minisitiri Munyangaju yashimye uko Half Marathon i Huye yateguwe asaba utundi turere kuyitangiza

Yanditswe na Prudence Kwizera
Kuya 19 Mutarama 2020 saa 07:45
Yasuwe :
0 0

Minisitiri wa Siporo, Munyangaju Aurore Mimosa, yitabiriye isiganwa ryo gusiganwa ku maguru igice cya Marathon mu Karere ka Huye, “Huye Half Marathon’’ ashima uburyo ryateguwe neza asaba ko n’utundi turere twategura ibikorwa nk’ibyo.

Ni irushanwa ryabaye bwa mbere kuri uyu wa Gatandatu ryitabirwa n’abarushanywa babigize umwuga bakoze intera y’ibilometero 21 hamwe n’icyiciro cy’abarushanwa bishimisha (Run for fun) bakoze intera y’ibilometero bitanu.

Minisitiri Munyangaju ari kumwe n’abandi bayobozi barimo Guverineri w’Intara y’Amajyepfo, CG Gasana Emmanuel; Umuyobozi w’Ingoro z’Umurage w’u Rwanda, Amb Robert Masozera; Perezida w’ Ishyirahamwe Nyarwanda ry’Imikino Ngororamubiri (RAF), Mubiligi Fidele; n’Umuyobozi w’Akarere ka Huye, Sebutege Ange; bakoze intera y’ibilometero bitanu mu cyiciro cya Run for fun.

Minisitiri Munyangaju yashimye uburyo iryo rushanwa ryateguwe asaba ko no mu tundi turere ryahatangizwa.

Ati “Iki gikorwa twabonye cyagenze neza cyane. Ku bwacu twabyishimiye dushimira ko cyatangijwe n’ababigizemo uruhare. Niyo mpamvu twahagurutse tukaza kwifatanya n’Abanye-Huye, tukumva ko ari nko kubaha imbaraga, guha imbaraga uturere tubereka ko turi kumwe mu rwego rwa siporo mu bana bato no mu bakuze; ku bwacu rero ni igikorwa cyiza; turateganya kuzajya no mu tundi turere.”

Iryo siganwa ryitabiriwe n’abaturage b’ingeri zitandukanye barimo abato n’abakuru bagaragaza ibyifuzo ko amasiganwa nk’ayo yajya ategurwa kenshi kuko abafasha gukora imyitozo ngororamubiri bari hamwe bakanasabana.

Nsengimana Jean de Dieu yagize ati “Iki gikorwa ni cyiza kandi ni ingirakamaro, uburyo twitabiriye mwabonye ko twagikunze. Twifuza ko bajya bategura ibikorwa nk’ibi kenshi kuko tuza gusiganwa ariko tunakora siporo ndetse tukanasabana.”

Mu barushanyijwe babigize umwuga (Half Marathon) hahembwe abahungu batandatu ba mbere n’abakobwa batandatu ba mbere.

Hakizimana Irené we yifuje ko harebwa uko n’abarushanwa mu cyiciro cyo kwishimisha bajya bagenerwa ishimwe.

Ati “Iki gikorwa ni cyiza cyane ahubwo twifuza ko ubutaha bazareba n’uko bahemba aba mbere mu barushanyijwe mu cyiciro cyo kwishimisha; byatera benshi umurava.”

Minisitiri Munyangaju na we yavuze ko hakwiye kurebwa uko n’abarushanyijwe bishimisha bagenerwa ishimwe.

Ati “Hari umu Mama (umugore) twabonye mukuru twahoze tubaza ngo wenda n’ubutaha abantu bazatekereze gutanga impano kuri abo bantu bafite umwihariko wo kuba bitabiriye ariko wenda batari muri gahunda.”

Umuyobozi w’Akarere ka Huye, Sebutege Ange, yavuze ko irushanwa ryagenze neza ku buryo byaberetse ko habayeho ubufatanye bw’ubuyobozi n’abikorera ku giti cyabo hajya hategurwa ibikorwa byiza bisususrutsa umujyi n’abafite impano zitandukanye bakigaragaza.

Sebutege yijeje ko amarushanywa ahuza abantu b’ingeri zose biyemeje kuyagira ngarukamwaka na ngarukagihembwe kuko babishyize mu ngengo y’imari.

Kugeza ubu isiganwa nk’iryo rimaze gutangizwa mu Mujyi wa Kigali; i Nyamata mu Bugesera no mu Karere ka Huye.

Isiganwa ryatangiriye imbere y'Inzu Mberabyombi y'Akarere ka Huye
Minisitiri Munyangaju yambika umudari umwe mu batsinze isiganwa
Minisitiri Munyangaju ari kumwe n’abandi bayobozi barimo Guverineri w’Intara y’Amajyepfo, CG Gasana Emmanuel_ bakoze intera y’ibilometero bitanu mu cyiciro cya Run for fun
Minisitiri Munyangaju n'abandi bayobozi ubwo bari bagiye gutangira isiganwa
Minisitiri Munyangaju yashimye uburyo iryo rushanwa ryateguwe asaba ko no mu tundi turere ryahatangizwa
Iryo siganwa ryitabiriwe n'abiganjemo urubyiruko
Abasiganwa ubwo bari biteguye gutangira
Abitabiriye bagaragaje ibyifuzo ko amasiganwa nk’ayo yajya ategurwa kenshi kuko abafasha gukora imyitozo ngororamubiri bari hamwe bakanasabana
Bazenguruse umujyi wa Huye ku ntera y'ibilometero bitanu
Cyamatare Laurent uzwi nka MC Bolingo ni we wayoboye iryo siganywa nk'umushyushyarugamba
Guverineri Gasana Emmanuel_ Minisitiri Munyangaju n' Umuyobozi w'Akarere ka Huye, Sebutege Ange bakora imyitozo ngororamubiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .