Kugira ubwanwa no kuba meze nk’abagabo nta pfunwe bintera- Dusabimana usiganwa ku maguru (Amafoto)

Yanditswe na Eric Tony Ukurikiyimfura
Kuya 13 Nyakanga 2019 saa 10:20
Yasuwe :
0 0

Dusabimana Fanny ni umukobwa wavukiye mu Mujyi wa Kigali mu 1997 mbere y’uko umuryango we wimukira muri Suède akiri muto. Umwitegereje ubona ko afite imiterere nk’iy’abagabo ndetse afite ubwanwa bwinshi, iyo bibaye ngombwa arabwogosha.

Umurebye mu maso ubona ko akomeye, amaboko ye n’amaguru ntaho wabitandukanyiriza n’ay’abagabo bakina imikino itandukanye.

Iyo ari gukina usanga abenshi bamuhanga amaso, bamwe bamwibazaho, ari ko we ntacyo biba bimubwiye, aba aganira n’abandi mu buryo busanzwe byongeye kandi afite n’umuhungu bakundana bamaranye imyaka itatu.

Mu kiganiro yagiranye na IGIHE, Dusabimana yavuze ko imihindagurikire y’umubiri we yatewe n’imyitozo yakoze, aho ngo yisanze umubiri utangiye gukomera ndetse atangira kugira ibihe byiza mu masiganwa n’imyitozo yakoraga.

Ati” Maze imyaka ibiri nkora imyitozo, tunywa ibi binyobwa baduha bidufasha kubona imbaraga, nahise mbona ntangiye guhinduka gutya. Uretse kumva umubiri wanjye uri gukomera ariko nta kibazo nagize, ahubwo nabonaga ndushaho kugira ibihe byiza."

"Ikintu navuga cyahindutse ni uko nitwara n’uko nari meze mu maso. Ubwanwa nta mwaka buramara nta n’ubwo ari bwinshi ni uko narwaye ibiheri. N’umubyeyi wanjye yari abufite.”

Dusabimana ngo nta pfunwe aterwa n’uko ateye kuko akenshi aba ari mu kazi kandi kuri we yishimira uko ameze.

“Nta pfunwe ngira, byaje bitewe n’imyitozo myinshi nakoze impindurira umubiri. Ntacyo biba bintwaye kuko mba ndi mu kazi kandi mba mbyishimiye, nta kibazo mba mfite. Buri wese aba afite uko abibona ariko njye ndabizi ko ntari umuhungu ndi umukobwa. Ntandukanye na Semenya kuko we yashatse n’umugore. Ntacyo bintwaye.”

Dusabimana avuga ko mu muryango we na bo nta kibazo batewe n’ihinduka ry’imiterere ye kuko basanzwe bamuzi kuva akiri muto.

Ati “ Mu muryango wanjye ntacyo babivugaho kuko basanzwe banzi kuva cyera. Bazi uko nari meze, ubuzima bwanjye barabuzi ntabwo babigarukaho cyane. Hano mu Rwanda kubera ko ari ubwa mbere baba bambonye bakabona umubiri wanjye urakomeye, bo bahita batekereza ko mfite utunyangingo tw’abagabo nka Semenya (wo muri Afurika y’Epfo), ariko njye ntandukanye na we.”

Uyu mukinnyi wo gusiganwa ku maguru, ngo yatangiye gukina uyu mukino akora siporo bisanzwe ku ishuri kugira ngo agire ubuzima bwiza.

Yabwiye IGIHE ko ubwo yasiganwaga muri 20 Km de Bugesera yabaye muri Gicurasi uyu mwaka, bwari ubwa mbere akoze isiganwa rya hano mu Rwanda kandi yarabyishimiye.

Ati “Ni irushanwa rya mbere ryiza. Ntabwo nari nariteguye kubera ko nari maze iminsi mu myitozo muri Kenya. Naraje bambwira ko hari isiganwa riri mu Bugesera ndavuga nti reka njye kugerageza amahirwe muri 20 km de Bugesera kuko ni igihugu cyanjye nkunda. Nagiye ngiye gufasha inshuti yanjye ikinira APR (Marthe wegukanye isiganwa) nyuma arambwira ngo komeza uze, birangira mbaye uwa gatatu.”

Mu marushanwa akomeye uyu mukobwa amaze gukina harimo isiganwa rya metero 5000 yegukanye muri Suède ndetse aba uwa kane muri Diamond League yabereye muri icyo gihugu mu gusiganwa metero 800 mu gihe mu mwaka ushize yakinnye Shampiyona Mpuzamahanga na yo yabereye muri Suède nabwo aba uwa kane.

Inzozi z’uyu mwari ni ugukinira u Rwanda ndetse akaruhesha umudali.

Ati” Nta gihugu nkinira kuko ntabwo ndahitamo. Mu mutima wanjye numva nakinira u Rwanda kuko nta bakinnyi benshi dufite. Numva nakinira u Rwanda nkaruhesha umudali, byanshimisha cyane.”

Dusabimana Fanny ngo afata Niyonsaba Francine nk’icyitegererezo cye mu gihe irushanwa ashaka kuzakina ari Imikino Olempike ya 2020.

Dusabimana Fanny ubwo yari amaze kuba uwa gatatu muri 20 km de Bugesera yakinwe muri Gicurasi
Fanny avuga ko kuba afite umubiri ukomeye nk'uw'abagabo nta pfunwe bimutera
IGIHE yasuye uyu mukinnyi aho atuye i Kimironko
Dusabimana avuga ko umubiri we wakomejwe no gukora imyitozo ngororamubiri
Kumubona atambuka, ubona ko amaguru ye ntaho ataniye n'ay'abagabo kuko afite imfundiko
Dusabimana Fanny ukunze kwitoreza muri Suède iyo bibaye ngombwa yogosha n'ubwanwa

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza