00:00:00 IGIHE NETWORK KN KINYARWANDA EN ENGLISH FR FRANCAIS

Iradukunda na Mataratara bitwaye neza mu cyiciro cya mbere cya Athlétisme y’Abantu bafite ubumuga

Yanditswe na Eric Tony Ukurikiyimfura
Kuya 12 December 2021 saa 07:24
Yasuwe :

Iradukunda Joseph wo mu Karere ka Rwamagana yitwaye neza mu gusiganwa metero 1500 mu cyiciro kibanza cya Shampiyona y’Imikino Ngororamubiri y’Abantu bafite ubumuga cyabereye kuri Stade ya Nyagatare ku wa Gatandatu, tariki ya 11 Ukuboza 2021.

Umwaka w’imikino mu Mikino Ngororamubiri itegurwa na Komite y’Igihugu y’Imikino y’Abantu bafite ubumuga (NPC Rwanda) watangiriye i Nyagatare mu gihe uzakinwa mu byiciro bitanu.

Muri iki cyiciro cya mbere cyakinwe ku wa Gatandatu i Nyagatare, abacyitabiriye basiganwe ku maguru ku ntera ya metero 100, 200, 400, 800 na 1500 mu gihe kandi barushanyijwe no gutera ingasire (disque), umubunda (javelin) n’intosho (shotput).

Mu gusiganwa metero 100 mu bagabo, hatsinze Nzabonimpa Jean Claude wo muri UR Nyagatare wakoresheje amasegonda 14 n’ibice 96 naho mu bagore hatsinda Nyinawabasinga Ziada, na we wa UR-Nyagatare, aho yakoresheje amasegonda 18 n’ibice 25.

Hakizimana Patrick wa Kirehe, yabaye uwa mbere muri metero 200 mu bagabo, akoresheje amasegonda 28 n’ibice 59 mu gihe mu bagore hatsinze Izabayo Reponse wa Rwamagana akoresheje amasegonda 35 n’ibice 41.

Muri 400, mu bagabo hatsinze Nzabonimpa Jean Claude wa Nyagatare nyuma yo gukoresha umunota umwe, amasegonda abiri n’ibice 99 naho mu bagore hatsinda Nyiraneza Marie Chantal wa Rwamagana, we wakoresheje umunota umwe, amasegonda 17 n’ibice 92.

Ndayisaba Jean Baptiste wa Ngoma yakoresheje iminota ibiri, amasegonda 30 n’ibice 37 aba uwa mbere mu gusiganwa metero 800 mu bagabo naho Iradukunda Odette wa Rwamagana akoresha iminota ine, isegonda n’ibice bibiri mu bagore.

Iradukunda Joseph ni we watsinze mu gusiganwa metero 1500 mu bagabo nyuma yo gukoresha iminota ine, amasegonda 50 n’ibice 49.

Uretse gusiganwa ku maguru, abakinnyi barushanyijwe kandi no mu kujugunya intosho (shotput), uwa mbere aba Nkurikiyinka Valens wa Rwamagana wayiteye muri metero 9.1, akurikirwa na Iradukunda Rebecca wa Kirehe wayiteye muri metero 6,35 naho Muganzakazi Annociatte wa UR Rukara ayitera muri metero 5,1.

Mu gutera umuhunda (javelin), hatsinze Mataratara Espoir wawuteye muri metero 30.19, akurikirwa Iradukunda Rebecca wa Kirehe, we wawuteye muri metero 20, 15 naho Manirere Delphine wa UR Rukara awutera muri metero 18,74.

Uwabaye uwa mbere mu gutera ingasire (disque) ni Nkurikiyinka Valens wa Rwamagana, aho yayiteye muri metero 18.5, akurikirwa na Iradukunda Rebecca wa Kirehe wayiteye muri metero 11,9 naho Uwitunze Fiona wa Rwamagana aytirera muri 8,59.

Muri iyi mikino, buri Ntara ikina ukwayo, aba mbere muri buri karere bakazahurira mu mikino ya nyuma izabera i Kigali muri Nzeri 2022. Ibi bikaba byarakozwe mu rwego rwo kworohereza abanyamuryango kwitabira amarushanwa.

Karasira Eric ushinzwe siporo muri NPC Rwanda, yavuze ko abakinnyi babiri muri buri cyiciro ari bo bazatsindira kurushanwa ku rwego rw’igihugu.

Ati “ Uyu munsi twaje mu Ntara y’Iburasirazuba, ni ukuvuga ko uturere twaho twose twahuriye aha. Tuzakuramo abakinnyi bitwaye neza ku buryo bazaza i Kigali mu mikino ya nyuma izaba muri Gicurasi tumaze kuzenguruka intara zose.”

Yakomeje agira ati “Mwabonye ko harimo ibyiciro bitandukanye, harimo n’abatabona, ni ukuvuga ababaye aba mbere, dukunze gufata babiri ba mbere, ni bo dufata bakajya ku rwego rw’igihugu”.

Nzabonimpa Jean Claude wabaye uwa mbere mu gusiganwa metero 100 mu bagabo, yavuze ko gutegurirwa amarushanwa nk’aya bituma na bo bumva ko bitaweho ndetse bibakura mu bwigunge bakagaragaza ko hari ibyo bashoboye.

Ati “Tubyakira neza kuko hari icyo bidufasha, hari urwego bidukuraho kandi hari n’aho bitugeza, tukavuga tuti niba dufite ubumuga u Rwanda rudutekerezaho, abayobozi bacu badutekerezaho natwe tukagira aho twisanga.”

Icyiciro cya kabiri cy’uyu mwaka w’imikino wa Shampiyona y’Imikino Ngororamubiri y’Abantu bafite ubumuga kizakinwa tariki 12 Gashyantare 2022 i Rubavu mu Ntara y’Uburengerazuba .

Ku wa Gatandatu ni bwo habaye icyiciro kibanza cya Shampiyona y'Imikino Ngororamubiri y'Abantu bafite ubumuga mu Rwanda
Abakinnyi basiganwe ku maguru mu byiciro bitandukanye
Barushanyijwe kandi mu gutera ingasire, umubunda n'intosho
Abakinnyi batandukanye bo mu Burasirazuba bari bahuriye i Nyagatare ku wa Gatandatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .