00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya ku bihangange bihagarariye Afurika muri Winter Olympics 2022

Yanditswe na Blaise Mukwende Nziza
Kuya 20 February 2022 saa 05:04
Yasuwe :

Imikino Ngororamubiri ikinwa mu gihe cy’ubukonje ‘Winter Olympics’ yo mu 2022 iri kubera mu murwa mukuru w’u Bushinwa, Beijing irasozwa kuri iki Cyumweru.

Mu bayitabiriye harimo n’Abanyafurika batandatu nubwo kuva iyi mikino yatangira mu 1924, nta mudari n’umwe uregukanwa n’Igihugu cyo muri Afurika.

Ibi biterwa no kuba ibihugu byo kuri uyu mugabane nta rubura rwinshi bigira ndetse bimwe rutanagwamo.

Nubwo abakinnyi bo ku mugabane wa Afurika bahura n’iyo mbogamizi y’ibura ry’urubura, ntibibabuza kwitabira iyo mikino.

Mu mikino y’uyu mwaka, ibihangange bitandatu byo kuri mugabane wa Afurika nibyo byayitabiriye. Benshi muri bo bakuriye mu bihugu by’i Burayi no ku yindi migabane igira urubura rwinshi.

Samuel Ikpefan Uduigowme

Samuel Ikpefan Uduigowme yabyawe n’ababyeyi bo muri Nigeria mu 1991 bamuha umuryango w’Abarafansa wamureze.

Mu 2016 yahawe ubwenegihugu bwa Nigeria anemerwa nk’umukinnyi uhagarariye Federasiyo y’Igihugu mu mukino wo kugendera ku rubura.

Samuel Ikpefan ni Umunya-Nigeria uri mu Banyafurika batandatu bitabiriye Winter Olympics 2022

Carlos Mäder

Carlos Mäder, ni Umunya-Ghana wavukiye mu Busuwisi mu 1978 nyuma y’uko nyina yamushyikirije ababyeyi bandi ngo aribo bamurera.

Nubwo yakuriye mu Busuwisi, ntiyigeze atanduka n’umuco n’imizi y’igihugu cye cya Ghana avukamo.

Ku myaka 44, Mäder ni we ufite agahigo ko kuba ari we mukinnyi mukuru mu bakinnyi bose bitabiriye gukina bagendera ku misozi y’urubura muri iyi mikino ya Winter Olympics 2022.

Ku myaka 44 Carlos, ni we mukinnyi mukuru mu mikino ya Winter Olympics 2022

Shannon Adeba

Shannon Adeba yavutse mu 1996, avukira muri Canada ku babyeyi b’impunzi baturuka muri Eritrea.

Mu 2011 yafashe icyemezo cyo guhagararira igihugu cye cya Eritrea mu Mikino Ngororamubiri y’urubyiruko yabereye mu Mujyi wa Innsbruck muri Autriche mu 2012.

Ubwo yitabiraga Winter Olympics 2018 yabereye muri Koreya y’Epfo, yibasiwe n’ivangura rishingiye ku ruhu anatukwa ku mbuga nkoranyambanga.

Adeba yasohoye amashusho ku rubuga rwe rwa Instagram ivuga ku rugendo rw’ikimutera kwitabira imikino ya Winter Olympics n’uburyo yabashije kurenza amaso urwango yakuze ahura narwo muri Canada.

Shannon Adeba yatutswe bishingiye ku irondaruhu mu mukino aherukamo ya Winter Olympics 2018

Mialitiana Clerc

Mialitiana Clerc ni Umunya-Madagascar wavukiye mu Bufaransa mu 2001 arerwa n’ababyeyi batari abe.

Ni ubwa kabiri Clerc yitabiriye imikino ya Winter Olympics 2022 nyuma y’iyo mu 2018 yabereye i Pyeonchang muri Koreya y’Epfo.

Clerc ni we mugore wenyine wo ku mugabane wa Afurika witabiriye iyi mikino ya Winter Olympics 2022.

Mialitiana Clerc ahagarariye ikirwa cya Madagascar

Mathieu Neumuller

Mathieu Neumuller yavutse mu 2003. Ni undi Munya-Madagascar witabiriye imikino ya Winter Olympics 2022 nyuma ya Mialitiana Clerc.

Neumuller yatangaje ko kurebera kuri Clerc aribyo byatumye yinjira mu mikino Olempike.

Mathieu Neumuller ni Umunya Madagascar wa kabiri uri muri iyi mikino ya Winter Olympics 2022

Sami Lamhamedi

Sami ‘Adam’ Lamhamedi ni Umunya-Maroc , akaba ariwe mukinnyi wenyine uhagarariye igihugu cy’Abarabu cyo ku mugabane wa Afurika muri iyi mikino ya Winter Olympics 2022.

Lamhamedi yavutse mu 1995 kuri se w’Umunya-Maroc na Nyina w’Umunya-Canada. Mu 2010 nibwo yafashe icyemezo cyo gukinira Maroc mu mikino yo kugendera ku misozi y’urubura.

Lamhamedi yatsindiye umudari wa zahabu mu 2012 ubwo yari yitabiriye imikino y’urubyiruko ikinwa mu gihe cy’ubukonje yabereye muri Autriche.

Mu 2014 nibwo Lamhamedi yitabiriye imikino ya Winter Olympics bwa mbere yari yabereye i Sochi mu Burusiya.

Sami Lamhamedi ni we uhagarariye Maroc

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .