00:00:00 IGIHE NETWORK KN KINYARWANDA EN ENGLISH FR FRANCAIS

Ibyihariye ku isiganwa rirerire ku Isi, risaba kwitwaza imiguru 20 y’inkweto

Yanditswe na Blaise Mukwende Nziza
Kuya 15 March 2022 saa 03:26
Yasuwe :

Ibihangange mu kwiruka ahantu harehare nka Eliud Kipchoge byitabira amarushanwa ngarukamwaka yo gusiganwa ku maguru abera i Londres, Berlin na Tokyo ahwanye n’ibilometero 119.

Icyakora, biratangaje kuba ayo masiganwa uko ari atatu arutwa inshuro 41 na ‘Self- Transcendence’, isiganwa ry’amaguru rirerire ku Isi, rireshya n’ibilometero 4.988, ritajya ryitabirwa n’ibihangange yibitseho.

Ni isiganwa ryatangijwe n’Umuhinde witwaga Sri Chinmoy wigishaga mu idini ry’Abahindu agakunda no kwiruka ahantu harehare.

Afite imyaka 12 ni bwo yatangiye kwiruka ahantu harehare mbere y’uko agira ibyago byo gupfusha ababyeyi be bombi afite imyaka 14.

Nyuma y’imyaka 19 ahuye n’ibyo byago, Chinmoy wari warabaye umugabo, yafashe umwanzuro wo kujya gukorera no gutura mu Mujyi wa New York muri Leta Zunze Ubumwe za Amerika.

Ubwo yari ageze mu myaka 60, Chinmoy yahagaritse kujya yiruka bitewe n’ikibazo yagize mu ivi. Nk’umuntu wari waramenyereye gukora siporo, ntibyari iherezo ahubwo byari itangiriro kubera ko yahise atangira kujya aterura ibiremereye.

Yatangiye kujya azamura umunzani uteretseho inzovu, indege n’abantu benshi bateraniye hamwe.

Urukundo yakundaga umukino wo kwiruka ku maguru no gushishikariza abantu gukora ibidashoboka byatumye mu 1997 atangiza isiganwa ry’amaguru yise ‘Sri Chinmoy Self- Transcendence.’

Iri siganwa ni rimwe mu masiganwa akakaye bitewe n’uko ari rirerire kurusha ayandi kongeraho n’amategeko adasanzwe ariranga harimo ko rigomba gukinirwa ku izuba ry’igikatu ryo mu mpeshyi.

Rikinwa hazengurukwa ibice bitandukanye byo mu Mujyi wa New York kugera aho ibilometero 4.988 birangiye. Mu yandi magambo ni nk’uko wakwiruka uhereye mu Burengerazuba bwa Leta Zunze Ubumwe za Amerika ukagera mu Burasirazuba bwaho warangiza ukongeraho izindi metero 42.195!

Bitewe n’indeshyo y’ahantu hirukwa muri iryo siganwa, bisaba iminsi 52 kugira ngo risozwe. Abaryitabira basiganwa guhera saa Kumi n’ebyiri za mu gitondo kugeza saa Sita z’ijoro.

Ikindi ni uko amasaha atanu gusa yo kuryama ariyo ahabwa uwitabiriye iryo siganwa.

Umuntu wifuza kurangiza iri siganwa asabwa byibuze imiguru 20 y’inkweto. Abaryitabira bemerewe kugenda buhoro cyangwa se bagasiganwa bacumbagira bitewe n’imvune barigiriramo.

Kugeza ubu umuntu wabashije gusoza iri rushanwa atirukanse ahubwo yagenze n’amaguru gusa ni Umunyamerikakazi Yolanda Holder wabikoze mu 2017 afite imyaka 59.

Gusa nubwo iri rushanwa rivunanye kugeza kuri uru rwego, ntabwo ritangirwamo ibihembo bihambaye. Bimwe muri byo ni ishati yo kwambara n’umutako muto w’igihembo.

Sri Chinmoy watangije iri siganwa, yitabye Imana mu 2007 afite imyaka 76 aho yazize indwara y’umutima. Ni urupfu rwababaje benshi harimo uwahoze ari Visi Perezida wa Leta Zunze Ubumwe za Amerika, Al Gore, n’uwahoze ari Perezida wa Leta Zunze Ubumwe z’Abasoviyeti, Mikhail Gorbachev.

Bamwe mu bitabiriye isiganwa rya "Sri Chinmoy Self-Transcendence"
Sri Chinmoy watangije iri rushanwa yari umwigisha mu idini ry'Abahindu
Guterura ibyuma biremereye ni iyindi siporo Sri Chinmoy yakoraga
Yolanda Holder ni we muntu wabashije gusoza irushanwa rirerire ku Isi atigeze yiruka ahubwo agenda gake gusa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .