Iri rushanwa ryabereye muri IPRC Kigali, rikinwa n’abagera kuri 400 mu byiciro bitandatu bitandukanye.

Mu cyiciro cy’abakuru, basiganwe ku ntera y’ibilometero 10 mu bagabo n’abagore.

Mu bagabo, Hitimana Noël wa APR AC yahize abandi yegukana umwanya wa mbere akoresheje iminota 31, amasegonda 23. Yakurikiwe na Nsabimana Jean Claude wakoresheje iminota 31 n’amasegonda 28 ndetse na Mutabazi Emmanuel wakoresheje iminota 31 n’amasegonda 38.

Mu bagore, Niyonkuru Florence wa Sina Gerard yabaye uwa mbere akoresheje iminota 35 n’amasegonda ane, akurikirwa na Imanizabayo Emelyne wa Sina AC wakoresheje iminota 36 n’isegonda rimwe. Uwizeyimana Jeanne Gentille wa Police AC warushijwe amasegonda 17 yabaye uwa gatatu.

Sina Gerard Athletic Club ni yo yegukanye ibihembo byinshi nk’ikipe harimo icy’abakuru mu bagabo, abahungu n’abakobwa batarengeje imyaka 20 ndetse n’abatarengeje imyaka 18 mu bakobwa.

Ni mu gihe APR AC yahize andi makipe mu bagabo, ikurikirwa na Police AC na Sina Gerard AC.

Mu bahungu batarengeje imyaka 20, bakinnye ibilometero umunani, hatsinze Ahishakiye Christian wa Sina Gerard AC mu gihe mu bakobwa batarengeje iyo myaka, bo bakinnye ibilometero bitandatu, hatsinze Uwitonze Claire na we ukinira Sina Gerard AC.

Mu bahungu batarengeje imyaka 18, bakinnye intera y’ibilometero bitandatu, hatsinze Iradukunda Justinwa Sina Gerard AC naho mu bakobwa bakinnye ibilometero bine hatsinda Nyirambarushimana Jean D’Arc na we ukinira Sina Gerard AC.

Abakinnyi bitwaye neza muri iyi Shampiyona, ni bo bazatoranywamo abazahagararira u Rwanda muri Shampiyona y’Isi izabera muri Leta ya Florida muri Leta Zunze Ubumwe za Amerika tariki 10 Mutarama 2026.

Abakinnyi ba Sina AC bafashije ikipe yabo kwegukana imyanya myiza

Imikino ya ‘National Cross Country Championship 2025’ yabereye muri IPRC Kigali

Amarushanwa yakinwe guhera ku batarengeje imyaka 17

Abakinnyi bagera kuri 400 bari mu byiciro bitandukanye ni bo bahatanye muri ‘National Cross Country Championship 2025’

Abahatanye mu byiciro by'abakuru bakoze ibilometero 10

Uwitonze Claire ni umwe mu bakinnyi beza bakiri bato basiganwa ku maguru

Hitimana Noël wa APR AC ni we mukinnyi wahize abandi muri 'National Cross Country Championship 2025’

Mutabazi Emmanuel ari mu bakinnyi bakomeye mu Rwanda basiganwa ku maguru

Hitimana Noël yegukanye intsinzi mu bagabo

Niyonkuru Florence wa Sina Gerard Athletic Club yishimira intsinzi yabonye mu cyiciro cy'abagore

Ikipe ya APR AC ni yo yitwaye neza kurusha izindi mu cyiciro cy'abagabo

Sina Gerard AC yitwaye neza mu byiciro bitandukanye