00:00:00 IGIHE NETWORK KN KINYARWANDA EN ENGLISH FR FRANCAIS

Akari ku mutima wa Mo Farah witabiriye Kigali International Peace Marathon

Yanditswe na IGIHE
Kuya 29 May 2022 saa 10:46
Yasuwe :

Mohamed Farah, Umwongereza wubatse izina mu marushanwa yo kwiruka ku maguru ni umwe mu bihumbi byitabiriye ‘Kigali International Peace Marathon’, irushanwa ngarukamwaka ribera mu Rwanda.

Mohamed Farah wavukiye muri Somalia, amaze kubaka izina rikomeye mu gusiganwa ku maguru muri metero ibihumbi bitanu n’ibihumbi 10. Afite inkomoko muri Somalia.

Uyu mugabo ufite imidali ibiri ya Zahabu yakuye mu mikino Olempike, ni umwe mu bashimwe n’Umwamikazi w’u Bwongereza ndetse amwemerera gukoresha inyito ‘Sir’ imbere y’amazina ye.

Mo Farah uri mu ruzinduko mu Rwanda binyuze muri gahunda ya Visit Rwanda, kuri iki Cyumweru yitabiriye irushanwa ryo kwiruka ku maguru rya ‘Kigali International Peace Marathon’. Yirutse mu cyiciro cy’abasiganwa byo kwishimisha batarushanwa (Run for fun).

Mu kiganiro yagiranye na RBA yavuze ko ari ubwa mbere ageze mu Rwanda ariko yashimye uburyo yasanze Igihugu n’abaturage bacyo.

Ati “Ndi hano binyuze muri gahunda ya Visit Rwanda, ni ubwa mbere nje mu Rwanda ariko ni igihugu cyiza gifite abaturage beza ndetse na we urabyibonera uburyo rino rushanwa ari ryiza.”

Yavuze ko yitabiriye iri rushanwa mu rwego rwo kwerekana ko Abanyafurika baramutse bakoreye hamwe bagera kuri byinshi.

Yavuze ko mu minsi mike amaze mu Rwanda yaganiriye n’abakina umukino wo kwiruka ku maguru ndetse yiteguye gutanga umusanzu we kugira ngo iri rushanwa rirusheho gutera imbere mu Rwanda.

Ati “Ni ingenzi ko dutera imbaraga abari kuzamuka muri uyu mukino, ni ingenzi kubereka ibyo bashobora kugeraho mu gihe bagize indoto zagutse. Ejo hashize twagize umwanya wo kuganira mbereka ko nanjye mu gihe kimwe nari ku rwego nk’urwabo ariko nza gukora cyane no kubona ko nshoboye, ibyo nibyo byatumye ngera ku byo nagezeho.”

“Tuzarebera hamwe ibikoresho bafite niba hari uburyo twakorana. Nakwishimira gutanga umusanzu no kubatera akanyabugabo. Kuri njye kuba narageze ku byo nagezeho numva ko ari ingenzi kugira nanjye icyo ntanga ngafasha n’abari kuzamuka.”

Mo Farah afite imidali 10 yegukanye mu marushanwa atandukanye yo kwiruka harimo ine yakuye mu mikino ya Olempike n’indi itandatu yegukanye ku rwego rw’Isi.

Nyuma ya Lasse Virén , ni uwa kabiri usiganwa ku maguru muri metero ibihumbi bitanu na 10, wabashije kubona imidali ibiri mu mikino ya Olempike.

Ubusanzwe amazina ye ni Mohamed Muktar Jama Farah akaba yaravutse mu 1983. Yagiye mu Bwongereza akiri umwana muto azamukira mu ikipe y’imikino yo kwiruka ya Newham & Essex Beagles Athletics Club.

Ni umwe mu bubatse amateka mu mukino wo gusiganwa ku maguru ndetse yagiye yesa uduhigo twinshi mu mikino irimo iya Olempike.

Yatangiye gukina imikino yo gusiganwa ku maguru mu 1996 urugendo rwe rurangira mu 2021.

Mohamed Farah ni umwe mu bitabiriye Kigali International Peace Marathon
Uyu mugabo wabaye ikirangirire mu mukino wo gusiganwa ku maguru yashimye uko yakiriwe mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .