00:00:00 IGIHE NETWORK KN KINYARWANDA EN ENGLISH FR FRANCAIS

Yakoreye umukandara atwite: Uwihoreye ufite abana batandatu, aracyakina Karate ku myaka 47 (Video)

Yanditswe na Eric Tony Ukurikiyimfura
Kuya 9 March 2024 saa 08:39
Yasuwe :

Hari abavuga ko siporo ari urukundo cyangwa ikiyobyabwenge ku bayikoze bayikunda. Niba ari ukuri, ubanza ari ko byagenze kuri Uwihoreye Claire uzwi nka "Cynthia", umubyeyi w’imyaka 47 ariko 29 muri yo akaba ayimaze mu mukino wa Karate.

Uwihoreye ni umwalimu muri École Française, ukora siporo yo Koga na Karate ariko by’umwihariko uyu mukino wa nyuma akaba awumazemo igihe kitari gito.

Ni umugore ufite igihagararo kiringaniye, ubona agenda yitonze no mu mvugo ye bikaba uko, ndetse muhuriye mu nzira biragoye ko wahita umenya ko afite Umukandara w’Umukara na Dan ebyiri, aho ya imbere yayibonye mu 2010.

Mu busanzwe, biragoye kubona abagore benshi muri siporo Nyarwanda, by’umwihariko mu mikino njyarugamba nka Karate. Kuri we ngo ntateze kuwureka kuko ari cyo kintu akunda kurusha ibindi bintu byose abamo mu buzima bwa buri munsi.

Mu kiganiro yagiranye na IGIHE, yavuze ko akiri muto yatangiriye muri siporo yo Koga, ariko aza kwigira inama yo kujya muri Karate nubwo byabanje kumugora kubera ko n’ubuyobozi bw’ishuri yigagaho butabishakaga uko.

Ati "Nahereye ku Koga kuko nabitangiye ndi umwana muto cyane, mbyigira muri Muhazi. Nyuma ya Jenoside, ni bwo natangiye gukina Karate mu 1995. Numvaga mbikunze, mbishaka. Ikigo nigagaho barambuza, Umuyobozi waho ambuza kubijyamo ariko ndamuhakanira ndamubwira ngo ndabikunda, birangira asanze naragiyemo, arabyakira."

Gukunda filime z’imirwano biri mu byamusunikiye gushyira Koga ku ruhande, akiyegurira Karate, ariko na none ngo yashaka kwerekana ko umugore cyangwa umukobwa ashoboye.

Ati "Kuva kera nakundaga filime z’imirwano, ariko na none nkababazwa no kubona umwana w’umukobwa ahohoterwa cyangwa umugore. Iteka iyo nabibonaga nubwo nari ndi umwana, byarambabazaga. Bituma mvuga nti ’niba ari ibi, reka nereke abakobwa ko bashoboye, nereke abagore ko bashoboye’. Bituma ninjiramo gutyo."

"Nayigiyemo kubera ikinyabupfura igira, irakurinda. Nashakaga ikintu kizamfata kikanyobora, kikandinda kugeza igihe nshinze urugo kandi koko cyarandinze, ngize amahirwe nshaka umugabo ubikunda, arambwira ngo wibivamo. Ntabwo [umugabo] ayikina, ntazi iyo biva n’iyo bijya, ariko yampatirije kubigumamo, antera ingabo mu bitugu. Undi wanteye ishyaka ni Maître [umutoza] wanjye."

Ku myaka 47, Uwihoreye Claire ufite abana batandatu, aracyakina Karate

Yavuze ko ajya gutangira gukina Karate, umutoza yabanje kumubwira ko urugendo agiye kujyamo rugoranye ku mwana w’umukobwa kuko abandi babigerageje bahitaga babivamo.

Kuri Uwihoreye, ngo yawugiyemo yariyemeje ndetse ntateganya kuzareka gukina Karate kugeza igihe azaba atagifite imbaraga zibimushoboza.

Ati "Na Maître ajya kunyakira yaravuze ati ’ko abakobwa baza bagahita bagenda’, ndamubwira nti naje nabyiteguye, naje mbyiyemeje, ntabwo nshobora kuyivamo kuko ni yo ntego yanjye. Nzareka Karate igihe nzaba numva nafashe akabando, igihe nzaba ntakibasha kugenda ni bwo nzareka Karate."

Gushyigikirwa mu rugendo rwe rwo gutangira Karate, agahabwa imyambaro yo gukinana n’abamutoje kandi ku buntu, na we byamwubatsemo umutima wo gufasha abatishoboye bafite inyota yo kumenya uyu mukino ku buryo hari abana batoza nta kiguzi.

Ati "Karate ni ikintu kiri mu maraso yanjye, ntabwo ari ikintu nshakisha, kugeza ubu mfite Club nigisha y’abana batoya, ariko cyane cyane nahereye ku bana batari bishoboye, badafite umuntu wabigisha. Nashatse kubafasha nk’uko nanjye bamfashije, nanjye ntere ikirenge mu cya Maître wanyigishije.”

“Uwa mbere ageze kuri Marron, uwa nyuma ari kuri Orange. Cyane cyane ariko nkakunda kwibanda ku mwana w’umukobwa kuko nabonye ko bitinya, nkabyumvisha ababyeyi babo nubwo byari bigoye kuko ababyumva ni bake."

Uwihoreye Claire yavuze ko ababazwa no kubona hari abakobwa cyangwa abagore bakina Karate, bakayivamo nyuma bagiye gushinga urugo. Yahishuye ko ubwo yakoreraga Umukandara w’Icyatsi yari atwite inda y’imfura ye, ndetse icyo gihe yaherekejwe n’umugabo we mu kizamini.

Ati "Njye birambabaza iyo mbona abantu bava mu mukino bagiyemo kandi bawukunze. Nkorera umukandara w’icyatsi, nawukoreye ntwite inda ya mbere. Imbaraga nakoreshaga nta n’umwe wari uzi ko ntwite. Twagiye muri ’combat’ [kurwana/Kumite], ndagenda negera Sensei [umwarimu wa Karate] ndagenda ndamubwira nti ‘ariko ndatwite ntabwo nakina combat’."

Agaruka ku bakobwa bumva ko batakora siporo cyangwa ngo bakine imikino njyarugamba kubera ko ituma batera nabi, Uwihoreye yavuze ko imigeri ya mbere yayigishijwe n’umusore wakinaga Kung-Fu ariko atari kujya muri uyu mukino kuko wo wari kumuhindurira imiterere y’umubiri.

Ati "Imigeri ya mbere nyimenya, nayigishijwe n’umuhungu ukina Kung-Fu, ariko ndamubwira ngo ntabwo najya muri Kung-Fu zituma umuntu amera nk’umugabo. Ariko Shotokan [ubwoko bwa Karate] ntihindura umuntu, Wadoryo [ubwoko bwa Karate] ni uko ndetse na Taekwondo. Ni style ushobora kujyamo ugakina rwose.”

Nubwo amaze igihe muri Karate, ntibimubuza kwihugura mu bumenyi. Aha, Uwihoreye yari yitabiriye amahugurwa yatanzwe n'Umunya-Canada Sensei Denis Houde ku bakina Shotokan mu Rwanda

Abajijwe uburyo ahuza gukina Karate, kuyitoza n’ubuzima bwa buri munsi mu rugo nk’umugore wubatse ndetse ufite abana batandatu barimo abato b’imyaka icyenda agomba kwitaho, Uwihoreye yavuze ko bitagoye kuko atari amasaha menshi amara muri iyi siporo.

Ati "Kubihuza ntacyo bintwara na kimwe kubera ko ntabwo ari iminsi yose mba nkina iyo Karate. Ni rimwe na rimwe kandi nkakina nk’amasaha abiri. Nk’ubu aho nigisha muri École Française, mpigisha amasaha abiri ku wa Gatanu, hakaba n’abo bana nigisha [Karate] amasaha abiri ku wa Gatandatu no ku Cyumweru, isaha imwe, imwe. Ni ibintu nashyize muri gahunda."

Abana be bato b’impanga, umuhungu uri ku mukandara w’icyatsi n’umukobwa uri k’uw’icyatsi, n’undi mukobwa w’imyaka 18, ni bo bonyine babashije gutera ikirenge mu cye cyo gukina Karate mu gihe abandi baba mu mideli, abandi mu gushushanya.

Ku bijyanye no kuba Karate akora yamutunga, uyu mubyeyi yavuze ko hari umushinga ari guteganya wo gutoza uyu mukino abana bafite ubumuga bwo kutumva ku buryo hari umufatanyabikorwa bashobora gufatanya.

Yongeyeho kandi ko ateganya gushinga ‘club’ izajya yibanda ku bana b’abakobwa kugira ngo abazamurire icyizere no kwitinyuka.

Ati "Ubu ndi mu mushinga wo gukora Club inyishyura ariko ndashaka kubanza kwigisha abana bafite ubumuga bwo kutumva, nkareba ko byakunda. Ni yo gahunda yanjye, noneho namara kubifatisha, urumva hari aho nzaba mbakuye n’aho nzaba mbagejeje, ubwo Umubikira tuzahita tuvugana uko azajya ampemba. Hari n’ikipe nshaka gushinga ariko cyane cyane ikaba irimo abana b’abakobwa."

"Nshaka kugira ngo uwo mwana w’umukobwa yiyumvemo icyizere, kuko ntabwo bigirira icyizere. Nta n’ikindi gituma bananirwa ni uko batigirira icyizere, turacyishyiramo ko dufite intege nkeya, ibintu tutabishobora, nyamara birashoboka."

Uwihoreye yagiye muri Karate ashaka kugaragaza ko umukobwa cyangwa umugore ashoboye

Uwihoreye yavuze ko kimwe mu bituma abakobwa cyangwa abagore baba bacye muri siporo Nyarwanda ari ukwitinya no kubura icyizere, akenshi ntibashyigikirwa n’imiryango n’inshuti.

Ati "Imbogamizi ahanini, umwana w’umukobwa ntabwo yiyizera. Umugore ntabwo yiyizera. Rimwe na rimwe acibwa intege n’ababyeyi be, n’inshuti ze rimwe na rimwe zikamubwira ngo umukobwa wakinnye Karate ntiyabona umugabo...Urumva ni urugamba rutoroshye. N’iyo bamaze gushinga urugo, wumva ngo umukobwa yakubita umugabo… bigatuma acika intege, akavuga ngo ubwo maze kubaka reka mbivemo. Nyamara si ko biri, Karate ni ikinyabupfura, ni ukwirinda. Ntabwo ari ukwirirwa wereka abantu ko uzi kurwana."

Yongeyeho ko we ku giti cye, kugira umugabo umushyigikira ari byo akesha kuba agikina Karate ku myaka ye kuko hari aho yasaga n’uwabivuyemo ariko akibutswa ko akwiye gukomeza gukina.

Ati "Njye nshyingirwa, nagize amahirwe nubakana n’umugabo unshishikariza siporo. Njye mbyita amahirwe kuko yagiye antera ingabo mu bitugu nubwo atakinnye Karate. Byatumye nguma muri Karate. Yaje no kunshyigikira njya gukora ikizamini cy’Umukandara w’Icyatsi, abizi ko ntwite. Ntiyagira impungenge. Kugushyigikira birahagije."

Yavuze nyuma y’amezi atatu abyaye, yashoboraga guhita asubira mu myitozo keretse ubwo yabyaraga impaga aheruka mu myaka icyenda ishize ni bwo yamaze hafi umwaka atarasubukura imyitozo.

Uretse gukina no gutoza, kuri ubu Uwihoreye Claire ni umusifuzi wa Karate, undi mwuga yinjiyemo kugira ngo azakomeze kuba muri uyu mukino mu gihe yaba atagikina.

Hejuru y’ibyo, agaragara kandi mu bikorwa by’imyidagaduro birimo filime ndetse ni umwe mu bifashishijwe mu mashusho y’indirimbo “Fou de Toi” yahuriyemo abahanzi nka Bruce Melodie, Ross Kana na Element Eleéeh.

Ati "Gukina filime nabitangiye mu 2018, najyaga nkunda filime kuva nkiri umwana ariko nkibaza aho nzabikorera bikanyobera, ariko birangira mbyinjiyemo. Nabyinjiyemo ari ibintu bigoranye ariko nsanga ndabishoboye. [Filime] ijya inangaburira. Gusa sinyikunda nk’uko nkunda Karate."

Yasabye ababyeyi guha agaciro impano umwana agaragaza n’amahitamo y’ibyo yifuza gukora, bakamushyigikira kuko ibyo akora kunze ari byo bizamugirira akamaro.

Ati "Ntuzigere uhatiriza umwana ikintu adashaka. Ahubwo bimukundishe, nahitamo umushyigikire mu mahitamo ye."

Muri iki kiganiro, Uwihoreye yavuze ko umunsi wamushimishije ari uwo yakoreyeho ikizamini cy’umukandara atwite mu gihe uwamugoye ari ubwo yarwanaga n’umuhungu wamurushaga imikandara ine kandi amuruta, ariko bikarangira amutsinze nubwo yari yamukubise umugeri ku munwa, watumye amara icyumweru cyose atasama.

Uretse gukina, Uwihoreye afite abana batishoboye atoza Karate ku buntu ariko hari indi mishinga ateganya irimo no kuzamura umubare w'abakobwa bakina uyu mukino
Uwihoreye Claire yatangiye kandi n'umwuga wo gusifura Karate
Uwihoreye yasabye ababyeyi gushyigikira abana babo mu gihe bagaragaje ko bakunda siporo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .