00:00:00 IGIHE NETWORK KN KINYARWANDA EN ENGLISH FR FRANCAIS

Uko imikandara irutanwa muri Karate, umukino njyarugamba ushishikaje benshi mu Rwanda

Yanditswe na Byiringiro Osée Elvis
Kuya 14 Nzeri 2022 saa 10:41
Yasuwe :

Karate ni umukino njyarugamba wakomotse mu Buyapani mu myaka 1400, waje gukwirakwira ku isi kugeza naho wageze mu Rwanda mu 1980.

Ni umukino ukomeje gutezwa imbere mu Rwanda n’ikimenyimenyi mu Rwanda hagiye kongera guteranira ku nshuro ya kane amahugurwa ya JKA (Japan Karate Association) Rwanda, no kuzamurwa mu ntera ku Banyarwanda bamaze igihe biga uyu mukino.

Aya mahugurwa azabera i Kigali tariki 15-20 Nzeri 2022, akazatangwa n’abatoza bakomeye muri uyu mukino bazava mu Buyapani.

Nkuko bigenda ahandi nko mu mashuri, abantu bamaze igihe biga karate, bahabwa impamyabumenyi n’impamyabushobozi mu cyiciro runaka. Muri karate naho batanga impamyabushobozi ariko binyuze mu mikanda itandakunye.

Muri iyi nkuru, tugiye kugaruka kuburyo imikandara irutanwa n’icyo bisaba kuyigeraho. Twibukiranye ko iyi karate tugiye kuvugaho, ari iyatangijwe n’Abayapani bo bita ko ariyo y’umwimerere.

Umukandara w’umweru

Uyu uhabwa umuntu ugitangira gukina Karate. Niba nawe nta hantu urayigerageza , wakwibarira mu bafite umukandara w’umweru kuko niwo utangiriraho.

Umukandara w’umuhondo

Uyu mukandara uhabwa byibura umuntu umaze hagati y’amezi atatu akora imyitozo ihoraho. Mbere yo kuwuhabwa ukora igerageza waritsinda ukawuhabwa. Ni umwe mu mikandara y’ibanze muri uyu mukino.

Umukandara wa Orange

Uyu mukandara wa orange uhabwa umuntu ufite umukandara w’umuhondo, umaze amezi atatu akora imyitozo ihoraho nyuma yo guhabwa umukandara w’umuhondo. Nabwo abanza guhabwa igerageza mbere yo kuwuhabwa kugira ngo barebe ko ibyo amaze igihe yiga abizi.

Umukandara w’icyatsi

Ni umukandara wa gatatu uhabwa utangiye kwiga karate. Ntushobora kuwuhabwa utarahawe orange. Umukandara w’icyatsi uhabwa umuntu umaze amezi atanu akora imyitozo ihoraho nyuma yo guhabwa orange.

Ntibivuze ko ari umukandara w’ubuntu, nawo uwuhabwa kuko wagaragaje ubuhanga mubyo umaze iminsi wiga.

Umukandara w’ubururu

Uyu uhabwa umuntu ufite umukandara w’icyatsi, umaze byibura hagati y’amezi atatu n’atandatu akora imyitozo ihoraho.

Umukandara w’ikigina (Chocolant)
Uyu mukandara uhabwa umuntu ufite umukandara w’ubururu, umaze byibura umwaka akora imyitozo ihoraho ndetse wanatsinze ikizamini.

Umukandara w’umukara (Dan)

Iki ni icyiciro gihanitse, aho umuntu afatwa nk’utangiye gukerebuka muri uyu mukino njyarugamba. Umukandara w’umukara cyangwa Dan ya mbere, uhabwa umuntu umaze hafi imyaka itatu akina karate.

Kujya kuri Dan ikurikira, ugomba kuba watsinze ikizamini kandi umaze imyaka ingana na n’umubare wa Dan ufite.

Urugero niba ufite Dan eshatu, ushaka iya kane ugomba gutsinda ikizamini kandi umaze imyaka itatu ufite Dan ya gatatu.

Aha imikandara ntabwo yongera guhinduka. Dan ya cumi niyo ya nyuma muri karate.

Karate ni umwe mu mikino njyarugamba ikunzwe mu Rwanda
Imikandara muri karate itangwa bitewe n'igihe umuntu amaze yiga n'ubumenyi afite mubyo yize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .