00:00:00 IGIHE NETWORK KN KINYARWANDA EN ENGLISH FR FRANCAIS

Abasifuzi ba Karate mu Rwanda bongerewe ubumenyi ku mpinduka zabaye mu mategeko yayo (Amafoto)

Yanditswe na IGIHE
Kuya 21 Mutarama 2023 saa 08:45
Yasuwe :

Abasifuzi 60 bo mu Rwanda barimo abagabo 52 n’abagore umunani, bahuguwe ku mpinduka zakozwe mu mategeko y’umukino wa Karate, yatangiye gushyirwa mu bikorwa muri uyu mwaka wa 2023.

Aya mahugurwa y’umunsi umwe yabereye muri Great Hotel i Kigali kuri uyu wa 21 Mutarama, yari yitabiriwe na Visi Perezida w’Ishyirahamwe Nyarwanda ry’Umukino wa Karate (FERWAKA), Karamaga Barnabé.

Mwizerwa Dieudonné, umusifuzi wa Karate uhagarariye abandi mu Rwanda akaba n’umusifuzi mpuzamahanga ku rwego rwa Afurika ndetse n’ushinzwe gutanga amanota ku rwego rw’Isi, ni we wakoresheje aya mahugurwa.

Yavuze ko impamvu yayo ari uko habaye impinduka mu mategeko asanzwe yifashishwa muri uyu mukino kandi zikaba zigomba gutangira kubahirizwa muri uku kwezi. Yongeyeho ko bashyize imbaraga mu guhugura abo muri Karate y’u Rwanda kuko mu mwaka ushize hari amarushanwa mpuzamahanga yabaye, bamwe mu bakinnyi bagatsindwa kubera kutamenya amategeko.

Ati “Aya mahugurwa twayateguye ku mpamvu z’uko amategeko mashya yasohotse azakurikizwa uyu mwaka guhera muri uku kwezi kwa Mutarama kugeza mu myaka iri imbere. Twashatse ko abasifuzi, abatoza n’abakinnyi kimwe n’abashaka kubijyamo bakoze ibizamini, bose bagendana n’igihe.”

Yakomeje agira ati “Bigaragara ko dufite amarushanwa menshi imbere, ariko tunashingiye ku marushanwa y’umwaka ushize, byagaragaye ko hari abana benshi batsinzwe kubera ko atari abaswa, ahubwo bagonzwe n’amategeko.”

Agaruka ku mpinduka zabaye mu mategeko, Mwizerwa yavuze ko ari nyinshi ariko zirimo bice by’ingenzi ari byo gutanga amakosa n’ibihano ndetse no gutanga amanota.

Ati “Amategeko yahindutse ni menshi, hari ajyanye n’ibyo gutanga amakosa n’ibihano, hari ajyanye no gutanga amanota haba mu rwego rwa Kata [kwiyerekana] na Kumite [kurwana]. Twabonye ko icyiza abantu bose bagerageje kubyumva, barabisomye.”

Uwihoreye Claire ni umwe mu bitabiriye aya mahugurwa. Yavuze ko hari byinshi yamwunguye ndetse agiye kumufasha mu kazi ke ka buri munsi ko gutoza abana umukino wa Karate.

Ati “Aradufasha cyane kuko arongera ubumenyi ku bwo nari nsanzwe nzi, cyane ko nari nsanzwe ku rubuga rw’abasifuzi ba Karate mu Rwanda. Hari amategeko yagiye ahinduka, nari nkeneye kuyamenya kugira ngo bimfashe kugenda nzamura urwego rwanjye.”

Aya mahugurwa yateguwe mu gihe u Rwanda rwitegura kwakira Imikino ihuza Abapolisi bo muri Afurika y’Iburasirazuba n’iyo Hagati (EAPCO) iteganyijwe hagati ya Gashyantare na Werurwe. Bamwe mu bakinnyi ba Karate bazitabira iyi mikino bari mu bayitabiriye.

Mwizerwa Dieudonné wakoresheje aya mahugurwa
Uwihoreye Claire yavuze ko hari byinshi yungukiye muri aya mahugurwa
Visi Perezida w’Ishyirahamwe Nyarwanda ry’Umukino wa Karate (FERWAKA), Karamaga Barnabé
Abahuguwe bafashe umwanya wo gushyira mu bikorwa ibyo bize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .