00:00:00 IGIHE NETWORK KN KINYARWANDA EN ENGLISH FR FRANCAIS

Uyobora Ishyirahamwe ry’umukino wo koga ku Isi ari mu Rwanda

Yanditswe na Thamimu Hakizimana
Kuya 17 Werurwe 2022 saa 11:28
Yasuwe :

Perezida w’Ishyirahamwe ry’Umukino wo Koga ku Isi (FINA), Dr. Husain Al-Musallam, ari mu Rwanda mu rugendo rugamije guteza imbere iyi siporo mu gihugu.

Uruzinduko rwe ruzamara iminsi ibiri. Ubwo yageraga i Kigali yakiriwe na Minisitiri wa Siporo, Aurore Munyangaju Mimosa, bagirana ibiganiro byabereye muri Kigali Convention Centre.

Dr. Husain Al-Musallam yavuze ko yagiranye n’ubuyobozi bw’Ishyirahamwe ry’Umukino wo Koga mu Rwanda ibiganiro bigamije kurushaho guteza imbere uyu mukino.

Yongeyeho ko siporo ari ingenzi mu buzima cyane cyane iy’umukino wo koga ari nayo mpamvu yijeje abari aho ko hagiye kuba ubufatanye mu kuyiteza imbere mu Rwanda.

Umuyobozi w’Ishyirahamwe ry’Umukino wo Koga mu Rwanda (RSF), Girimbabazi Rugabira Pamela, we yabwiye abanyamakuru ko urugendo rwa Perezida wa FINA ari igisubizo ku mukino wo koga mu Rwanda.

Yanavuze ko uru rugendo barwitezeho umusaruro ushimishije kubera ko Ishyirahamwe ry’Umukino wo Koga ku Isi hari ibyo ryabemereye.

Yagize ati “Uru rugendo Abanyarwanda barwitegeho byinshi cyane nk’abakinnyi bacu ndetse n’abagize umukino wo koga bitege ibyiza biri imbere kuko ubu bigaragaza ko imikoranire n’ishyirahamwe ry’uyu mukino ku Isi ikomeye kurushaho kandi hari ingamba twafashe ndetse n’ibyo batwemereye ku buryo mu myaka iri imbere siporo yacu izaba igeze ku rwego rushimishije.”

Yongeyeho ko babemereye ubufatanye mu mishinga itandukanye bafite banabizeza ko biteguye kubafasha kugira ngo abatoza b’umukino wo koga n’abakinnyi barusheho gutera imbere no kuzamuka birushijeho.

Biteganyijwe ko Dr. Husain Al-Musallam mbere yo gusubira mu gihugu cye, kuri uyu wa Kane ari busure Urwibutso rwa Jenoside rwa Kigali ku Gisozi kugira ngo amenye amateka Abanyarwanda banyuzemo anasure abakinnyi b’umukino wo koga.

Perezida wa FINA yageze i Kigali ku manywa yo ku wa Gatatu
Minisitiri wa Siporo, Aurore Munyangaju Mimosa yagiranye ibiganiro na Dr. Husain Al-Musallam

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .