00:00:00 IGIHE NETWORK KN KINYARWANDA EN ENGLISH FR FRANCAIS

Umwihariko wa CIMEGOLF igiye gukinwa ku nshuro ya gatanu

Yanditswe na Iradukunda Olivier
Kuya 29 Ugushyingo 2022 saa 07:10
Yasuwe :

Irushanwa CIMEGOLF 2022 ryateguwe n’Uruganda Nyarwanda rukora Sima ‘CIMERWA’ ku bufatanye na Kigali Golf Club, rigiye kuba irya mbere rikinwe rifite umwihariko wo kwita ku bakiliya.

CIMEGOLF ni irushanwa rigiye kuba ku nshuro ya gatanu, riteganyijwe kuba ku wa 3 Ukuboza 2022; ritegerejwemo abasaga 250 biganjemo ibyiciro by’abato, abakuru barimo abagore n’abagabo.

Mu kiganiro n’abanyamakuru cyabaye ku wa Kabiri, tariki ya 29 Ugushyingo 2022, Kapiteni wa Kigali Golf Club, Andrew Kulayije, yavuze ko CIMEGOLF izitabirwa n’umubare munini.

Yagize ati “Ubu tumaze kugira abantu 250, uyu ni umubare mwiza kuko harimo abaturutse mu bihugu bitandukanye. Ikindi kandi muri uyu mwaka dufite umubare munini w’abagore ugera kuri 70, ibitarakunze kubaho mbere.”

Iri rushanwa muri uyu mwaka ryakinwemo imikino ine, uwa mbere wabaye tariki ya 28 Kanama, uwa kabiri uba ku wa 1 Ukwakira, uwa Gatatu, ku wa 5 Ugushyingo 2022.

Umunsi wa nyuma muri iri rushanwa uzakinwa ku wa Gatandatu, tariki ya 3 Ukuboza 2022. Kuri uyu munsi ni bwo abitwaye neza muri iyo mikino bazashyikirizwa ibihembo byabo.

Ubu buryo bwakinwemo butandukanye n’ubwakinwaga mbere, aho abakina bakiniraga irushanwa igihe kimwe. Kuri ubu ubuyobozi bwa CIMEGOLF buvuga ko ari bwiza kuko bwatumye hazamo guhangana.

Mark Mugarura ushinzwe Ubucuruzi n’Iyamamazabikorwa muri CIMERWA, yavuze ko gahunda bafite ari ukuzamura urwego rwa CIMEGOLF ikaba iya mbere mu Karere u Rwanda ruherereyemo.

Ati “Intego yacu ni uguteza imbere CIMEGOLF ikajya ku rwego mpuzamahanga, ndetse ikaba irushanwa rya mbere muri aka Karere kacu. Turishimira kandi uruhare turi kugira mu iterambere ry’ubukerarugendo mu Rwanda.”

Yongeyeho ko icyo bari kurebaho kuri iyi nshuro atari ubushobozi bwo gutegura, kuko mu myaka yashize n’ubundi bwagiye buzamuka cyane. Icyo bari kwitaho ni inyungu umukino ufitiye abawitabira.

Ati “Mu mwaka ushize twakoresheje arenga miliyoni 80 Frw, ibyo byaduhaye ishusho y’uko tugomba gutwara iry’uyu mwaka. Ubu turi kureba ku mubare w’abantu bashobora kugerwaho n’umukino wa Golf.”

“Muri abo hagomba kuba harimo abakiliya bacu, mu gihe twabagezaho ibyiza by’umukino wa Golf hari undi mubano wisumbuyeho twagirana.”

Kapiteni wa Kigali Golf Club, Andrew Kulayije, yavuze ko ari akanya keza ko kumenyekanisha ibyiza by’Ikibuga cya Golf mu kubungabunga ibidukikije.

Ati “Mu myaka yatambutse twakoreshaga igice kimwe cy’iki kibuga. Ariko cyaravuguruwe kugira ngo gikurure ba mukerarugendo. Iri rushanwa ni rimwe mu marushanwa ya Golf akomeye dufite mu gihugu.”

“Ni umwanya mwiza wo guhamagara ba mukerarugendo bakaza gukina iri rushanwa. Ubu aka kanya tuvugana hari benshi basabye kuza y’aba abaturutse muri Afurika ndetse no hanze yayo.”

Umuyobozi wa Kigali Golf Resort and Villas, Jack Bryan, yavuze ko gukorana na CIMERWA harimo inyungu nyinshi.

Ati “Igihe irushanwa rimaze ryazamuye urwego rw’abakina Golf mu Rwanda n’ubuzima bw’abana batwaza ibikoresho abakinnyi “Caddies” nabwo burazamuka.’’

Ikibuga cya Golf Club kuri ubu gicungwa na Rwanda Ultimate Golf, cyari gisanzwe kigizwe n’imyobo icyenda kugeza mu 2019 ubwo cyavugururwaga kikagira imyobo 18, aho cyatashywe muri Kanama 2021.

Ubwo CIMEGOLF Tournament yabaga ku nshuro ya mbere mu 2017 yitabiriwe n’abakinnyi 90, ifite ingengo y’imari ya miliyoni 30 Frw. Mu 2018, yitabiriwe n’abakinnyi basaga 100, ikoresha miliyoni 53 Frw.

Mu 2019, yari ifite ingengo y’imari ya miliyoni 60 Frw ndetse ikaba yaritabiriwe n’abakinnyi 138 bo mu Rwanda no mu mahanga. Ubwo iheruka mu 2021 yakoresheje hafi miliyoni 100 Frw.

Imyiteguro ya CIMEGOLF igiye gukinwa ku nshuro yayo ya gatanu irarimbanyije
Mark Mugarura ushinzwe Ubucuruzi n’Iyamamazabikorwa muri CIMERWA yavuze ko gahunda bafite ari ukuzamura urwego rwa CIMEGOLF ikaba iya mbere mu Karere u Rwanda ruherereyemo
Rizah Mugabe ushinzwe Abacuruzi banini muri CIMERWA yakanguriye abagore kwitabira umukino wa Golf
Umuyobozi wa Kigali Golf Resort and Villas, Jack Bryan, yavuze ko gukorana na CIMERWA byongereye umubare w'abakina Golf
Kapiteni wa Kigali Golf Club, Andrew Kulayije, yavuze ko irushanwa ryitabiriwe n'abanyamahanga benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .