Shampiyona Nyafurika yo Gusiganwa mu Modoka izatangira mu byumweru bibiri biri imbere, tariki ya 20-23 Werurwe 2025.

Isiganwa rizabimburira andi ni Safari Rally Kenya izitabirwa n’imodoka 39 zirimo izihatanira amanota ya Shampiyona y’Isi yo Gusiganwa mu Modoka.

Mu modoka zizahatana ku rwego rwa Afurika harimo iy’umwuzukuru wa Julius Kambarage Nyerere wayoboye Tanzania, Prince Charles Nyerere uzaba yungirijwe n’Umunyarwanda Rutabingwa Fernand.

Aba bombi bazaba bari muri Mitsubishi Lancer Evo X, si ubwa mbere bazaba bakinanye isiganwa kuko bari hamwe muri Rwanda Mountain Gorilla Rally ya 2024.

Mu bandi bazitabira iri siganwa harimo Umunya-Kenya Karan Patel wegukanye Shampiyona Nyafurika mu nshuro ebyiri ziheruka, aho azakinana na Tauseef Khan muri Skoda Fabia.

Ku ngengabihe y’amasiganwa y’uyu mwaka, Safari Rally izakurikirwa na Pearl of Africa Rally yo muri Uganda izaba muri Gicurasi tariki ya 9-11.

Iryo siganwa rizakurikirwa na Rally International du Burundi iteganyijwe tariki ya 15-17 Kanama.

Nyuma y’ukwezi kumwe ni bwo hazaba Rwanda Mountain Gorilla Rally izasoza umwaka w’amasiganwa y’imodoka muri Afurika tariki ya 12-14 Nzeri 2025.

Rutabingwa Fernand (ubanza iburyo), ari mu bazakina Safari Rally Kenya izabimburira andi masiganwa agize Shampiyona Nyafurika ya 2025

Prince Charles Nyerere asanzwe akina amasiganwa atandukanye ari ku ngengabihe ya Shampiyona Nyafurika

Prince Nyerere na Rutabingwa Fernand bakinanye muri Rwanda Mountain Gorilla Rally ya 2024