U Rwanda rwegukanye imidali itandatu muri Korean Ambassador’s cup 2019 yabereye muri Tanzania

Yanditswe na Eric Tony Ukurikiyimfura
Kuya 16 Ukuboza 2019 saa 08:59
Yasuwe :
0 0

Abakinnyi batandatu bagize Ikipe y’u Rwanda ya Taekwondo batsindiye imidali itandatu irimo itanu ya Zahabu n’undi w’Umuringa mu marushanwa ya Korean Ambassador’s cup 2019 yaberaga Arusha muri Tanzania, yasojwe kuri iki Cyumweru.

Iri rushanwa ngarukamwaka rya “Korean Ambassador’s Cup 2019” ryateguwe n’Ishyirahamwe ry’Imikino ya Taekwondo muri Tanzania, ku nkunga ya Ambasade ya Repubulika ya Korea muri icyo gihugu.

U Rwanda rwatahanye imidali itandatu irimo itanu ya Zahabu yegukanywe na Uwababyeyi Delphine ukina mu batarengeje ibilo 53, Ndacyayisenga Aline ukina mu baterengeje ibilo 57 na Sekanyambo Jean Paul wo mu batarengeje ibilo 58.

Hari kandi MunyakazI Vincent ukina mu bari munsi y’ibilo 74 ndetse na Mwemezi Cédric ukina mu bari munsi y’ibilo 87 mu gihe uwatwaye umudali w’Umuringa ari Kayitare Bénoît ukina mu bari munsi y’ibilo 63.

Muri rusange u Rwanda rwatwaye igikombe cy’umwanya wa gatatu hagendewe ku giteranyo cy’imidali rwegukanye muri iri rushanwa.

Ibindi bihembo byegukanwe n’Abanyarwanda muri iri rushanwa birimo, Umukinnyi mwiza w’irushanwa mu bakobwa (MVP) wabaye Uwababyeyi Delphine, Umutoza mwiza w’irushanwa wabaye Bagire Allain Irène n’Umusifuzi mwiza w’irushanwa wabaye Mushambokazi Zura.

Asoza iri rushanwa, Ambasaderi wa Repubulika ya Korea muri Tanzania yashimye umusanzu w’u Rwanda mu migendekere myiza y’irushanwa, aho Ishyirahamwe Nyarwanda ry’Umukino wa Taekwondo ryabatije ibikoresho byo kubara amanota hifashishijwe ikoranabuhanga (Electronic System) n’abo kubikoresha.

Biteganyijwe ko Ikipe y’u Rwanda igera i Kigali ku wa Kabiri tariki ya 17 Ukuboza 2019.

Abakinnyi b’Ikipe y’u Rwanda bazahita basubira mu makipe yabo kugira ngo bakomeze kwitegura imikino ya Shampiyona y’igihugu izaba kuva kuwa Gatanu tariki ya 20 Ukuboza ikazasozwa ku Cyumweru tariki ya 22 Ukuboza 2019.

Ikipe y'u Rwanda ya Tekwondo yegukanye imidali itandatu muri Korean Ambassador’s cup 2019 yaberaga muri Tanzania

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .