U Rwanda rushobora kutitabira Shampiyona Mpuzamahanga y’Imikino Njyarugamba

Yanditswe na Eric Tony Ukurikiyimfura
Kuya 3 Ukuboza 2019 saa 10:29
Yasuwe :
0 0

Abakinnyi b’Abanyarwanda bashobora kutitabira Shampiyona Mpuzamahanga y’Imikino Njyarugamba ya Mombasa Open Tong-Il Moo-Do International Martial Arts Championship izabera muri Kenya ku nshuro ya munani.

U Rwanda ni kimwe mu bihugu byemeje ko bizitabira iri rushanwa rihuriramo abakinnyi b’Imikino Njyarugamba itandukanye, baturutse mu bihugu binyuranye byo ku migabane yose.

Umunyamabanga Mukuru w’Ishyirahamwe Nyarwanda ry’umukino wa Taekwondo, Mbonigaba Boniface, yabwiye IGIHE ko ikipe y’u Rwanda y’uyu mukino bishobora kurangira iterekejeyo bitewe n’imitegurire y’iri rushanwa bivugwa ko itameze neza.

Ati "Twateganyaga kujyayo ariko turasa n’abari kubihindura. Navuganye n’abantu baho, haracyariyo ibintu bitarasobanuka neza, hari ibyo twavuganye batarampaho umwanzuro ku buryo turi guteganya ko twabireka.’’

Ishyirahamwe ry’Umukino wa Taekwondo mu Rwanda ngo ritegereje igisubizo cya nyuma kuri uyu wa Gatatu kugira ngo hemezwe niba Abanyarwanda bazitabira iyi Shampiyona izakinwa mu mpera z’icyumweru, ariko ku kigero cya 90% ikaba itazitabira.

Mu kiganiro n’abanyamukuru cyabaye ku Cyumweru, Umuyobozi wa Tong-IL Moo-Do muri Kenya, Clarence Mwakio, yavuze ko imyiteguro y0 kwakira iri rushanwa igeze kure, aho izabera muri Aga Khan Academy ku wa Gatandatu no ku Cyumweru.

Iyi Shampiyona Mpuzamahanga izitabirwa n’abakina indi mikino irimo Karate, Taekwondo, Judo, Kung-fu, Aikido, Jiu-jitsu, Ninjutsu, Hapkido, Capoeira, Kendo y’Abayapani na Wushu.

Amakipe azitabira iri rushanwa yatangiye kugera ahazabera irushanwa kuri uyu wa Mbere mu gihe kandi Visi Perezida wa Tong-IL Moo-Do ku Isi, Takamitsu Hoshiko yamaze kugera muri Kenya ngo azatangize iri rushanwa rizamara iminsi ibiri.

Mu bihugu bizarikina, harimo Korea y’Epfo, u Buyapani, Philippine, Thailand, Nepal, Paraguay, Nigeria, Côte d’Ivoire, Ethiopia, Zambia, Ethiopia, Burkina Faso, u Rwanda, Leta zunze ubumwe z’Amerika, Iran na Kenya izaryakira.

U Rwanda rumaze kwitabira iri rushanwa inshuro eshatu.

Ikipe y'u Rwanda ya Tekwondo ishobora kutitabira Shampiyona Mpuzamahanga y’Imikino Njyarugamba ya Mombasa Open kubera imititegurire mibi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .