Tennis: Rwanda Open 2019 izitabirwa n’abakinnyi 176

Yanditswe na Eric Tony Ukurikiyimfura
Kuya 23 Ugushyingo 2019 saa 06:50
Yasuwe :
0 0

Guhera kuri iki Cyumweru tariki ya 24 Ugushyingo kugeza tariki ya 1 Ukuboza, mu Rwanda hazabera irushanwa ngarukamwaka ry’umukino wa Tennis ’Rwanda Open 2019’ rigiye kuba ku nshuro ya kabiri.

Iri rushanwa ryaherukaga kuba mu 2017 mu gihe mu mwaka ushize ritabaye kubera amikoro adahagije.

Iry’uyu mwaka rizatangira kuri iki Cyumweru, rizahuza abakinnyi baturutse mu Rwanda ndetse n’abaturutse mu bindi bihugu bya Afurika ku bibuga bya Nyarutarama, mu Rugunga (Cercle Sportif de Kigali) ndetse n’i Remera ari naho hazabera imikino ya nyuma y’irushanwa.

Mu kiganiro n’abanyamakuru cyabaye kuri uyu wa Gatanu, Perezida w’ishyirahamwe nyarwanda ry’umukino wa Tennis, Karenzi Théoneste, yavuze ko uyu mwaka iri rushanwa rizitabirwa n’abakinnyi basaga 176 bari mu byiciro bitandukanye birimo ababigize umwuga n’abatarabigize umwuga barimo n’abakanyujijeho muri uyu mukino.

Karenzi yemeza ko nubwo umukino wa Tennis mu Rwanda utari wagera ku rwego rwo hejuru ariko biteze ko iri rushanwa rizaterwa inkunga na BK Group PLC rizagenda neza.

Ati” Uyu mwaka Rwanda Open yateguwe mu rwego rwo kongera umubare w’amarushanwa no gupima urwego rw’abakinnyi b’Abanyarwanda bagezeho muri aka karere. Iri rushanwa kandi rizongerera ubushobozi abakinnyi bacu kuko bazaba bahanganye n’abaturutse hanze y’u Rwanda.”

Ku ruhande rw’umuterankunga mukuru wa Rwanda Open y’uyu mwaka, Banki ya Kigali, Nshuti Thierry ukuriye ishami rishinzwe kwamamaza ibikorwa, yavuze ko baje muri Tennis mu rwego rwo gukomeza gushyigikira imikino mu Rwanda no kumenyekanisha ibikorwa bya BK Group PLC.

Ati“ Banki ya Kigali ni iy’Abanyarwanda, kandi aho Abanyarwanda bishima igomba kuba ihari . Twaje muri Tennis kuko tuzi ko uyu mukino ukunzwe na benshi kandi uri mu mikino iri gutera imbere”.

Abakinnyi ba mbere babigize umwuga bazahabwa $700 mu gihe kandi n’abakinnyi bazagera muri 1/8 cy’irushanwa bose bazabona ibihembo bitandukanye.

Ibyiciro bizitabira iri rushanwa:

  • Abagabo babagize umwuga: 32
  • Abagore babigize umwuga: 32
  • Abafite ubumuga (Wheelchair Tennis): 16
  • Abagabo batabigize umwuga: 96
Rwanda Tennis Open 2019 iratangira kuri iki Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza